Read Mamasa Lukas 4 Bible Online

Lukas 4 - Mamasa bible

Lukas 4

¹Naluangmi Penawa Masero Puang Yesus anna tettei umpellei Salu Yordan lu lako padang alla'.

²Torromi dio appa' tapulo bonginna nasudi ponggawana setang. Pempon saena lako padang alla', ta'mo dengan ummande napolalan tadea'mo.

³Ma'kadami ponggawana setang lako Puang Yesus nakua: “Ianna Anakna tongangko Puang Allata'alla, suai inde mai batue mendadi roti!”

⁴Natimba' Puang Yesus nakua: “Dengan tiuki' illalan Buku Masero nakua: ‘Tangngia angga roti la napotuo ma'rupa tau.’ ”[6]

⁵Umbawaimi Puang Yesus ponggawana setang langngan angngenan malangka' anna paitaii sappalli' angganna kaparentaan illalan lino,

⁶anna kuanni: “Angganna te mai kakuasaan sitonda kamatandeannae mangka asammi dipalessu' rokko lisu pala'ku. La kupalulakomi kalemu annu kao pawa benna la kubengan.

⁷Ianna mupenombaina' Iko asammo la ummampuii.”

⁸Natimba' Puang Yesus nakua: “Dengan tiuki' illalan Buku Masero nakua: ‘Penombaiko Puang Allata'alla Dewatammu anna angga ia la mupengkaolai.’ ”

⁹Mangkai, ussolammi Puang Yesus lako Yerusalem anna payaoi bubungan Banua Ada'na Puang Allata'alla anna kuanni: “Ianna Anakna tongangko Puang Allata'alla, dondonangko kalemu rokko

¹⁰annu dengan tiuki' illalan Buku Masero nakua: La ussua malaeka'na Puang Allata'alla undagai manappako,

¹¹anna natimangko diong napolalan tae' titumbu lentekmu lako batu.’ ”

¹²Natimba' Puang Yesus nakua: “Dengan duka' tiuki' illalan Buku Masero nakua: ‘Dau ammu sandak-sandak Puang Allata'alla Dewatammu.’ ”

¹³Mangka asanni Umpalako passudianna ponggawana setang, umpelleimi Puang Yesus anna ummampai attu maliwang.

¹⁴Nakuasaimi Penawa Masero Puang Yesus anna ma'pasule lako Galilea. Silelemi kareba diona pengkaranganna Puang Yesus dio lembang iatoo.

¹⁵Ulleleammi banua pa'sambayanganna to Yahudi ma'pa'guru anna naporai angganna tau.

¹⁶Mangkai too, lu lakomi Nazaret Puang Yesus, angngenan dingei umpakamaii. Nalambi'i allo katorroan, tamami banua pa'sambayanganna to Yahudi, susi beasa sinapogau'. Ke'de'mi illalan la umbaca Buku Masero.

¹⁷Dibengammi sura'na nabi Yesaya. Nabillangmi, napolalan ullambisan battakada nakua:

¹⁸“Naluangna' Penawa Maserona Dewata, annu mangkamo' nabassei bayu-bayu la umpalanda' Kareba Kadoresan lako to mase-mase. Anna nasuana' umpa'peassakan kadirappanananna to disakka, kamalapusanna to buta, anna urrappanan to dianda'i onggo'-onggo'na,

¹⁹anna umpa'peassakan kumua nalambi'mi attunna la umpakawanan pa'kamasena Dewata lako ma'rupa tau.”[7]

²⁰Ullulummi sule inde sura'e anna beenni lako to simengkarang illalan banua pa'sambayangan anna mane ma'loko. Nasinenne'-nenne'imi tau illalan pa'sambayangan.

²¹Naparandukmi ma'pa'guru Puang Yesus nakua: “Allo temo murangnginna inde battakadae lemba'mi issinna.”

²²Natula' mapia asammi tau anna mangnga-mangnga urrangngii annu maleke sambakan kadanna. Nakuamo inde mai taue: “Tangngiaka te anakna Yusuf-e?”

²³Nakuamo Puang Yesus: “Innang la mupokada inde samparan kada lako kalekua'e kumua: ‘O tuandotto' pomalapu'ko kalemu, kalembasanna pogau'i duka' inde tondokmu tanda memangnga-mangnga kirangngi mangka mupogau' dio Kapernaum.’ ”

²⁴Ma'kada pole omi Puang Yesus nakua: “Kupokadangkoa' sitonganna, tae' dengan nabi diangga' dio tondokna.

²⁵Innang manassa te tula'kue: Attunna nabi Elia, dengan pissan attu kulla' allo tallu taun annan bulanna lambisan kendek karorian salembang Israel. Buda baine balu dio Israel attu iatoo

²⁶sapo ta'ra ia disua Elia lao umpellambi'i mesa baine balu dio Israel, sangngadinna disua lao umpellambi'i baine balu dio Sarfat, illalan lembangna Sidon.

²⁷Susi toi duka' anna attunna nabi Elisa, buda to dolengan dio Israel tae' duka' dengan moi mesamo napomalapu' salianna Naaman to lu dio mai Siria.”

²⁸Urrangnginna tula'na Puang Yesus, keara' asammi tau illalan inde pa'sambayanganne.

²⁹Ke'de' asammi anna urrambai Puang Yesus lako salian tondok anna baai lako palimping dio sa'de tondok la nasulunan rokko.

³⁰Sapo umpa'tangngai tau buda Puang Yesus anna le'ba umpelleii.

³¹Mangkai too, le'bami Puang Yesus rokko kota Kapernaum dio Galilea anna umpa'guru tau ke nalambi' omi allo katorroan.

³²Mangnga-mangnga asan tau urrangngi pepa'guruanna annu sitonda kakuasaan tula'na.

³³Illalan inde pa'sambayanganne dengan mesa to natamai setang. Inde taue meoli-oli nakua:

³⁴“Yesus to Nazaret, la muakakanni? La saerokoka untallannikan? Kuissanan kumua To Maseroko lu yao mai Puang Allata'alla.”

³⁵Sapo tappa nasadangngi Puang Yesus nakua: “Kamma'ko, mallaiko illalan mai kalena itin tauo.” Umpessambakammi inde tau rokko litak illalan alla'-alla'na tau budae anna mane mallai sapo tae' sia nasanggangngi.

³⁶Mangnga-mangnga asammi tau, napolalan sipantula'tula' nakua: “Battakada akamoa' te sanganna anna mala ussua lao setangnge? Inde battakadae sitonda kakuasaan anna kamatoroan.”

³⁷Silelemi kareba diona pengkaranganna Puang Yesus dio lembang iatoo.

³⁸Mangkai too, suummi Puang Yesus illalan mai banua pa'sambayangan anna le'ba lako banuanna Simon. Attu iatoo makula' matukanna Simon baine. Napelaumi to dio reen lako Puang Yesus kenamala napomalapu'.

³⁹Leba'mi lako sa'de mammasanna inde bainee ke'de' anna suai lao sakinna. Monda siami sakinna napolalan millik anna untarakanni to saena.

⁴⁰Lendu'i allo, sasaeammi tau pantan ussolaan to masaki, ma'rupa-rupa sakinna. Narisimi Puang Yesus naanda'i lambisan malapu' asan.

⁴¹Susi duka' to natamai setang, mallai asan setang illalan mai kalena napasiolaan kumillong-killong nakua: “Anakna tongangko Puang Allata'alla!” Sapo nasadangngi Puang Yesus anna tae' napabeai mantula' annu naissanan asammi kumua To dibassei bayu-bayu la ma'pasalama'.

⁴²Masiangna mengkalaomi Puang Yesus lako mesa angngenan maitu-itu. Sapo nasipeang-peangngi tau buda napolalan nalambi'. Umpeangmi lalan anna malara tae' napellei Puang Yesus.

⁴³Sapo ma'kada Puang Yesus nakua: “Kareba Kadoresan diona kaparentaanna Puang Allata'alla innang la kupalanda' duka' lako tondok senga' annu iamo nangei ussuana' Puang Allata'alla tama lino.”

⁴⁴Ulleleammi pa'sambayanganna to Yahudi Puang Yesus dio lembangna Yudea ma'pa'guru.