Read Mamasa Matius 3 Bible Online

Matius 3 - Mamasa bible

Matius 3

¹Masaei mangkanna, saemi Yohanes to simantedok dio padang alla' illalan lembangna Yudea anna parandukki umpalanda' kadanna Puang Allata'alla nakua:

²Mengkatoba'mokoa' annu madappi'mi kasaeanna kaparentaanna Puang Allata'alla.

³Yohanesmo napatu kadanna nabi Yesaya anna ma'kada nakua: “Dengan tau dio padang alla' metamba tamba nakua: ‘Patokanni lalan Dewata, maloloananni lalan la naola.’ ”[8]

⁴Inde Yohanesto simantedokke bulu unta napa'bayu anna balulang napa'beke',[9] bando' sola duro naponande.

⁵Sasaeammi tau lu dio mai Yerusalem, anna dio mai lembangna Yudea anna angganna tondok dio sikadappi'na Salu Yordan umpellambi'i Yohanes.

⁶Ummakui asammi kasalaanna anna tedokki dio Salu Yordan.

⁷Buda duka' to Farisi sola to Saduki[10] sae umpellambi'i annu morai la ditedok. Sapo naitanna Yohanes, ma'kadami lako nakua: “O anggammua to kadake gau',[11] musangarikaa la malakoa nasala' ara'na Puang Allata'alla?

⁸Pakawananni kumua mengkatoba' tongammokoa' ummolai panggauammua'.

⁹Daua' anna kendek illalan penawammu kumua tae'koa' la napabambanni sangka' Puang Allata'alla annu peampoannakoa' Abraham. Annu kutulasangkoa' sitonganna, inde mai batue la mala napopendadi peampoanna Abraham Puang Allata'alla.

¹⁰Tokami wase dio to' kayu la dilellengan kayu tae' kembua mapia anna ditibe tama api.

¹¹Wai kao kutedokangkoa' la tandana kumua mengkatoba'mokoa'. Sapo dengan la sae windingku marru untondon kakuasaangku annu moi angga palopakna la kualaianni, tae'na' la sipato'. Inde taue Penawa Masero sola api la natedokangkoa'.

¹²Tokami petappi dio limanna la natappian gandum. Angganna gandum malapu' naanna tama talukun, anna tappianna la ditibe tama api tae' la nabela pi'de.”

¹³Attu iatoo, saemi Puang Yesus dio mai Galilea umpellambi'i Yohanes dio Salu Yordan la natedok.

¹⁴Sapo nasandak Yohanes nadapai nakua: “Sitonganna kao la sipato' mutedok. Maakari anna Ikora sae umpellambi'ina' la kutedok?”

¹⁵Sapo natimba' Puang Yesus nakua: “Pabeaina' mutedok temo annu la taola ungganna'i angganna pa'kuanna Puang Allata'alla,” Naturu'mi Yohanes pelaunna napolalan natedok.

¹⁶Mangkai ditedok, kendekmi dio mai wai Puang Yesus. Ummitami langi' titungka' anna turun Penawanna Puang Allata'alla susi dangan-dangan urrampoii.

¹⁷Dirangngi siami kamara yao mai suruga nakua: “lamo te Anakku to kukamaseie anna to umpomasannang penawangku.”