Read Mamasa Matius 27 Bible Online

Matius 27 - Mamasa bible

Matius 27

¹Mane tibungka' masiang anna ma'mesamo angganna kapala imam sola perepi'na to Yahudi urrapa' kada la umpopepatei Puang Yesus.

²Umpungomi Puang Yesus anna lao umpalessu' rokkoi lisu pala'na Pilatus, gubernur napatantu to ma'parenta Roma dio angngenan iatoo.

³Tappana naissanan Yudas to umpa'perososan Puang Yesus kumua dipasala Puang Yesus lambisan la dipatei, menassan siami. Umpasulemi doi' pera' tallu pulo lako kapala imam sola perepi'na to Yahudi

⁴anna ma'kada nakua: “Kasalaan tongan-tonganna' annu umpa'perososanna' to tangkasalaan lambisan dipatei.” Sapo natimba' kapala imam sola perepi'na to Yahudi nakua: “Tangngia kami issangki. Issammu iko tuo.”

⁵Umpa'tibeammi doi' Yudas tama Banua Ada'na Puang Allata'alla anna lao mentuyo untoke' kalena.

⁶Naliumi kapala imam inde doi'e napasiolaan ma'kada nakua: “Inde doi'e tae' mala dipalutama pa'pengngean pemalasan illalan Banua Ada'na Puang Allata'alla, annu doi alli rara.”

⁷Nasituru'-turu'imi la naallian salaoan litak disanga Litak Pa'tampa Kurin. Inde litakke, napopelamunan to messae.

⁸Iamo nangei disangaimo “Litak Rara” sae lako temo.

⁹Lemba' pole' battakada mangka natula' nabi Yeremia nakua: “Nasituru'-turu'imi to Israel la tallu pulo doi' pera' allinna lambisan natarimamo anna

¹⁰allianni salaoan litakna pa'tampa kurin, susi parentana Dewata lako kaleku.”

¹¹Dibaami Puang Yesus lako gubernur Pilatus, nakutaniami nakua: “Ikomoka tomarayanna to Yahudi?” Natimba' Puang Yesus nakua: “Ikomo melolo ungkuai.”

¹²Sapo ta'mo dengan mentimba' Puang Yesus anna ummendekan pa'tanda'na kepala imam sola perepi'na to Yahudi.

¹³Napolalan mekutana pole Pilatus nakua: “Ta'raka murangngi angganna pa'tanda'na inde mai tau lako kalemue?”

¹⁴Sapo tae' dengan natimba' Puang Yesus moi la sabattamo kada, napolalan mangnga-mangnga babangmo Pilatus.

¹⁵Ianna nalambi' omo Allo Paskah siurrappanan mesa to ditarungkun gubernur situru' pelaunna tau buda.

¹⁶Attu iatoo dengan mesa to ditarungkun to kaleleammo kakadakeanna, disanga Yesus Barabas.

¹⁷Tirempun asanni tau buda, mekutanami Pilatus nakua: “Bennanna muporaia' la kurappanan temo, Yesus Barabasraka, inderaka Yesus to sidikuaan To dibassei bayu-bayu la ma'pasalama'e?”

¹⁸Annu innang naissanammi Pilatus kumua ia sia nangei umbaa sae Yesus perepi'na to Yahudi annu mangungngu' lako.

¹⁹Ma'loko liu siapi Pilatus yao okkosan sinangei ungkattu bisara anna saemo pepasanna bainena nakua: “Seroiko kalemu dio mai kara-karana itin to tangkasalanno, annu ura'na tau iatuo, napolalan megiri-giri pangngimpingku samai bongi.”

²⁰Sapo menge liumi urrasi tau buda kepala imam sola perepi'na to Yahudi melau lako Pilatus anna malara Barabas dirappanan, anna Puang Yesus dipatei.

²¹Mekutana pole omi Pilatus lako tau buda nakua: “Bennannamo inde to dua muporai la kurappanangkoa'e?” Natimba' nakua: “Barabas!”

²²Nakuamo Pilatus: “Ianna susi too, aka la kupogau' lako inde Yesus sidikuaan To dibassei bayu-bayu la ma'pasalama'e?” Natimba' nakua: “Pasokki lako kayu pantokesan!”

²³Mekutana pole omi Pilatus nakua: “Sapo aka kakadakean mangka napogau'?” Sapo tuttuan sipealo'-alosan nakua: “Pasokki lako kayu pantokesan!”

²⁴Tapakala sumpumo Pilatus, ta'mo dengan lalan senga' naita la naola urrappanan Puang Yesus, anna marassammo duka' la rukka tau. Ummalami wai anna umbasei limanna naita tau buda napasiolaan ma'kada nakua: “Usseroinakkao kaleku dio mai kamateanna inde taue, ikomoa' ummissananni.”

²⁵Natimba' tau buda nakua: “Yaoko tanarambui dioko tanato'doi kamateanna inde taue. Kamimora sola pembatisangki urrengnge'i kamateanna.”

²⁶Urrappanammi Barabas Pilatus anna ussua tau ungkambei Puang Yesus anna mane pebenganni la dipasok lako kayu pantokesan.

²⁷Mangkai too, umbaami Puang Yesus tantarana gubernur Pilatus lako banuanna gubernur, anna untambai asan solana anna liling tamai.

²⁸Ummalaiammi pakeanna Puang Yesus amu mane papakeii bayu rui' malea rupanna.

²⁹Naananammi songko' susi songko' tomaraya sapo ma'duri anna pasongko'i anna mane patetangngi tekken lima kananna sirapan tomaraya. Mangkaii, malimuntu' asammi menomba kari' dio tingngayona Puang Yesus anna telle-tellei nakua: “Tabe', tomarayanna to Yahudi.”

³⁰Anna mane tikkuduii anna ummala tekken dio limanna Puang Yesus anna lappakkianni ulunna.

³¹Mangkai natelle, naalaimi bayu rui'na anna papakei sule innang pakeanna. Mangkaii, dibaami lao la dipasok yao kayu pantokesan.

³²Ummolai lalan umpellei kota, sitammumi mesa tau disanga Simon to dio mai kota Kirene. Napassami tantara umpassan kayu pantokesanna Puang Yesus.

³³Ullambi'i mesa angngenan disanga Golgota, kalembasanna angngenan karorak ulu,

³⁴dibeemmi anggur mangka dipasirau susi pa'du Puang Yesus. Sapo mangkanna nasandak Puang Yesus, mokami ummiru'i.[80]

³⁵Napasokmi tantara lako kayu pantokesan, anna undii pakeanna la naola untawa-tawai.

³⁶Anna mane sikaloko dio undagaii.

³⁷Dengammi pangnguki' dipalekke' yao tandonna la diola ummissananni ura'na dingei umpasokki lako kayu pantokesan nakua: IAMO TE YESUS TOMARAYANNA TO YAHUDIE.

³⁸Dengan duka' dua to kadake nasimbaraan Puang Yesus dipasok yao kayu pantokesan, mesa dio tandai kananna anna mesa dio tandai kairinna.

³⁹Angganna to liu lalan ummola angngenan iatoo, ummiling-iling asan anna untelle Puang Yesus

⁴⁰nakua: “Anna la urroppokangko para' Banua Ada'na Puang Allata'alla ammu pake'de'i sule tallungngallo. Ianna Anakna tongangko Puang Allata'alla, rappanangko kalemu ammu turun yao mai itin kayu pantokesanno!”

⁴¹Susi toi duka' kapala imam anna to untarru' issinna sura'na Musa sola perepi'na to Yahudi untelle asan Puang Yesus

⁴²nakua: “Maka' tau senga'mo la napasalama'mi, sapo ianna kalenamo ta'mo nabela napasalama'. Ianna tomarayanna tongan to Israel, la turun yao mai kayu pantokesan, angki oreanni pole'.

⁴³Anna Puang Allata'alla para' nasissarei. La taitamia' temo battu' la naaku tongarri Puang Allata'alla umpasalama'i annu mangka nakua: ‘Anaknana' Puang Allata'alla.’ ”

⁴⁴Sae lako inde dua to kadake to nasolaan ditoke'e untelle duka' Puang Yesus.

⁴⁵Tangngai allo, malillimmi padang illalan lili'na lembang iatoo sae lako tettek tallu karuen.

⁴⁶Tettek tallui karuen, metambami Puang Yesus nakua: “Eli, Eli, lama sabakhtani?” Kalembasanna: “O Dewatangku, O Dewatangku, maakari ammu tampena'?”

⁴⁷Pira-pira to urrangngi petambana Puang Yesus to dio angngenan iatoo, sipantula'-tula' nakua: “Untambai nabi Elia.”

⁴⁸Napasirra' siami mesa tau ummala bunga-bunga susi lamu' anna rammei rokko anggur maissuk, anna mane palekke'i lako roan anna padundui pudukna Puang Yesus la napairu'.

⁴⁹Sapo dengan pira tau ungkuai: “Dako'pa, anta petua'i battu' la sae tongarri Elia umpasalama'i.”

⁵⁰Napemandui polemi metamba anna mane kattu penawanna.

⁵¹Attu iatoo, sampin pesapa' illalan Banua Ada'na Puang Allata'alla sesse' tipa'dua mengkalao yao sae rokko. Pandondan padang napobua' lino' kamai anna piak-piak batu.

⁵²Buda lokko' titungka', buda toi duka' petauanna Puang Allata'alla to mangkamo mate dipatuo sule.

⁵³Mangkai tuo sule Puang Yesus dio mai alla'na to mate mane mallairi dio mai liang lu tama Yerusalem kota masero, lambisan naita tau buda.

⁵⁴Marea' asammi tamarana Roma sola ponggawana to marassan undagai Puang Yesus anna ussa'dingmo lino' kamai anna ummita angganna inde kadadianne, lambisan ma'kada nakua: “Manassa Anakna tongan Puang Allata'alla inde taue.”

⁵⁵Dengan duka' pira-pira baine umparandan mambelai, to siumpamoloii mengkalao dio Galilea,

⁵⁶susinna Maria Magdalena, indona Yakobus anna Yusuf disanga duka' Maria, anna bainena Zebedeus.

⁵⁷La kuku'i bongi, saemi mesa tomakaka disanga Yusuf to Arimatea, mesa duka' passikolana Puang Yesus.

⁵⁸Laomi umpellambi'i Pilatus anna umpelau batang rabukna Puang Yesus. Napa'parentammi Pilatus anna malara batang rabukna Puang Yesus dipalessu' lako Yusuf.

⁵⁹Mengkalao siami Yusuf lao ummala batang rabukna Puang Yesus anna balunni sampin mabusa,

⁶⁰anna mane patamai lokko'na mane mangka napapia dio mesa tanete batu. Ullenggannimi mesa batu kamai natutu'ianni anna mane le'ba.

⁶¹Torropi Maria Magdalena sola mesa baine disanga duka' Maria dio mesa angngenan umparandan lokko'.

⁶²Masiangngi, sirupang allo katarroan saemi kapala imam sola to Farisi mengngolo lako Pilatus

⁶³anna ma'kada nakua: “O tuang, kikilalai tula'na anna tuopa inde to ma'papusae, nakua: ‘Allo katallunna la tuona' sule.’

⁶⁴Dadi kenamala ussuako tau undagai lokko' sae lako allo katallunna Annu ianna tae' la dipateen, la sae passikolana ubokoi batang rabukna anna mane pa'peassakanni lako tau buda kumua tuomi sule. Napolalan marru la buda tau napapusa ke dako' anna la lessu'na.”

⁶⁵Natimba' Pilatus nakua: “Solanni pira-pira tantara ammu laoa' undagai manappai itin lokko'nao.”

⁶⁶Lao tongammi lako liang daga anna umpalekke' mesa tanda dio batu ditutu'ianni anna malara naissanan ke dengan untungka'i.