Read Mamasa Markus 15 Bible Online

Markus 15 - Mamasa bible

Markus 15

¹Mebongngi'-bongngi'pi anna urrapa'mo kada pa'bisara alukna to Yahudi, iamo kapala imam sola perepi'na to Yahudi anna to untarru' issinna sura'na Musa. Umpungomi Puang Yesus anna baaii lako Pilatus.

²Saei lako nakutanaimi nakua: “Ikomoka tomarayanna to Yahudi?” Natimba'mi nakua: “Ikomo melolo ungkuai.”

³Budami pa'tanda'na kapala imam lako Puang Yesus natula' la naola umpaalinnii kalasalaan.

⁴Mekutana polemi Pilatus nakua: “Tae' tappa'rokoka Iko la mentimba'? Perangngii, budami kadanna tau umpatampoiko kasalaan.”

⁵Sapo' tae' dengan mentimba' Puang Yesus napolalan mangnga-mangnga babang Pilatus.

⁶Ianna nalambi' omo allo kamai disanga Paskah, siurrappanan liu mesa to ditarungkun Pilatus situru' pelaunna tau buda.

⁷Attu iatoo dengan mesa tau disanga Barabas ditarungkun sola pira-pira to papatean inde anna umbali to ma'parentae.

⁸Saemi tau buda melau lako Pilatus kenamala urrappanan mesa to ditarungkun susi beasanna sinapalako.

⁹Mekutanami Pilatus nakua: “La muporaika ke kurappananni inde tomarayammua'e?”

¹⁰Annu innang naissanammi kumua ia sia nangei umbaa sae Yesus perepi'na to Yahudi annu mangungngu' lako.

¹¹Sapo' urrasi tau buda kapala imam anna pelaui kenamala Barabas dirappanan.

¹²Mekutana pole omi lako tau buda nakua: “Ianna susi too, aka la kupogau' lako inde to musanga tomarayanna to Yahudie?”

¹³Sipetamba-tambaammi nakua: “Pasokki lako kayu pantokesan!”

¹⁴Ma'kadami Pilatus nakua: “Aka tappa' kasalaanna?” Sapo' tuttuan napemandui sipealo'-alosan nakua: “Pasokki lako kayu pantokesan!”

¹⁵Urrappanammi Barabas la naola umpalosso' inawanna tau buda. Ussuami tantara undarra Puang Yesus anna mane pebenganni la dipasok lako kayu pantokesan.

¹⁶Mangkai too, umbaami Puang Yesus tantara lako pa'rantean sinangei illalan banuanna gubernur anna untambai asan solana ma'mesa.

¹⁷Napapakeimi bayu rui' mellolo pao rupanna susi bayunna tomaraya anna anananni balayan ma'duri silio songko'na tomaraya anna mane pasongko'i.

¹⁸Mangkai napa'tabe'imi nakua: “Tabe' tomarayanna to Yahudi.”

¹⁹Ummalami tangke kayu anna longa'i ulunna, anna mane tikkudui anna malimuntu' leen umpenombai kari'.

²⁰Mangkai natelle, naalaimi sule bayu rui'na anna papakei sule pakeanna. Anna mane dibaa suun Puang Yesus, la lao dipasok lako kayu pantokesan.

²¹Ummolai lalan sitammumi mesa tau disanga Simon to Kirene, ambena Aleksander sola Rufus, mane sae dio mai tondok senga' la lu tama Yerusalem. Napassami la umpassan kayu pantokesanna Puang Yesus.

²²Umbaami Puang Yesus lako mesa angngenan disanga Golgota kalembasanna angngenanna karorak ulu.

²³Anna mane beenni anggur sirau mur sapo' tae' naaku.[31]

²⁴Napasokmi lako kayu pantokesan anna undii pakeanna la naola untawa-tawai.

²⁵Tettek kasera allo anna dipasok lako kayu pantokesan Puang Yesus.

²⁶Dengan pangnguki' yao tondonna la dingei ummissananni kasalaanna nakua: TOMARAYANNA TO YAHUDI.

²⁷Dengan duka' dua to kadake nasimbaraan Puang Yesus dipasok lako kayu pantokesan, mesa dio tandai kananna anna mesa dio tandai kairinna. [

²⁸Ganna' illalan issinna Buku Masero nakua: “La diangga' to kadake duka'.”]

²⁹Angganna to liu dio angngenan iatoo ummiling-iling asan anna untelle Puang Yesus nakua: “Kusanga la urroppokangko para' Banua Ada'na Puang Allata'alla ammu pake'de'i sule tallungngallo.

³⁰Turummoko yao mai kayu pantokesan, ammu rappanan kalemu.”

³¹Susi toi duka' kapala imam anna to untarru' issinna sura'na Musa sipantula'-tula' ma'telle nakua: “Ianna tau senga'mo napasalama'mi. Sapo' ianna kalenamo ta'mo nabela napasalama'.

³²Ianna tonganna tomarayanna to Yahudi anna To nabassei bayu-bayu Puang Allata'alla, la turun yao mai kayu pantokesan temo anta itaia' sola taoreanni.” Sae duka' lako inde dua to nasimbaraan dipasok lako kayu pantokesanne untelle Puang Yesus.

³³Tettek sapulo duai allo malillimmi padang illalan lili'na lembang iatoo sae lako tettek tallu karuen.

³⁴Tettek tallui karuen metambami Puang Yesus nakua: “Eloi eloi lama sabakhtani?” kalembasanna: O, Dewatangku, O, Dewatangku, maakari ammu tampena'?

³⁵Pira-pira to ke'de' dio angngenan iatoo urrangngii metamba sipantula'-tula' nakua: “Untambai nabi Elia.”

³⁶Dengammi mesa tau kumondong lao ummala bunga-bunga susi lumu' naoton tama anggur maissuk anna palekke'i lako roan anna padundui pudukna Puang Yesus la napairu', napasiolaan ma'kada nakua: “Anta ampaia' anta itai battu la sae tongarri Elia umpaturunni.”

³⁷Mealo'mi Puang Yesus anna mane kattu penawanna.

³⁸Sesse' siami sampin pesapa' illalan Banua Ada'na Puang Allata'alla dio Yerusalem tipa'dua mengkalao yao sae rokko.

³⁹Inde anna ummitamo kamateanna Puang Yesus ponggawana tantarae, ma'kadami nakua: “Manassa Anakna tongan Puang Allata'alla inde taue.” Nakawanan tongan-tongan annu ke'de' dio tingngayona Puang Yesus attu iatoo.

⁴⁰Dengan duka' pira-pira baine umparandan mambelai, susinna Maria Magdalena, Salome, anna Maria indona Yakobus barinni' sola Yoses.

⁴¹Inde mai bainee sangngin to unturu'mo Puang Yesus, anna to untarakannii anna sidiopa Galilea. Budapi baine senga' dio duka' reen, to ussolanni sae dio Yerusalem.

⁴²Attu iatoo allo pa'patokaan la ummampai allo katorroan anna la kuku' kalemo bongi.

⁴³Napengkabaranimi Yusuf to Arimatea, lao umpellambi'i Pilatus anna umpelau batang rabukna Puang Yesus. Inde Yusuf-e mesa to keangga' to nakala' duka' pa'bisara alukna to Yahudi anna masae allomo naola ummampai kaparentaanna Puang Allata'alla.

⁴⁴Mangnga-mangnga Pilatus anna urrangngimo kareba kumua bonno'mi Puang Yesus. Untambaimi ponggawana tantara anna kutanaii battu la bonno' tongarri.

⁴⁵Inde anna urrangngimo kadanna ponggawana tantarae, umpabeaimi Yusuf ummala batang rabukna Puang Yesus.

⁴⁶Ummallimi sampin mabusa Yusuf, anna lao umpaturun batang rabukna Puang Yesus anna balunni. Mangkaii napatamami lokko' dio mesa tanete batu. Ullenggannimi mesa batu kamai natutu'ianni ba'bana.

⁴⁷Inde liangnge naita Maria Magdalena sola Maria indona Yoses.