Read Mamasa Lukas 1 Bible Online

Lukas 1 - Mamasa bible

Lukas 1

¹O Teofilus to dipakasalle, budami tau umpeang lalan la ummuki' aka mangka dadi illalan alla'-alla'ta situru' rettenanna.

²Pantan nauki'mi situru' tula'na lako kaleta to melolo ummita inde kadadianne mengkalao dio pa'parandukanna. Inde mai to melolo ummitaie ia siamo to umpalanda' battakadanna Puang Allata'alla.

³Mangkanna kupengkalesoi manappa mengkalao dio pa'parandukanna, kendekmi illalan penawangku la ummukisangko situru' rettenanna

⁴anna malara muissanan kumua angganna mangka dipatuduangko, tonganna tongan.

⁵Attunna tomaraya Herodes ma'parenta dio lembangna Yudea, dengan mesa imam disanga Zakharia, to nakala' kombonganna imam Abia. Disanga Elisabet bainena, peampoanna imam Harun.

⁶Inde to sipobainee, bassi malolo dio olona Puang Allata'alla anna tae' dengan sassana unturu' angganna parentana Dewata.

⁷Sapo tae' keanak annu tamanang Elisabet anna bassi matuamo.

⁸Pissan attu, nalambi' attunna imam to nakala' kombonganna imam Abia la mengkarang, napolalan umpalako passananna Zakharia dio tingngayona Puang Allata'alla.

⁹Situru' kabeasaan, sinaundi angganna imam la naola umpatantu to la umpalako karangan imam illalan Banua Ada'na Puang Allata'alla untunu kemenyan. Attu iatoo Zakharia napatu.

¹⁰Marassanni ditunu kemenyan, ma'sambayangmi tau buda dio salian.

¹¹Umpa'paitaammi kalena mesa malaeka'na Dewata lako Zakharia ke'de' dio tandai kananna angngenan pemalasan sidingei untunu kemenyan.

¹²Tikkedu'mi Zakharia ummitai siolaan marea'.

¹³Sapo ma'kada inde malaeka'e nakua: “O Zakharia, dau marea' annu narangngimi sambayangmu Puang Allata'alla. La keanak Elisabet bainemu, la muane anakna anna la musangai Yohanes.

¹⁴La dore'ko ke dadimi inde anakke anna la buda tau dore'.

¹⁵Inde anakke la keangga' dio olona Dewata. Tae' dengan leleanna la ummiru' anggur battu wai senga' la umpomalangona tau, anna la naluang Penawa Masero mengkalao dio mai dadinna.

¹⁶La buda to Israel napasule lako olona Puang Allata'alla, Dewatanna.

¹⁷La uyyoloanan Dewata sitonda kakuasaanna Penawa Masero susi nabi Elia. La umpasikapia ambe anna anak, anna lako to tae' manu- ru' la naparunduk sule lako lalan kamaloloan. Nakuamo te karangannae la naola umpatoka ma'rupa tau la mendadi petauanna Dewata.”

¹⁸Mekutanami Zakharia lako inde malaeka'e nakua: “Umba la kukua ummissananni kumua la dadi tongan itin kara-karao, annu bassi matuamokan baineku?”

¹⁹Natimba' inde malaeka'e nakua: “Kaomo Gabriel to sinasua Puang Allata'alla, nasuana' temo sae umpantula'iko anna umpalandasangko inde kareba mapiae.

²⁰Perangngi manappai kumua tae' la muissan mantula' sae lako attun na lemba' inde kara-karae annu tae'ko ummorean tula'ku. Annu innang la dadinna ke nalambi'mi attunna.”

²¹Attu iatoo, mausa'mi tau buda ummampai Zakharia anna mangnga-mangnga asammo annu masae sigalimi Zakharia illalan Banua Ada'na Puang Allata'alla.

²²Inde anna suummo Zakhariae, ta'mo naissan mantula' lako tau buda, anggami limanna napakagero'-gerok liu napolalan naissanan tau buda kumua dengan aka naita illalan Banua Ada'na Puang Allata'alla.

²³Purai attu pengkaranganna Zakharia illalan Banua Ada'na Puang Allata'alla, sulemi lako banuanna.

²⁴Tae' masae mangkanna, manambuk tongammi Elisabet, bainena. Lima bulan tae' umpa'paitaan kalena.

²⁵Nakuamo Elisabet: “Iamo te kara-kara napogau' Dewata lako kalekue. Nakamaseina' anna napa'deimo pole' siri'ku temo dio mai tingngayona tau.”

²⁶Annanni bulanna tambukna Elisabet, ussuami malaeka'na Puang Allata'alla disanga Gabriel lako Nazaret, mesa tondok dio lembangna Galilea,

²⁷lao umpellambi'i mesa anak dara disanga Maria. Inde Mariae, situmai mesa anak muane disanga Yusuf, peampoanna tomaraya Daud.

²⁸Saei lako banuanna Maria, ma'kadami inde malaeka'e nakua: “Kerongko'ko, natamba'ko Dewata anna la tontongko nasolaan.”

²⁹Mangnga-mangnga Maria urrangngi tula'na inde malaeka'e lambisan kendek pekutana illalan penawanna diona kalembasanna inde tula'e.

³⁰Nakua pole omo inde malaeka'e: “O Maria, dau marea' annu ikomo napile Puang Allata'alla la natamba'.

³¹La manambukko, la muane anakmu anna la musangai Yesus.

³²La mendadi mesa to kamai anna la digente' Anakna Puang Allata'alla to randan matande. La napopendadi tomaraya Puang Allata'alla susi tomaraya Daud nenena.

³³La umparenta peampoanna Yakub sae lako-lako- na, anna inde kaparentaannae tae' dengan ma'meanggaan.”

³⁴Nakuamo Maria lako inde malaeka'e: “Umbamo la nakua dadi itin kadammuo annu ta'pa' kemuane?”

³⁵Natimba' inde malaeka'e nakua: “La turun Penawa Masero tama kalemu anna kakuasaanna To randan matande la ussolangko. Iamo too, itin anak la mudadianno la digente' To masero, Anakna Puang Allata'alla.

³⁶Kupokadangko sitonganna, manambukmi Elisabet sa'do'dorammu moika anna matuamo anna sinakuanni tau to tamanang sapo annammi bulanna tambukna temo.

³⁷Annu tae' dengan aka tanaissan napadadi Puang Allata'alla.”

³⁸Nakuamo Maria: “Sabua'nana' te Dewatae, iamo mukua iamo dadi lako kaleku situru' itin tula'muo.” Le'bami malaeka' umpellei Maria.

³⁹Mangkai too, mengkalao siami Maria lako mesa kota yao mentanetena dio lembangna Yudea,

⁴⁰lao umpellambi'i banuanna Zakharia. Saei lako, umpantula'imi Elisabet.

⁴¹Tappana urrangngi tula'na Maria Elisabet, kedo siami anakna illalan tambukna. Nakuasaimi Penawa Masero Elisabet.

⁴²lambisan metamba, nakua: “Angganna baine, ikomo randan ma'tandalangnganan tamba'mu, anna la ditamba' duka' anak la mudadian.

⁴³Sitonganna tae'na' sipato' la napellambi'i indona Dewatangku.

⁴⁴Annu kurangnginna tula'mu, kedo siami anakku illalan tambukku dore'.

⁴⁵Kerongko'ko annu muorean kumua angganna kadanna Dewata lako kalemu la dadi!”

⁴⁶Nakuamo Maria: Mengkalao illalan penawangku lemba' dio pudukku umpakasalle Dewata,

⁴⁷anna sangkalebu penawangku dore' annu napasalama'na' Puang Allata'alla.

⁴⁸Tontong umpaillalan penawa kamemase-maseanna inde sabua'nae. Mengkalao temo la nakuanna' angganna lapikna ma'rupa tau: ‘To kerongko'.’

⁴⁹Annu umpogau' tanda memangnga-mangnga lako kaleku Puang Allata'alla To randan kuasa. Masero sanganna!

⁵⁰Pa'kamasena Puang Allata'alla mellambi' lako to mengkarea' lako kalena sae lako peampoanna.

⁵¹Mangka umpogau' kara-kara kamai ummolai kakuasaanna, anna umpasisarak-sarak to malangka' penawa.

⁵²Buda tomaraya napaturun yao mai okkosan kaparentaan, anna untandean to tanda rokko.

⁵³Umpasonai kamapiaan angganna to tadea', anna angganna tomakaka narambai lao ma'pala' lo'bang.

⁵⁴Umpamoloi peampoanna Israel sabua'na, tae' dengan lembe ungkamaseii.

⁵⁵Annu tae' dengan ungkalembei pa'dandinna lako neneta anna lako Abraham sola lako angganna peampoanna sae lako-lakona.”

⁵⁶Torropi Maria dio sola Elisabet umbai tallu bulan anna mane ma'pasule lako banuanna.

⁵⁷Tapakala, nalambi'mo attunna la keanak Elisabet. Napolalan keanakmo, muaneria anakna.

⁵⁸Dore' asammi duka' sabanuanna anna angganna rapunna anna rangngimi kumua umba nakua pa'kamasena Dewata lako Elisabet.

⁵⁹Karuai allona dadinna sasaeammi sabanuanna anna angganna rapunna annu la disunna'mi. Morai asammi la ussangaii Zakharia susi sanganna ambena.

⁶⁰Sapo ma'kada indona nakua: “Tae'! La disangai Yohanes.”

⁶¹Nakuamo inde mai sabanuanna sola rapunnae: “Tae' dengan rapummua' disanga Yohanes.”

⁶²Umpebeemmi tanda lako ambena kumua aka la disangaian inde ana'-ana'e.

⁶³Umpelaumi papan sidipangnguki'i anna uki'i nakua: “La disangai Yohanes.” Mangnga-mangnga asan inde mai taue.

⁶⁴Attu ia siamo too anna tibuka sule pudukna Zakharia lambisan mala mantula' anna umpudi Puang Allata'alla.

⁶⁵Marea' asammi sabanuanna. Silelemi kareba diona inde kara-karae dio mentanetena Yudea.

⁶⁶Angganna to urrangngi kara-kara iatoo mekutana asan illalan penawanna nakua: “La mendadi akai inde anak ke dako'e?” Annu manassa anna napaloloanni Dewata.

⁶⁷Nakuasaimi Penawa Masero Zakharia, ambena inde anakke, napolalan ullombungan tula'na Dewata nakua:

⁶⁸“Dipomatande Puang Allata'alla Dewatanna to Israel, annu saemi umpellambi'i petauanna anna sulangngi.

⁶⁹Nabengangkia' to la umpasalama'ki', tae' dengan untondonni, peampoanna tomaraya Daud sabua'na.

⁷⁰Susi mangka nadandi Puang Allata'alla ummolai nabi maserona yolona

⁷¹la napasalama'kia' dio mai angganna ewalinta anna kakuasaanna angganna to ungkabassikia'.

⁷²La umpakawanan pa'kamasena lako neneta anna ungganna'i pa'dandi maserona.

⁷³Inde pa'dandinnae mangka napa'pindai lako Abraham kabuttuanta

⁷⁴kumua la naberoikia' dio mai kakuasaanna ewalinta, anta malara tae' marea' umpenombaii

⁷⁵anna la maseroki' sola malolo dio olona illalan salolo salu katuoanta.

⁷⁶Anna iko anakku, la digente'ko nabinna Puang Allata'alla To randan matande. Annu ikomo disua yolo la umpatokaan lalan Dewata,

⁷⁷anna la mupa'peassakan lako petauanna kumua la digarri'i kasalaanna ma'rupa tau napolalan dipasalama'

⁷⁸ura'na pa'kamasena tadiissan disangai lambisan sae tama lino umpellambi'ikia'. Sirapan birra'na allo mebongngi'

⁷⁹la ummarrang angganna to nakala' kamalillinan anna to natondon kamatean, la natette lako kamasakkean anna kamalinoan.”

⁸⁰Tuttuan kamaimi inde anakna Zakhariae anna tuttuan matoro penawanna. Torromi dio padang alla' sae lako nalambi' attunna la umpakawanan kalena lako to Israel.