Read Mamasa Yohanes 12 Bible Online

Yohanes 12 - Mamasa bible

Yohanes 12

¹Annampi bonginna anna mane nalambi' allo Paskah anna saemo Puang Yesus lako Betania tondokna Lazarus, to mangka napatuo sule.

²Ditosaemi dio natarakanni Marta. Dio duka' reen Lazarus ummande sola Puang Yesus.

³Saemi Maria umbaa minna'-minna' masulli' allinna, disanga minnak narwastu umbai sitangnga lite'. Umbolloimi lentekna, Puang Yesus anna mane passii beluakna. Titumpan siami bumanangnga' ponno banua.

⁴Ma'kadami mesa passikolana Puang Yesus disanga Yudas Iskariot (to la umpa'perososan Puang Yesus), nakua:

⁵“Maakari anna tae' dibaluk tallu ratu' pera'[24] itin minna'-'minna'o anna ditawaian to mase-mase allinna?”

⁶Sitonganna tangngia to mase-mase napikki' nangei ma'kada susi annu' inde Yudas-e mesa to maboko, tokke' siummala doi' dipada-padai illaan mai angngenan doi' annu ia siummannai.

⁷Nakuamo Puang Yesus: “Parandan mammia' annu napalakomia aka la dipogau' ke dilamunna'.

⁸La sola liukoa' ia to mase-mase sapo Kao-kao tae'kia' la sola liu.”

⁹Buda to Yahudi umpekarebai kumua diomi Betania Puang Yesus, iamo nangei le'ba'mo lako. Tae' angga Puang Yesus la lao natungka, sapo morai duka' la ummita Lazarus, to napatuo sule Puang Yesus.

¹⁰Ummalami kada situru' kapala imam la umpatei duka' Lazarus

¹¹annu katuoannamo sule napolalan buda to Yahudi umpemboko'i perepi'na anna mangngorean lako Puang Yesus.

¹²Masiangna, nakarebami tau buda to sae umpakaroa' allo Paskah kumua ummola lalammi Puang Yesus la lu langngan Yerusalem.

¹³Pantan ummalami daun sitonda batang susi daun andulan anna lao untammui Puang Yesus napasiolaan sipetamba-tambaan nakua: “Dipakasalle sanganna Puang Allata'alla. Ditamba' to sae umpotendan sanganna Dewata. Ditamba' Tomarayanna to Israel!.”[25]

¹⁴Ummalami mesa keledai mangngura Puang Yesus anna sakeii. Lemba' pole' battakadanna Puang Allata'alla tiuki' illalan Buku Masero nakua:

¹⁵“Daua' marea' anggammu issinna Sion![26] Itamia', saemi tomarayammu ussakei keledai mangngura.”[27]

¹⁶Attu iatoo ta'pa napekalembasan passikolana Puang Yesus inde mai kara-karae sapo mangkanna tuo sule anna diangka' langngan angngenan kamatandean, mane nakilalairi kumua aka napogau' tau lako kalena innang mangkami diuki' illaan Buku Masero.

¹⁷Angganna to dio reen anna untambai Lazarus Puang Yesus illaan mai liang napatuo sule, untula' liu inde kara-karae.

¹⁸Iamo nangei buda sigalimo tau lao untammui Puang Yesus annu narangngimi kumua Puang Yesus-ria umpogau' iato tanda memangnga-mangngao.

¹⁹Sipantula'-tula'mi to Farisi nakua: “Ta'mo diissan aka la dipogau'. Petua'mia' naturu' asammi tau illaan lino.”

²⁰Dengan duka' pira-pira to Yunani lao langngan Yerusalem umpenombai Puang Allata'alla attunna dipakaroa' allo Paskah nasolaan inde mai tau budae.

²¹Inde mai to Yunanie lao umpellambi'i Filipus anna kuanni: “O Tuang, moraikan la silambi' Puang Yesus, ke sia mala.” (Inde Filipus-e to lu dio mao tondok Betsaida dio lembangna Galilea.)

²²Mengkalao siami Filipus lao umpellambi'i Andreas anna pokadanni anna mane lao sola umpellambi'i Puang Yesus anna tulasanni diona pelaunna to Yunani.

²³Nakuamo Puang Yesus: “Nalambi'mi attunna la dipakasalle Anak Mentolino.

²⁴Kupokadangkoa' sitonganna, ianna tae' ditanan rokko litak lise' gandum sirapan to mate la montong liu angga salise', sapo ianna dilamun la kembea'.

²⁵Benna-benna umpakalando katuoanna illaan lino la ungkasayu'i katuoanna. Sapo benna-benna tae' umpakalando katuoan illaan lino, la da'da' ia katuoanna sae lako-lakona.

²⁶Benna-benna morai la kupopengkarang la naturu'na' anna malara umba-umba kungei la sola liukan. Benna-benna kupopengkarang la napakasalle Ambeku.

²⁷Masussa penawangku temo. Akamo la kupokada? La kukuaraka: ‘O Ambe' lappasanna' dio mai kamaparrisan la ullambi'na' temo?’ Sapo iari kungei sae inde lino annu la ullambi'na' inde kamaparrisanne.

²⁸O Ambeku, pakawanammi kamatandeanna sangammu.” Dirangngi siami kamara yao mai langi' nakua: “Mangkami kupakawanan kamatandeangku anna la kupakawanan polepa.”

²⁹Buda to dio reen attu iatoo urrangngi inde kamarae. Dengammi ungkuai: “Guntu'!” Sapo dengan duka' kumua: “Tangngia! Malaeka' umpantula'i!”

³⁰Nakuamo Puang Yesus lako inde tau kambanne: “Inde kamara murangngia'e tangkao napatu, sapo ikoa'.

³¹Temo nalambi'mi attunna la dibisara issinna lino. Nalambi'mi attunna la dirambai lao ponggawana setang to ungkuasai lino.

³²Anna la urruntu'nakkao angganna ma'rupa tau[28] lako kaleku ke mangkamo' ditandean illaan lino.”

³³Ia nangei mantula' susi Puang Yesus annu la naola umpa'peissanan umba la nakua kamateanna ke dako'.[29]

³⁴Nakuamo inde tau budae: “Dengan tiuki' illaan Buku Masero kumua, To dibassei bayu-bayu la ma'pasalama' la tuo sae lako-lakona. Maakari anna mukua Anak Mentolino innang la ditandean illaan lino?[30] Benna dikuan Anak Mentolino?”

³⁵Natimba' Puang Yesus nakua: “Ta'mo la masae torro kamasiangan illaan alla'-alla'mua'. Iamo too penono'mokoa' pakale pa'de kamasiangan indana lambi'koa' kamalillinan, aka benna menono' illaan kamalillinan tae' la naissanan naolanna.

³⁶Oreangkoa' inde kamasianganne bayuammu salopa lakoa' ammu malara digente' to nakala' kamasiangan.” Mangkanna mantula' Puang Yesus, le'ba'mi umpellei angngenan iatoo anna ta' opa naaku umpa'paitaan kalena lako tau kamban.

³⁷Moika anna budamo tanda memangnga-mangnga napogau' Puang Yesus dio tingngayona to Yahudi, sapo tae' ummorean Puang Yesus

³⁸anna malara lemba' kadanna nabi Yesaya nakua: “O Puang, bennamo la ummorean inde kareba kipalanda'e? Bennamo la dipaitai kakuasaammu?”[31]

³⁹Iamo nangei tae' nabela mangngorean annu mangka duka' napokada nabi Yesaya nakua:

⁴⁰“Ma'kada Puang Allata'alla nakua: ‘Kubutai matanna sola kupomakarrasan penawanna, anna malara tala paita matanna tala ma'paleang pikki'na, indana ma'pasulemo lako kaleku napolalan kupomalapu'.’ ”[32]

⁴¹Ia nangei mantula' susi Yesaya annu mangkami ummita kamatandeanna Puang Yesus anna napokada yolomo.

⁴²Sapo buda siami duka' perepi'na to Yahudi mangngorean lako Puang Yesus. Sapo moka umpa'manta-mantanni annu marea' lako to Farisi indana ta'mo natangga' tama pa'sambayanganna to Yahudi.

⁴³Annu umpakalando ia pantayukan dio mai ma'rupa tau anna la pantayukan yao mai Puang Allata'alla.

⁴⁴Mangkai too napemanduimi Puang Yesus ma'kada, nakna: “Benna-benna mangngorean lako kaleku ummorean duka' to ussuana'.

⁴⁵Anna benna-benna ummitana', ummitami to ussuana'.

⁴⁶Saena' tama lino sirapan kamasiangan anna malara angganna to mangngorean lako kaleku tae' la torro illaan kamalillinan.

⁴⁷Ianna dengan tau umperangngii tula'ku sapo tae' napalako, tangkao la umpabambanni sangka'. Anna tae'nakkao la sae umpabambanni sangka' ma'rupa tau illaan lino sapo la kupasalama'.

⁴⁸Benna-benna untumpu pala'na' anna tae' umperangngii battakadangku, dengammi la umpabambanni sangka' ke tallanni lino, iamo battakada mangka kupalanda'.

⁴⁹Annu inde mai tula' kupokadae, tangngia pa'kuangku sapo pa'kuanna Ambeku to ussuana'. Ambekumo umparentana' umpokadai la sipato'na kutula' anna kupalanda'.

⁵⁰Anna kuissanan kumua, inde parentanae la umpatettekoa' lako katuoan sae lako-lakona. Dadi angganna tula' kupalanda' situru' battakadanna Ambeku lako kaleku.”