Read Mamasa Lukas 2 Bible Online

Lukas 2 - Mamasa bible

Lukas 2

¹Attu iatoo umpasuun parenta tomaraya Agustus la diteken angganna ma'rupa tau illalan lili'na kaparentaanna Roma.

²Iamo te bunga'-bunga'na dipalako pantekenanne attunna Kirenius mendadi gubernur dio Siria.

³Pantan laomi umpellambi'i tondok kadadianna tau anna malara diteken dio.

⁴Mengkalaomi duka' Yusuf dio kota Nazaret lembangna Galilea le'ba langngan tondok Betlehem lembangna Yudea, tondok kadadianna tomaraya Daud, annu innang peampoanna tomaraya Daud.

⁵Ussolammi Maria to la napobaine la lao diteken. Attu iatoo manambukmi Maria.

⁶Inde anna diomo Betlehem-e, nalambi'mi attunna la keanak Maria

⁷napolalan dadimo anak pa'bunga'na, muane. Namomommi sampin anna lole'i rokko pa'pandean domba, annu tae' dengan banua nangei torro.

⁸Dio inde angngenanne dengan pira-pira to ma'kambi' torro dio pasang ma'bongi undagai pa'kambi'na.

⁹Pissananna tokke'mo umpa'paitaan kalena mesa malaeka'na Dewata lako inde to ma'kambi'e, anna naarrang kamatandeanna Dewata passassang yao mai langi', napolalan marea' asan.

¹⁰Sapo ma'kada inde malaeka'e nakua: “Daua' marea', annu saena' umpalandasangkoa' kareba mapia, kareba la umpadore' angganna tau.

¹¹Bongi temo dio tondokna tomaraya Daud dadimi To la umpasalama'koa' iamo Kristus, Dewatammua'.[1]

¹²Anna la susi inde tandanae: La ullambi'koa' ana'-ana' dimomon sampin dilole' dio pa'pandean domba.”

¹³Tokke'mi diita buda malaeka' senga' buttu yao mai suruga sola inde malaeka'e umpudi Puang Allata'alla nakua:

¹⁴“Dipakasalle Puang Allata'alla yao angngenan randan matande, anna la masakke ma'rupa tau illalan lino to naporai Dewata.”

¹⁵Le'bai malaeka' langngan suruga umpellei inde mai to ma'kambi'e, sipantula'-tula'mi nakua: “Anta laomoa' lako Betlehem umpetua' kara-kara dadi dio susi napokada Dewata lako kaleta.”

¹⁶Mengkalao siami lako, ullambi'mi Maria sola Yusuf anna inde ana'-ana' dilole' dio pa'pandean dombae.

¹⁷Ummitanna inde ana'-ana'e, untetterammi tula'na malaeka' umpokada inde anakke.

¹⁸Mangnga-mangnga asammi to urrangngii tula'na.

¹⁹Sapo napaillalan penawa ia Maria inde kara-karae anna penawa-nawaanni.

²⁰Ma'pasulemi inde to ma'kambi' lako angngenannae napasiolaan umpudi anna umpakasalle Puang Allata'alla annu angga narangnginna anna naitanna tae' dengan sisalanna tula'na malaeka'.

²¹Karuai allona dadinna inde ana'-ana'e, disunna'mi anna disangai Yesus situru' sanga napokada malaeka' anna ta'pa natambuk indona.

²²Nalambi'i attunna la usseroi kalena Maria situru' Pepa'guruanna Musa,[2] laomi sola Yusuf umbaa anakna langngan Yerusalem la nasorong langngan Dewata,

²³susi tiuki' illalan Parentana Dewata nakua: “Angganna anak pa'bunga' muane la disorongan langngan Dewata.”[3]

²⁴Umbaami duka' bua pemala'na situru' Parentana Dewata, iamo dua bukku battu dua anak dangan-dangan.[4]

²⁵Attu iatoo dengan tau dio Yerusalem disanga Simeon, mesa to malolo anna mengkarea' langngan Puang Allata'alla anna nakuasai Penawa Masero, ummampai attunna dirappanan to Israel dio mai kamaparrisan.

²⁶Anna innang mangkami napakawanan Penawa Masero lako kumua tae' la bonno' ke ta'pa ummita To nabassei bayu-bayu Puang Allata'alla la ma'pasalama'.

²⁷Nagara'mi Penawa Masero Simeon napolalan tama Banua Ada'na Puang Allata'alla. Attu iamo too anna sae tama Banua Ada'na Puang Allata'alla Puang Yesus nabaa to matuanna annu la dipogau'mi sara' lako kalena situru' Pepa'guruanna Musa.

²⁸Ummalami inde ana'-ana' Simeon-e anna riwai, napasiolaan umpudi Puang Allata'alla nakua:

²⁹“O Dewata, muganna'imi pa'dandimmu lako kaleku temo. Masannangmo' la umpellei lino

³⁰annu melolomi matangku ummita To ma'pasalama' buttu dio mai kalemu,

³¹mupatokaan angganna ma'rupa tau.

³²Inde To ma'pesalama'e sirapan kamasiangan la napopaita to salianna to Yahudi sae lako olomu anna la umbaa kamatandean lako petauammu, to Israel.”

³³Bassi mangnga-mangngami ambena sola indona urrangngi Simeon untula' inde anaknae.

³⁴Napelauammi tamba' Simeon inde to sarapue anna mane ma'kada lako Maria, indona inde ana'-ana'e nakua: “Inde anakmue mangka naturo Puang Allata'alla la undondonan anna untandean buda to Israel. Anna la mendadi tanda pa'pakainga' yao mai Puang Allata'alla, la natumpu pala' ma'rupa tau

³⁵anna malara kawanan issi penawanna ma'rupa tau. Anna iko Maria, la ussa'dingangko kamapa'disan sirapan to digayang pa'dang.”

³⁶Dengan duka' mesa nabi, baine disanga Hana, anakna Fanuel, peampoanna Asyer. Inde Hanae matuami annu karuami pulona appa' taunna. Masaemi balu annu angga pitu taun sola muanena anna matemo muanena. Tae' dengan leleanna umpellei Banua Ada'na Puang Allata'alla, allo bongi menomba langngan Puang Allata'alla, ma'puasa anna ma'sambayang.

³⁷

³⁸Attu iatoo saemi duka' ma'kurru' sumanga' langngan Puang Allata'alla anna untula' inde anakke lako tau buda to ummampai attunna Puang Allata'alla ussulang to Yerusalem.

³⁹Mangka asanni umpalako sara' situru' Parentana Dewata, ma'pasulemi Yusuf sola Maria lako tondok Nazaret dio lembangna Galilea.

⁴⁰Tuttuan kamaimi inde anakke anna matoro, keaka' anna natamba' Puang Allata'alla.

⁴¹Taun-taun, silao liu langngan Yerusalem to matuanna Puang Yesus umpakaroa' allo Paskah.

⁴²Sapulo duai taunna Puang Yesus lao omi langngan Yerusalem situru' kabeasaan sinapogau' tau.

⁴³Mangkai sara', ma'pasulemi Yusuf sola Maria sapo tae' naissanan kumua torropia Puang Yesus, anakna yao Yerusalem

⁴⁴annu nasanga sola tau buda menono'. Sangngalloi menono' mane napeangri lako sa'do'doranna sola lako siissananna,

⁴⁵sapo tae' dengan nalambi' napolalan ma'pasule langngan Yerusalem umpeangngi.

⁴⁶Tallungngalloi napeang, mane nalambi'ri illalan Banua Ada'na Puang Allata'alla ma'loko illalan alla'-alla'na pebawa alukna to Yahudi ma'perangngi anna mekutana lako.

⁴⁷'Mangnga-mangnga asan to dio reen urrangngi kamanaranganna anna pentimba'na inde anakke.

⁴⁸Mangnga-mangngami duka' to matuanna ummitai. Ma'kadami indona lako nakua: “O anakku, maakari ammu ma'pasusi lako kaleki? Tae' dengan ra'da penawangku sola ambemu umpeangko.”

⁴⁹Natimba' Puang Yesus nakua: “O ambe' sola indo', maakari ammu peangna'? Ta'raka muissanan kumua innang la illalanna' banuanna Ambeku?”

⁵⁰Sapo tae' naissanan to matuanna kalembasanna inde tula'nae.

⁵¹Mangkai too, sola-solami ma'pasule lako Nazaret, anna tontong liu manuru' lako to matuanna. Angganna inde kara-karae napaillalan penawa liu indona.

⁵²Tuttuan kamaimi Puang Yesus, tuttuan keaka' anna tuttuan umpomasannang Puang Allata'alla sola ma'rupa tau.