Read Mamasa Lukas 23 Bible Online

Lukas 23 - Mamasa bible

Lukas 23

¹Mangkai too, ke'de' asammi inde to ma'mesae anna ussolaan Puang Yesus lako Pilatus.

²Saei lako, naparanduk pole' napatampoi kasalaan nakua: “Inde taue siumpapusa tau buda, tae' umpabeai tau umbaya' sima lako tomaraya, anna ummangga' kalena Kristus, battu dikua tomaraya.”

³Mekutanami Pilatus lako Puang Yesus nakua: “Ikomoka tomarayanna to Yahudi?” Natimba' nakua: “Ikomo melolo ungkuai.”

⁴Nakuamo Pilatus lako kapala imam sola lako tau buda: “Tae' dengan kulambi' kasalaanna inde taue.”

⁵Sapo napempassaan liu nakua: “Pepa'guruanna inde taue urrasi tau kamban illalan lembangna Yudea, mengkalao dio Galilea anna saemo inde.”

⁶Tappana narangngi Pilatus tula'na, napekutanammi kumua to Galilearaka inde taue.

⁷Naissananna Pilatus kumua to lu dio mai lembang naparenta Herodes, nasua lakomi, annu sirupang duka' dio Yerusalem Herodes attu iatoo.

⁸Dore'mi Herodes ummita Puang Yesus, annu masaemi napekareba anna morai la ummitai. Anna nainawa-nawa duka' kela dengan siapa naita umpogau' tanda memangngamangnga.

⁹Buda pekutananna Herodes sapo tae' tappa' dengan natimba' Puang Yesus.

¹⁰Ke'de asammi kapala imam sola to untarru' issinna sura'na Musa anna umpatampoi kasalaan Puang Yesus.

¹¹Umpetawa-tawaimi Puang Yesus Herodes sola tantarana sola natelle-telle. Napapakeimi bayu rui' susi bayunna tomaraya anna mane suai sule lako Pilatus.

¹²Allo ia siamo too anna sikapia Herodes anna Pilatus, annu ambo' sikabassi.

¹³Urrempummi kapala imam sola perepi'na to Yahudi anna tau buda Pilatus,

¹⁴anna ma'kada lako nakua: “Mangkamia' mubaa sae inde taue annu mutanda' umpapusa tau. Muita siamia kuparessa anna tae' dengan kulambi' kasalaan situru' pa'tanda'mua' lako kalena.

¹⁵Tae' duka' dengan nalambi' kasalaanna Herodes annu napasulemi lako kaleta. Sitonganna tae' dengan kasalaan napogau' la dipolalan umpateii.

¹⁶Iamo too, la kuombangmi angku mane rappananni.” [

¹⁷Siurrappanan mesa to ditarungkun Pilatus ke nalambi'i Allo Paskah situru' pelaunna tau buda.]

¹⁸Sapo napissanni sipealo'-alosan nakua: “Pateii. Barabasmo rappananangkan.”

¹⁹Ia dingei untarungkun inde Barabas-e annu umbali to ma'parenta illalan kota anna papatean.

²⁰Umpantula'i polepi tau buda Pilatus pissan annu morai tappa' la urrappanan Puang Yesus.

²¹Sapo sipeolo'-alosan untimba'i nakua: “Pasokki lako kayu pantokesan! Pasokki lako kayu pantokesan!”

²²Nakuamo Pilatus kapentallunna: “Aka tappa' kasalaanna inde taue? Tae' dengan kulambi' kasalaanna la dipolalan umpateii. La kuombangmi angku mane rappananni.”

²³Sapo sipealo'-alosan umpempassaan pa'kuanna kumua la dipasok lako kayu pantokesan napolalan dituru'.

²⁴Napopa'lesoammi Pilatus unturu' pa'kuanna inde mai taue.

²⁵Urrappanammi to ditarungkun annu umbali to ma'parenta illalan kota sola papatean situru' pelaunna tau buda anna ussorong Puang Yesus lako la napatei situru' pa'kuanna.

²⁶Dibaami Puang Yesus lako salian kota. Ummolai lalan, sitammumi mesa to Kirene disanga Simon la lu tama kota Yerusalem. Napatorromi anna papassanni kayu pantokesan anna suai unturu' Puang Yesus.

²⁷Buda tau unturu'i, dengan duka' baine marassan untangi'i sola umbatingngii.

²⁸Nasailemi Puang Yesus anna ma'kada lako nakua: “O baine to Yerusalem, daua' tangi'ina' sapo tangi'ikoa' kalemu sola anakmu.

²⁹Annu la dengan attunna la nakua tau: ‘Kerongko' angganna baine tamanang anna to tae' dengan ma'pasusu.’

³⁰Attu iatoo, la ma'kada tau lako tanete nakua: ‘Roppokkikan mai,’ anna lako buntu-buntu nakua: ‘Tambunnikan.’

³¹Annu ianna kayu tuomo dipasusi indee, la ondongpi ia lako kayu marekko'.”[37]

³²Dengan duka' dua to kadake dibaa la dipatei sola Puang Yesus.

³³Saei lako mesa angngenan disanga Karorak Ulu, umpasokmi Puang Yesus lako kayu pantokesan sola inde dua to kadakee, mesa dio tandai kananna Puang Yesus mesa dio tandai kairinna.

³⁴Ma'sambayangmi Puang Yesus nakua: “O Ambeku, garri'ianni kasalaanna inde mai taue annu balan tanaissananna nangei ma'palako.” Naundimi tantara pakeanna la naola untawa-tawai.

³⁵Ke'de'mi tau buda umpetua'i. Untelle-tellemi Puang Yesus perepi'na to Yahudi nakua: “Umpasalama' ade' tau senga'. Ianna to napile tongan Puang Allata'alla anna To dibassei bayu-bayu la ma'pasalama', la umpasalama'mi duka' kalena temo.”

³⁶Natelle-tellemi duka' tantara anna benganni anggur maissuk,

³⁷anna kuanni: “Ianna tomarayannako to Yahudi rappanangko kalemu.”

³⁸Dengan duka' pangnguki' yao tondonna nakua: IAMO TE TOMARAYANNA TO YAHUDIE.

³⁹Natelle-tellemi duka' mesa to kadake nasolaan ditoke' nakua: “Anna to dibasseiko para' bayu-bayu la ma'pasalama'? Rappanammoko kalemu ammu rappanangkan duka'.”

⁴⁰Sapo nakambaroan solana nakua: “Ta'rokoka marea' langngan Puang Allata'alla annu dipabambannimiki' sangka' dipatei sola?

⁴¹Sipato'ki' kita dipatei annu situru' panggauanta, sapo inde ia taue, tae' ia kasalaan.”

⁴²Anna mane ma'kada lako Puang Yesus nakua: “O Puang Yesus, kilalainakkao ke saemoko ma'parenta.”

⁴³Natimba' Puang Yesus nakua: “Kupokadangko sitonganna, allo temo solamiki' illalan angngenan kamasannangan disanga Firdaus.”

⁴⁴Attu iatoo umbai tettek sapulo duamo allo, malillimmi dio inde pellembanganne sae lako tettek tallu karuen

⁴⁵annu tae' pangngarrang mata allo. Sampin pesapa' illalan Banua Ada'na Puang Allata'alla sesse' tipa'dua.

⁴⁶Metambami Puang Yesus nakua: “O Ambeku, kusorongmi penawangku rokko lisu pala'mu.” Mangkai mantula' kattumi penawanna.

⁴⁷Naitanna ponggawana tantara inde kara-karae, umpakasallemi Puang Allata'alla nakua: “To malolo tongan inde taue.”

⁴⁸Inde anna ummitamo kara-kara dadi tau buda to sae umpetua'ie, menassammi anna ma'pasule ungkambei kalena.

⁴⁹Sapo angganna siissananna Puang Yesus sola pira-pira baine to ummula'i dio mai Galilea ke'de mambela-bela umpetua' inde kara-kara dadie.

⁵⁰Dengan mesa tau disanga Yusuf to lu dio mai tondok Arimatea dio lembangna Yudea. Inde Yusuf-e mesa to mapia penawa anna to malolo anna ummampai duka' kaparentaanna Puang Allata'alla. Moi anna nakala' duka' kombonganna pa'bisara aluk, sapo tae' untarima kasiturusanna solana kumua la dipatei Puang Yesus.

⁵¹

⁵²Laomi umpellambi'i Pilatus anna umpelau batang rabukna Puang Yesus.

⁵³Umpaturummi batang rabukna Puang Yesus yao mai kayu pantokesan anna mane balunni sampin mabusa anna mane patamai lokko' mangka dipapia dio mesa tanete batu. Inde lokko'e ta'pa dengan to mate dipatama.

⁵⁴Attu iatoo, allo pa'patokaan annu la nalambi'mi allo katorroan.

⁵⁵Angganna baine to nasolaan Puang Yesus dio mai Galilea, ummula' manarang Yusuf napolalan naita liangna anna nakawanan umba nakua dipatodo' batang rabukna.

⁵⁶Mangkaii, ma'pasulemi lako banua anna umpatoka minna'-minna' sola ma'rupa-rupa lite kayu bumanangnga' la lao napabonangngian batang rabukna Puang Yesus. Nalambi'i allo katorroan, ta'mo mengkarang situru' atoran illalan sura'na Musa.