Read Mamasa Yohanes 1 Bible Online

Yohanes 1 - Mamasa bible

Yohanes 1

¹Bunga'-bunga'na, ta'pa dikombong inde linoe, innang dengammi to digente' Battakada. Inde Banakadae sola Puang Allata'alla anna ia siamo Puang Allata'alla.

²Innang siba'ba'mi Puang Allata'alla mengkalao dio mai.

³Angga lako napadadi Puang Allata'alla ummolai Battakada. Anggana dionamo reen, tae' la mala dadi ke tae' ummolai Battakada.

⁴Inde Battakadae iamo to'na katuoan anna inde katuoanne iamo kamasiangan ummarrang ma'rupa tau.

⁵Kamasiangan iatoo pangngarrang illaan kamalillinan anna tae nabela napi'dean kamalillinan.

⁶Tapakala saemo mesa tau nasua Puang Allata'alla disanga Yohanes,[1]

⁷la umpalanda' kareba diona inde kamasianganne anna malara naorean rupa tau.

⁸Inde Yohanes-e tangngia to digente' kamasiangan sapo to umpalanda' kasa'bian diona inde kamasianganne.

⁹Annu kamasiangan tongan la ummarrang ma'rupa tau mane la sae.

¹⁰Inde Battakadae innang illalammi lino. Sapo tae' naissanan ma'rupa tau moika anna ummolai inde Battakadae Puang Allata'alla umpadadi lino.

¹¹Sae umpellambi'i lembangna sapo nasumbala satondokna.

¹²Sapo' dengan duka' tau untarimai anna ummoreanni. Inde mai taue napopendadi anakna Puang Allata'alla.

¹³Tae' nadadian ummolai kasipobainean susi kasipobaineanna ma'rupa tau, tangngia toi situru' pa'kuanna ma'rupa tau sapo situru' pa'kuanna Puang Allata'alla napolalan napopendadi anakna.

¹⁴Inde Battakadae mangka mendadi rupa tau anna torro illaan alla'-alla'na ma'rupa tau anna kikawanammo kamatandeanna. Inde kamatandeanne nabenganni Ambena annu iamo Anak mesanna. Iamo tapolalan ungkaleso Puang Allata'alla sola pa'kamasena lako kaleta.

¹⁵Umpalanda'mi kasa'bianna Yohanes diona inde Battakadae, nakua: “Iamo te to sikupokadae, kumua: ‘Dengan la sae windingku sapo marru matande ia anna kao, anna ta'pakkao dadi anna innang diomo ia reen.’ ”

¹⁶Tadiissan dianggai pa'kamasena napolalan tae' dengan kattu pa'tamba'na lako kaleta.

¹⁷Musamo nasua Puang Allata'alla umpalandasangki' parentana, sapo kamatutuanna anna pa'kamasena Puang Allata'alla takawanan illaan kalem Yesus Kristus.

¹⁸Tae' dengan tau mangka ummita Puang Allata'alla salianna Anak mesanna, To nasirantean, To sisola liu Ambena. Iamo umpakawanan Puang Allata'alla lako kaleta.

¹⁹Susi inde kasa'bianna Yohanes e anna sae pira-pira imam sola peampoanna Lewi[2] nasua perepi'na to Yahudi dio mai Yerusalem, mekutana lako nakua: “Bennaroko iko tee?”

²⁰Mangngakumi Yohanes tala nagaraga-ragai nakua: “Tangngiana' To dibassei bayu-bayu la ma'pasalama'.”

²¹Nakutanai pole omi nakua: “Bennaroko iko? Eliarokoka?” Natimba' nakua: “Tangngia.” Mekutana pole omi nakua: “Ikomoka nabi to diampai?”[3] Natimba' nakua: “Tangngia.”

²²Nakutanai polemi nakua: “Bennanna tappa'roko iko, annu' la kiissan kipalanda' lako to ussuakan. Tulasangkan sitonganna tappa'ko.”

²³Natimba' Yohanes nakua: “Kaomo te to metamba-tamba dio padang alla'e kumua maloloananni lalan Dewatanta.” Situru' kadanna nabi Yesaya.[4]

²⁴Inde to disuae dengan pira-pira to Farisi,

²⁵mekutam nakua: “Maakari ammu mantedok anna tangngiako para To dibassei bayu-bayu la ma'pasalama', tangngiako Elia, anna tangngiako nabi to diampai?”

²⁶Natimba'mi Yohanes nakua: “Wai kao kupopantedok. Sapo dengan illaan alla'-alla'mua' to tamuissanan.

²⁷Windi ia sae anna kao sapo moi angga pepori palopakna la kubukaianni tae' tona' la sipato'.”

²⁸Kara-kara iatee dadi dio Betania, tandai lianna Salu Yordan sinangei mantedok Yohanes.

²⁹Masiangna polei, naitami Yohanes sae Puang Yesus umpellambi'i. Ma'kadami Yohanes nakua: “Petua'mia', iamo te Anak Dombana Puang Allata'allae To la umpa'dei kasalaanna ma'rupatau.

³⁰Iamo napatu tula'ku kumua: ‘Dengan la sae windingku, sapo marru matande ia anna kao annu innang diomia reen angku mane kao dadi.’

³¹Ambo' tae' kuissanan kumua iamo To dibassei bayu-bayu la ma'pasalama', moi kenada iamo kungei sae umpopantedok wai anna malara naissanan to Israel.”

³²Sitarru'na kasa'bianna Yohanes nakua: “Attu iatoo ta'pa kuissanan kumua iamo To dibassei bayu-bayu la ma'pasalama'. Sapo mangka ma'kada lako kaleku Puang Allata'alla to ussuana' umpopantedok wai kumua: ‘Ianna ummitako mesa tau sae narampoi Penawa Maserona Puang Allata'alla, tau iamo too la umpopantedok Penawa Masero.’[5] Tapakala kuitamo Penawa Masero turun yao mai langi' susi dangan-dangan urrampoi Puang Yesus.

³³

³⁴Melolomo' ummitai anna kupa'pesa'biammo kumua iamo Anakna Puang Allata'alla.”

³⁵Masiangna pole oi, dio omi angngenan iatoo Yohanes sola dua passikolana.

³⁶Tappana ummita Puang Yesus liu, ma'kada siami Yohanes nakua: “Itamia' Anak Dombana Puang Allata'alla.”

³⁷Inde kadanna Yohanes-e narangngi dua passikolana napolalan mengkalao ummula' Puang Yesus.

³⁸Messaile Puang Yesus lako boko'na, naitami naula' indu passikolae. Nakutanaimi nakua: “Akaraikoa' mupeang?” Natimba' nakua: “O Rabi, umbaraiko mungei torro?” (Rabi kalembasanna tuangguru).

³⁹Natimba' Puang Yesus nakua: “Maimokoa' ammu itaii.” Le'ba' tongammi sola napolalan naita angngenanna. Attu iatoo umbai la tettek appa'mo karuen, torropi sola Puang Yesus sae lako bongi.

⁴⁰Inde passikola to urrangngi tula'na Yohanes anna unturu' Puang Yesus-e, disanga Andreas mesa, sirondongna Simon Petrus.

⁴¹Le'ba siami lao umpeang Simon Petrus anna kuanni: “Silambi'mokangkami Mesias.” (Mesias, kalembasanna Kristus illaan basa Yunani.)[6]

⁴²Nasolaammi Andreas lao umpellambi'i Puang Yesus. Nenenne'imi Puang Yesus anna kuanni: “Iko Simon anakna Yohanes,[7] la disangamoko Kefas.” (Kefas, illaan basa Yunani disanga Petrus.)[8]

⁴³Makale'na, napatantumi Puang Yesus la lu lako Galilea. Umpellambi'imi Filipus anna kuanni: “Maiko ammu turu'na'.”

⁴⁴Inde Filipus-e to lu dio mai Betsaida tondok kadadianna Andreas sola Petrus.

⁴⁵Laomi Filipus umpellambi'i Natanael anna kuanni: “Silambi'mokangkami to sinatula' Musa illaan sura' pepa'guruanna anna sinapa'paissanan angganna nabi. Inde taue disanga Yesus, anakna Yusuf to Nazaret.”

⁴⁶Ma'kada Natanael nakua: “Dengangka leleanna to mapia la buttu dio mai tondok Nazaret?” Natimba' Filipus nakua: “Maimoko ammu itai.”

⁴⁷Naitanna Puang Yesus sae Natanael umpellambi'i, ma'kadami untula' Natanael nakua: “Itamia' inde to Israel tonganne, to tama'dua tambuk.”

⁴⁸Ma'kadami Natanael lako Puang Yesus nakua: “Umba nakua ammu issananna'?” Natimba Puang Yesus nakua: “Ta'poko natambai Filipus angku itamoko dio to' ara.”

⁴⁹Nakuamo Natanael: “O Tuangguru, Anaknako Puang Allata'alla! Tomarayanna tongammoko to Israel!”

⁵⁰Natimba' Puang Yesus nakua: “Muoreammi annu' mangkako kutulasan kumua kuitako dio to' ara. La dengan polepi kara-kara kamai la muita.

⁵¹La ummitako langi' titungki' anna malaeka'na Puang Allata'alla la ma'turun teka' umpellambi'i Anak Mentolino. Iate tula'kue tonganna.”