Read Mamasa Yohanes 8 Bible Online

Yohanes 8 - Mamasa bible

Yohanes 8

¹Anggaria Puang Yesus, lu langngan ia Tanete Zaitun.

²Masiangna, mebongngi'mi tama Banua Ada'na Puang Allata'alla. Buda omi tau sae umpellambi'i. Ma'lokomi Puang Yesus anna ma'pa'guru.

³Tapakala, saemo to untarru' issinna sura'na Musa anna to Farisi umbaa mesa baine to nalambi' ullullu' pa'bannetauan. Ussuami inde bainee ke'de' dio tingngayona tau buda

⁴anna ma'kada lako Puang Yesus nakua: “O tuangguru, inde bainee kilambi' ullullu' pa'bannetauan.

⁵Situru' pepa'guruanna Musa, iate baine susie la disileba-leba'i batu sabonno'na. Umbu Iko nakua pikki'mu?”

⁶Iate nangei mekutana susie annu la ullilingan tangnga' Puang Yesus. Sapo angga lumbang Puang Yesus anna umpopangnguki' tarunona rokko litak.

⁷Inde anna menge liumo nasasunanne, ke'de'mi Puang Yesus anna ma'kada nakua: “Bennakoa' ussanga kalemu tae kasalaan ikomoa' yolo ulleba' itin baineo.”

⁸Mangkai mantula' tadangkami Puang Yesus anna mangnguki' rokko litak.

⁹Urrangninna tula'na Puang Yesus, le'ba simesami napollo' dio to matua. Lambisan angga mandami Puang Yesus torro sola inde bainee ke'de' liu dio angngenanna.

¹⁰Ke'de'mi Puang Yesus anna ma'kada nakua: “Umba asammo naola itin matin tauo? Tae'ka dengan umpasalako?”

¹¹Natimba' inde bainee nakua: “Tae' dengan, tuang.” Nakuamo Puang Yesus: “Tae'ko duka' la kupasala. Laomoko ammu dau umpogau' llu kasalaan.”]

¹²Ma'kada omi Puang Yesus lako tau buda nakua: “Kaomo te kamasianganna linoe. Benna-benna unturu'na' ta'mo la nakala' kamalillinan, sapo la ummampuimi kamasiangan la napolalan ullolongan katuoan.”

¹³Natimba' to Farisi nakua: “Itin kasa'biammuo tae' mala diorean annu kalemu siamo mutetteran.”

¹⁴Natimba' duka' Puang Yesus nakua: “Moi Kao siamo unpokanda kaleku sapo tonganna annu kuissanan umba kungei buttu anna umba la kuola ke dako'. Tae' iko muissanan umba kungei buttu anna umba la kuola ke dako'.

¹⁵Umbisarakoa' iko tau situru' pikki' rupa taummu, sapo tae' Kao dengan tau kubisara.

¹⁶Sapo la rapanni dengan tau kubisara innang la malolo sia pa'parokkoku annu taena' mesa sapo nasolaanna' Ambeku to ussuana'.

¹⁷Nakua illaan sura'na Musa simuturu'a': Ianna duamo tau siundu' kasa'bianna, malami diorean.

¹⁸Anna duamo to ussa'biina', Kao siamo anna Ambeku to ussuana'.”

¹⁹Nakuamo inde mai taue: “Umbara Iko nangei Ambemu?” Natimba' Puang Yesus nakua: “Kao anna tae'na' muissanan la Ambekumo. Ia kela muissananna' la ummissanangkoa' duka' Ambeku.”

²⁰Angganna te maie natula' Puang Yesus anna ma'pa'guru illaan Banua Ada'na Puang Allata'alla dio sa'dena patti pemalasan. Sapo tae' dengan tau ussakkai annu ta'pa nalambi' attunna.

²¹Ma'kada pole omi Puang Yesus lako nakua: “La mupeangna' annu la le'bana' sapo la tontong liukoa' iko umpogau' kasalaan lambisan dipasilamungkoa' kasalaammu. Tae'koa' mala sae lako angngenan la kuolanna.”

²²Nakuamo perepi'na to Yahudi: “Umbai la mentuyo, annu nakua: ‘Tae'koa' mala sae lako angngenan la kuolanna.’ ”

²³Ma'kadami Puang Yesus lako nakua: “Lemba' diongkoa' iko mai anna lemba' yaonakkao mai. Lu illalangkoa' iko mai inde linoe anna lu yaonakkao mai suruga.

²⁴Iamo kungei ma'kada lako kalemua' kumua la tontong liukoa' iko umpogau' kasalaan lambisan dipasilamungkoa' kasalaammu. Innang la pasilamun tongangkoa' kasalaammu ke tae' muorean kumua: “Kaomo to digente' To innang dio reen’.”

²⁵Mekutanami inde mai taue nakua: “Benna tappa'roko Iko?” Natimba' Puang Yesus nakua: “Ta'mo dengan gunana la kutula' liu matin.

²⁶Budapi la mala kutula' anna kupasalangkoa'. Sapo anggami tula' kurangngi dio mai To ussuana' kupalanda' lako ma'rupa tau, annu' inde To ussuana'e iamo To sipato' diorean.”

²⁷Tae' naissanan inde mai taue kumua Ambenaria marassan natula'.

²⁸Mantula' pole omi Puang Yesus nakua: “Ianna untandeammokoa' Anak Mentolino ke dako',[20] mane la muissanarria' pole' kumua Kaomo to digente' ‘To Innang Dio Reen.’ Anna la muissanammoa' duka' kumua tae' dengan aka kupalako situru' pa'kuangku. Anggami pa'patudunna Ambeku kutula'.

²⁹Inde To ussuana'e sola liukan, tae'na' napamesa-mesa annu angga la napomasannangna kupalako.”

³⁰Marassanni te mai natula' Puang Yesus-e, budami duka' tau ummoreanni.

³¹Ma'kadami Puang Yesus lako to Yahudi to ummoreanni, nakua': “Ianna umpentoe tongangkoa' pepa'guruangku, to unturu' tongammokoa' boko'ku.

³²La ummissanammokoa' pepa'guruan tongan anna iamoa' la mupolalan dilappasan.”

³³Natimba' inde mai taue nakua: “Kami te maie, peampoannakan Abraham. Ta'pakan dengan naposabua' tau. Akamo kalembasanna tula'mu kumua la dilappasangkoa'i?”

³⁴Natimba' Puang Yesus nakua: “Sitonganna benna-benna umpogau' kasalaan, naposabua' kasalaan.

³⁵Anna mesa sabua' tae' la tontong angngenanna illaan kasarapuanna to umposabua'i. Sapo ianna anak dadian innang la tontong angngenanna illaan kasarapuan.

³⁶Dadi ianna Anaknamo Puang Allata'alla ullappasangkoa', manassa lappa' tongan-tongammokoa'.

³⁷Kuissanan kumua peampoannakoa' Abraham, sapo moraikoa' la umpateina' annu' mokakoa' umperangngii pepatudungku.

³⁸Iamo kuita lako Ambeku, iamo kutulasangkoa', sapo pepatudunnaria' iko ambemu mupalako.”

³⁹Natimba' inde mai taue nakua: “Abraham kami ambeki.” Nakuamo Puang Yesus: “Ia kela anakna tongangkoa' Abraham, innang la muturu'a' pa'palako'na.

⁴⁰Kutulasangkoa' pepa'guruan tongan kurangngi dio mai Puang Allata'alla, sapo moraikoa' la umpateina'. Sisala te pa'palakona Abraham-e!

⁴¹Pa'palakona siamo iko duka' ambemua' mupogau'.” Natimba' duka' inde to Yahudie nakua: “Tangngiakan kami anak bule. Angga mesa ambeki iamo Puang Allata'alla.”

⁴²Ma'kada Puang Yesus lako nakua: “Ia kela Puang Allata'alla tongan ambemua', la mukamaseina' annu to lu yaona' mai Puang Allata'alla. Tangngia pa'kuangku kupolalan sae, sapo nasuana' Puang Allata'alla.

⁴³Ia mungei tae' umpekalembasan tula'ku annu tae'a' mutaro urrangngi pepa'guruangku.

⁴⁴Ponggawana iko setang ambemua', anna anggamo pa'porainna mupogau'. Mengkalao dio mai, innang to papatean ia ponggawana setang. Tae' ia dengan ke'de' dio katonganan annu innang tae' dengan katonganan illaan kalena. Sipato' ia umpokada tula' tatongan, annu innang sipa'namo susi. Tae' ia dengan sitonganna napokada annu iamo kabuttuanna angganna tula' tatongan.

⁴⁵Sapa tula' tongan Kao kupokada, iamo mungei tae ummoreanna'.

⁴⁶Bennakoa' mala unturoanna' kasalaangku? Ianna kupokadangkoa' tula' tongan, maakari anna tae'na' muorean?

⁴⁷Angganna to napoanak Puang Allata'alla umperangngii battakadanna Puang Allata'alla. Sapo tangngiakoal iko to napoanak Puang Allata'alla, iamo nangei tae' muaku muperangngii battakadanna.”

⁴⁸Ma'kadami inde mai to Yahudi lako Puang Yesus-e nakua: “Tonganna tula'ki kumua to Samariako,[21] to natamaiko setang.”

⁴⁹Natimba' Puang Yesus nakua: “Tae'nakkao natamai setang. Umpomatanderakkao Ambeku sapo mutellena'.

⁵⁰Tangngia Kao kamatandeangku kupeang, dengan Kao to umpeanganna' kamatandean anna iamo to ma'bisara.

⁵¹Sitonganna angganna to unturu' battakadangku, ta'mo la mate.”

⁵²Nakuamo inde mai to Yahudie: “Kiissanan tappa' pole' temo kumua natamaiko setang! Annu Abraham anna mangkamo bonno', susi toi duka' angganna nabi. Sapo mukua iko ‘Angganna to unturu' battakadangku ta'mo la mate.’

⁵³La marru ma'tandalangnganangkoka Iko anna ambeki Abraham? Annu mangkamia bonno' Abraham sola angganna nabi. Benna Iko musangaian kalemu?”

⁵⁴Natimba' Puang Yesus nakua: “Ianna Kao siamo la untandean kaleku, innang tae' la ma'guna. Sapo Ambekuri Kao untandeanna' to simukuanna' Dewatangki

⁵⁵sapo' tae' muissanan. Kuissanan Kao, ianna kukua tae' kuissanan to tamantula' tonganna' susikoa'. Kuissanan Kao Ambeku anna kuturu' angganna battakadanna.

⁵⁶Masannang ia Abraham, ambemua' annu naissanan kumua la ummita allo kasaeangku, anna dore'mo temo annu naitamo'!”

⁵⁷Ma'kada inde mai to Yahudie nakua: “Umba mukua la ummita Abraham anna ta'pa ganna' lima pulo taummu temo?”

⁵⁸Natimba' Puang Yesus nakua: “Kupokadangkoa' sitonganna, ta'pa ia dadi Abraham innang diomokkao reen.”

⁵⁹Tappana urrangngi tula'na Puang Yesus, ummala siami batu inde mai' to Yahudie anna la ussileba'-leba'i Puang Yesus. Sapo membuni Puang Yesus anna le'ba umpellei Banua Ada'na Puang Allata'alla.