Read Mamasa Lukas 3 Bible Online

Lukas 3 - Mamasa bible

Lukas 3

¹Kasapulo limanna taunna ma'parenta tomaraya Tiberius, attunna Pontius Pilatus mendadi gubernur dio Yudea, anna Herodes ummanda'i kaparentaan dio Galilea, attunna Filipus sirondongna Herodes ma'parenta dio Iturea sola dio Trakhonitis, attunna duka' Lisanias ummanda'i kaparentaan dio Abilene

²anna attunna Hanas sola Kayafas mendadi Pongkena Imam ma'kadami Puang Allata'alla lako Yohanes anakna Zakharia dio padang alla'.

³Napolalan laomo Yohanes ullelean angganna angngenan dio lembangna Salu Yordan umpalanda' Kadanna Puang Allata'alla nakua: “Mengkatoba'mokoa' ammu ditedok anna malara nagarri'iangkoa' kasalaammu Puang Allata'alla.”

⁴Susi mangka napayolo lamban nabi Yesaya illalan sura'na nakua: “Dengan tau metamba-tamba dio padang alla' nakua: ‘Patokanni lalan Dewata, maloloananni lalan la naola.

⁵La ditambunni angga mellembangna, anna dirantean angga mentanetena sola ma'buntunna, la dimaloloan angga sengko'na anna dipomarante ma'kaleok-leokna.

⁶Angganna ma'rupa tau illalan lino la ummita kasalamasan lu yao mai Puang Allata'alla.’ ”[5]

⁷Ma'kada Yohanes lako tau buda to la sae ditedok nakua: “O anggammua' to kadake gau', benna ungkuangkoa' kumua la malakoa' nasala ara'na Puang Allata'alla la sae?

⁸Kenamala kembua mapiakoa' sitinti pa'palakomu mengkatoba'. Dau anna kendek illalan penawammua' kumua peampoannakoa' Abraham. Kupokadangkoa' sitonganna, inde mai batue mala napopendadi peampoanna Abraham Puang Allata'alla.

⁹Tokami wase la dilellengan kayu tae' kembua mapia anna ditibe tama api.”

¹⁰Nakuamo inde mai taue: “Akamo la kipogau'?”

¹¹Natimba' Yohanes nakua: “Benna-benna ummampui dua bayu, la nabeen to tae' ummampui bayu mesa. Anna benna-benna ummampui andean la natawa duka'.”

¹²Dengan duka' sae pira-pira tuang passima morai la ditedok, mekutana nakua: “O tuangguru, aka kami la kipogau'?”

¹³Natimba' Yohanes nakua: “Dau pala'bii musinga' anna mangkanna dipatantu.”

¹⁴Mekutana duka' pira-pira tantara nakua: “Anna kami, aka kami la kipogau'?” Natimba' Yohanes nakua: “Dau tokke' ummala babang ewananna tau ke tangngia lalanna anna tae'koa' la umpaalinni kasalaan tau annu la nabaya'koa'. Pasiruaimia' kalemu passaromu.”

¹⁵Attu iatoo mangngampa liumi anna parannu tau buda lako kasaeanna To dibassei bayu-bayu la ma'pasalama', napolalan kendek pekutana illalan penawanna kumua umbai iamo.

¹⁶Iamo too anna ma'kadamo Yohanes lako inde mai taue nakua: “Wai kao kutedokangkoa', sapo dako' la sae to marru ma'kuasa anna kaleku annu angga la kubukaianni pekapu' palopakna anna tae'na' sipato'. Inde taue Penawa Masero sola api la natedokangkoa'.

¹⁷Sirapan to ma'tappi, tokami petappinna la napake ungkayoi gandumna anna mane annai tama talukunna. Mengke'de' tappianna napatama api tae' dengan leleanna la pi'de.”

¹⁸Budapi kada pa'nanna' natula' Yohanes attunna anna umpalanda' Kareba Kadoresan.

¹⁹Sapo ungkambaroarria to ma'parenta dio lembangna Galilea iamo Herodes diona kasipobaineanna Herodias bainena sirondongna, anna diona angganna kakadakeanna,

²⁰napolalan urrangnganni pole omo kakadakeanna Herodes annu untarungkun Yohanes.

²¹Marassanni untedok tau buda Yohanes, saemi duka' Puang Yesus anna ditedok. Mengei ma'sambayang Puang Yesus, titungka'mi langi'

²²anna turun Penawa Masero merrupa dangan-dangan sae urrampoii. Dirangngimi kamara yao mai langi' nakua: “Ikomo anakku to kukamasei, to umpomasannang penawangku.”

²³Inde anna umparanduk pengkaranganna Puang Yesus-e, umbai tallu pulomo taunna. Anna situru' tula'na tau, Puang Yesus anakna Yusuf. Yusuf anakna Eli,

²⁴Eli anakna Matat, Matat anakna Lewi, Lewi anakna Malkhi, Malkhi anakna Yanai, Yanai anakna Yusuf,

²⁵Yusuf anakna Matica, Matica anakna Amos, Amos anakna Nahum, Nahum anakna Hesli, Hesli anakna Nagai,

²⁶Nagai anakna Maat, Maat anakna Matica, Matica anakna Simei, Simei anakna Yosekh, Yosekh anakna Yoda,

²⁷Yoda anakna Yohanan, Yohanan anakna Resa, Resa anakna Zerubabel, Zerubabel anakna Sealtiel, Sealtiel anakna Neri,

²⁸Neri anakna Malkhi, Malkhi anakna Adi, Adi anakna Kosam, Kosam anakna Elmadam, Elmadam anakna Er,

²⁹Er anakna Yesua, Yesua anakna Eliezer, Eliezer anakna Yorim, Yorim anakna Matat, Matat anakna Lewi,

³⁰Lewi anakna Simeon, Simeon anakna Yehuda, Yehuda anakna Yusuf, Yusuf anakna Yonam, Yonam anakna Elyakim,

³¹Elyakim anakna Melea, Melea anakna Mina, Mina anakna Matata, Matata anakna Natan, Natan anakna Daud,

³²Daud anakna Isai, Isai anakna Obed, Obed anakna Boas, Boas anakna Salmon, Salmon anakna Nahason,

³³Nahason anakna Aminadab, Aminadab anakna Admin, Admin anakna Arni, Arni anakna Hezron, Hezron anakna Peres, Peres anakna Yehuda,

³⁴Yehuda anakna Yakub, Yakub anakna Ishak, Ishak anakna Abraham, Abraham anakna Terah, Terah anakna Nahor,

³⁵Nahor anakna Serug, Serug anakna Rehu, Rehu anakna Peleg, Peleg anakna Eber, Eber anakna Salmon,

³⁶Salmon anakna Kenan, Kenan anakna Arpakhsad Arpakhsad anakna Sem, Sem anakna Nuh, Nuh anakna Lamekh,

³⁷Lamekh anakna Metusalah, Metusalah anakna Henokh, Henokh anakna Yared, Yared anakna Mahalaleel, Mahalaleel anakna Kenan,

³⁸Kenan anakna Enos, Enos anakna Set, Set anakna Adam, Adam anakna Puang Allata'alla.