Read Mamasa Kisah Para Rasul 11 Bible Online

Kisah Para Rasul 11 - Mamasa bible

Kisah Para Rasul 11

¹Urrangngimi duka' kareba angganna rasul sola to mangngorean dio lembangna Yudea kumua buda mi tau senga' salianna to Yahudi untarima battakadanna Puang Allata'alla.

²Iamo nangei napasalamo to Yahudi to mangngoreammo Petrus anna sae lako Yerusalem,

³nakua: “Maakari ammu tama banuanna tau senga' salianna to Yahudi lambisan ummandeko sola?”

⁴Naparanduk pole' Petrus ummulelean aka mangka dadi mengkalao dio pa'parandukanna, nakua:

⁵“Marasanna ma'sambayang dio Yope, tokke'mokkao taman. Kuitami dengan aka susi sampan kallumbang disangke' appa' kate tukna, dilolloran yao mai langi' tiranduk dio tingngayoku.

⁶Kupengka'da'imi kupolalan ummita ma'rupa-rupa olo'-olo' ma'lentek appa', olo'-olo' malaria, olo'-olo' sumasa', anna ma'rupa-rupa dassi.

⁷Kurangngimi kamara nakua: ‘O Petrus, ga'gelako, ammu tunui ammu andei.’

⁸Sapo' kutimba' kukua: ‘O Puang, tae' sigali-gali mala, aka pempon dadingku ta'pa dengan leleanna kupatama sadangku Andean pemali diande.’

⁹Ma'kada pole omi inde kamara yao mai langi'e nakua: ‘Dua angga' pemalii Andean tae' napemalii Puang Allata'alla diande.’

¹⁰Pentallun te Susie anna mane tiangka' asan sule langngan langi'.

¹¹Attu iatoo saemi tallu dau dio banua kingie torro. Inde taue disua dio mai Kaisarea sae untambaina'.

¹²Kurangngimi kamara nakua: ‘Dau pomabanda' penawammu lao sola.’ Inde annan siulu'tae kusolaan lako banuanna Kornelius.

¹³Natulasammokan umba nakua mesa malaeka' tokke' ke'de' illalan banuanna anna ma'kada lako nakua: ‘Suai tau lako Yope untambai mesa tau disanga Simon sidikuan Petrus.

¹⁴Annu la natulasangkoa' kareba la umpasalama'ko sola angganna tau illalan banuammu.’

¹⁵Kuparandukna mantula' turummi Penawa Masero umpentamai asan inde taue susi dadi lako kaleta yolona.

¹⁶Tappa kukilalaimi tula'na Puang Yesus nakua: ‘Wai ia napake mentedok Yohanes, sapo' Penawa Masero ikoa' la ditedokangko.’

¹⁷Dadi, tae' dengan lalangku la undapai Puang Allata'alla kela umpebeenni Penawa Maserona lako tau senga' salianna to Yahudi susi anta mane ummoreanna' Puang Yesus Kristus yolona.”

¹⁸Tappana urrangngi tula'na Petrus mattan asan pole' penawanna anna umpakasalle Puang Allata'alla nakua: “Napabeai duka' Puang Allata'alla tau senga' salianna to Yahudi mengkatoba' napolalan ullolongan katuoan sae lako-lakona.”

¹⁹Mangkanna dipatei Stefanus kendekmi pandarraan napolalan tisembu' angganna to mangngorean; dengan lu lako Fenisia, lako Siprus, anna dengan lu lako Antiokhia. Tontong liu umpalanda' Kareba Kadoresan sapo' anggami lako to Yahudi.

²⁰Sapo' inde mai to mangngoreanne dengan duka' to lu dio mai Siprus anna Kirene sae lako Antiokhia umpalanda' Kareba Kadoresan untetetteran Puang Yesus lako tau senga' salianna to Yahudi.

²¹Tontong liu nasolaan Puang Allata'alla napolalan tuttuan buda tau mangngorean anna unturu' Puang Yesus.

²²Napelele duka' to mangngorean dio Yerusalem kadadian dio Antiokhia, napolalan ussuamo Barnabas lako.

²³Inde Barnabase mesa to malolo anna to nakuasai Penawa Masero anna to lantuk mangngorean. Saei lako dore'mi ummita tamba'na Puang Allata'alla lako to dio Antiokhia. Napakari'di'mi kenamala tontong liu mentoe manda' mengnganti matoto' illalan kapangngoreananna lako Puang Yesus. Tuttuan budami tau mangngorean langngan Puang Yesus.

²⁵Mangkaii, lu lakomi Tarsus Barnabas umpeang Saulus.

²⁶Silambi'i, nasolaammi sae dio Antiokhia. Torromi dio Antiokhia sataun anna sima'rempun sola angganna to mangngorean anna umpa'guru tau kamban. Diomo te Antiokhiae nangei bunga'-bunga'na to mangngorean disangai “to Sarani”.[8]

²⁷Attu iatoo sae dio Antiokhia pira-pira nabi lu dio mai Yerusalem.

²⁸Dengan mesa disanga Agabus nakuasai Penawa Masero napolalan ma'kada nakua: “La kendek karorian illalan lili'na kaparentaanna Roma.” Kara-kara iatoo dadi tongan attunna Klaudius mendadi tomaraya.

²⁹Iamo too anna ummalamo kada situru' to mangngorean la urrempun doi' situru' pa'belanna la napopebaa lako siulu'na to mangngorean dio Yudea.

³⁰Umpalako tongammi kasiturusanna napolalan tirempun doi'. Nabengammi Barnabas sola Saulus la umpalanda' lako perepi'na to mangngorean dio Yudea.