Read Mamasa Matius 4 Bible Online

Matius 4 - Mamasa bible

Matius 4

¹Mangkai too, natettemi Penawa Masero Puang Yesus lako padang ala' annu la nasudi ponggawana setang.

²Ma'puasami[12] Puang Yesus appa' tapulo allona appa' tapulo bonginna napolalan tadea'.

³Saemi ponggawana setang[13] ussudii nakua: “Ianna Anakna tongangko Puang Allata'alla, popendadi rotii inde mai batue.”

⁴Sapo natimba' Puang Yesus nakua: “Dengan tiuki' illalan Buku Masero nakua: ‘Tangngia angga roti la napotuo ma'rupa tau, sapo angganna battakadanna Puang Allata'alla.’ ”[14]

⁵Mangkaii, ussolammi Puang Yesus lako Yerusalem, kota masero, anna payaoi bubungan Banua Ada'na Puang Allata'alla

⁶anna ma'kada lako nakua: “Ianna Anakna tongangko Puang Allata'alla, dondonangko kalemu rokko annu dengan tiuki' illalan Buku Masero nakua: ‘La ussua malaeka'na Puang Allata'alla umpesangkaiko, anna timangko indana titumbu lentekmu lako batu.’ ”[15]

⁷Nautimba' Puang Yesus nakua: “Dengan duka' tiuki' illalan Buku Masero nakua: ‘Dau ussandak-sandak Puang Allata'alla Dewatammu.’ ”[16]

⁸Ussolaan pole omi Puang Yesus langngan tanete malangka paitaii angganna kaparentaan illalan lino sitonda kamalekeanna

⁹anna ma'kada nakua: “Angganna tende lakoe la kupalulako asan kalemu ke malimuntu'ko dio oloku umpenombaina'.”

¹⁰Ma'kada Puang Yesus lako nakua: “Pallaiko lao Setang! Annu dengan tiuki' illalan Buku Masero nakua: ‘Penombaiko Puang Allata'alla Dewatammu, anna angga lako kalena la moula memala'.’ ”[17]

¹¹Le'ba siami ponggawana setang umpellei Puang Yesus. Saemi malaeka'na Puang Allata'alla ussaraii.

¹²Tappana naissanan Puang Yesus kumua ditarungkun Yohanes to simantedok,[18] mengkalaomi dio Yudea lu lako lembangna Galilea.

¹³Untampemi Nazaret lu lako tondok Kapernaum anna torro dio. Inde Kapernaum-e dio biring Tasik Galilea illalan lili'na litak katawaanna Zebulon anna Naftali.

¹⁴Ia nangei lu lako Kapernaum Puang Yesus anna malara lemba' battakadanna Dewata napalanda' nabi Yesaya nakua:

¹⁵“Litak katawaanna Zebulon anna Naftali, lalan lako Tasik Galilea, tandai lianna Salu Yordan illalan lembangna Galilea, litakna tau senga' salianna to Yahudi.

¹⁶Ummitami kamasiangan passassang to nakala' kamalillinan, anna to illalan lembangna kamatean, naarrangnii kamasiangan.”[19]

¹⁷Saena Puang Yesus dio Kapernaum, naparandukmi napa'peasasakan lako tau buda kumua: “Mengkatoba'mokoa' annu madappi'mi kasaeanna kaparentaanna Puang Allata'alla.”

¹⁸Pissan attu ummundu' biring Tasik Galilea Puang Yesus. Ummitami dua to sirondong disanga Simon (sidikuaan toi Petrus) anna disanga Andreas marassan madala, annu innang to simadala.

¹⁹Napa'kadaimi Puang Yesus nakua: “Maikoa' ammu turu'na' annu la kupatudukoa' undala ma'rupa tau.”

²⁰Mengkalao siami untampe dalana anna le'ba unturu' Puang Yesus.

²¹Umpatarru'mi penonosanna, ummita pole omi to sirendong disanga Yakobus anna Yohanes, anakna Zebedeus, marassan umpapia dalana sola ambena illalan lopinna. Natambiami duka' Puang Yesus,

²²napolalan bassi umpellei lopinna sola ambena, anna le'ba unturu' Puang Yesus.

²³Ulleleamin banua pa'sambayanganna to Yahudi Puang Yesus illalan lili'na Galilea ma'patudu, anna umpalanda' Kareba Kadoresan kumua madappi'mi kasaeanna kaparentaanna Puang Allata'alla. Anna umpomalapu' to masaki dio mai ma'rupa-rupa saki anna rammun.

²⁴Tappa silelemi karebana Puang Yesus dio lembangna Siria, napolalan buda tau sae umpellambi'i pantan umbaa to masakinna. Inde mai to masakie narua ma'rupa-rupa saki, to ussa'dingan kamapa'disan, to natamai setang, to lintu manukan, anna to balimbingan. Napomalapu' asammi Puang Yesus,

²⁵napolalan buda tau ma'karompo' ummula'i, dengan to lu dio mai lembangna Galilea, dengan to lu dio mai lembangna Dekapolis, dengan to lu dio mai Yerusalem, dengan to dio mai lembangna Yudea, anna dengan to lu sambali' mai lamban lianna Salu Yordan.