Read Mamasa Kisah Para Rasul 2 Bible Online

Kisah Para Rasul 2 - Mamasa bible

Kisah Para Rasul 2

¹Inde anna nalambi'mo allo Pentakostae, ma'mesami angganna to mangngorean dio mesa angngenan.

²Tokke'mi urrangngi oni susi bara' kamai turun yao mai langi' lu tama banua nangei ma'rempun.

³Ummitami susi api ma'lana-lana titantan pantan urrampoi tau illalan inde banuae.

⁴nakuasai asammi Penawa Masero napolalan pantan mantula' ummoyong ma'rupa-rupa basa situru' pa'kuanna Penawa Masero illalan kalena.

⁵Attu iatoo, buda to Yahudi to unturu' tongan-tongan parentana Puang Allata'alla torro dio Yerusalem, to lu dio mai pira-pira botto illalan lino.

⁶Tappana urrangngi oni susi bara' kamai, buda tau sasaean ma'silullu'. Pusa' asan umpenawa-nawanni annu pantan urrangngi basana napake inde mai to mangngoreanna.

⁷Mangnga-mangnga asan napolalan sipantula'-tula' nakua: “Inde lako taue sangngin to Galilea!

⁸Umbara nakua anta mala pantan urrangngi basata napake?

⁹Anu' dengangkia' to Partia, Asia,

¹⁰Frigia, Pamfilia, Mesir, to lu dio mai Roma.

¹¹Susi to Yahudi tenni tau senga' salianna to Yahudi sapo' ma'aluk Yahudi, to lu dio mai Kreta anna Arab; tarangngi asan umpake basata untetteran kara-kara memangnga-mangnga napogau' Puang Allata'alla.”

¹²Mangnga-mangnga asan napolalan sipantula'-tula' nakua: “Akamo te kalembasannae?”

¹³Sapo' dengan duka' tau untellei nakua: “Inde lako taue malango asan annu buda sigali anggur nairu'.”

¹⁴Ke'de'mi Petrus sola sapulo mesa Solana anna ma'kada lako tau kamban nakua: “O to Yahudi anna angganna issinna Yerusalem, perangngi manappai ammu paillalan penawai tula'ku.

¹⁵Inde mai taue musanga malango, sapo' tae' annu mane tettek kasera mebongngi'.

¹⁶Sapo' inde kara-karae la ungnganna'i battakadanna Puang Allata'alla mangka napa landa' nabi Yoel naku:

¹⁷‘Illalan allo ma'katampakanna lino la kaputurun Penawa Masero lako angganna ma'rupa tau, napolalan angganna anakmua' la ullombungan battakadangku. Angganna to mangngurammua' la taman anna angganna to matua-tuammua' la mangngimpi.

¹⁸Illalan allo iatoo la kupaturun duka' Penawa Masero lako angganna sabua'ku muanne tenni baine anna la ullombungan battakadangku.

¹⁹Anna la kupadadi buda tanda mamangnga-mangnga yao langi' anna ma'rupa-rupa tanda illalan lino susinna rara, api, sola rambu buda.

²⁰La pi'de mata allo anna la malea susi rara bulan anna mane nalambi' allo kamainna Puang Allata'alla la nangei umpakawanan kamatandeanna.

²¹Anna benna-benna ussa'bu sanganna Puang Allata'alla, la dipasalama'.’

²²O anggammua' to Israel, patananni talinga inde tula'kue: Puang Yesus to Nazaret mangka napakawanan Puang Allata'alla lako kalemua' kumua iamo pesuanna ummolai kakuasaan anna ma'rupa-rupa tanda anna tanda memangnga-mangnga. Muissanan asan annu inde kara-karae dadi illalan alla'alla'mua'.

²³Situru' pa'kuanna sola pa'patantunna Puang Allata'alla mengkalao dio mai, inde Puang Yesus-e la napalessu' lako kalemua' la mupopepatei ammu umpabeai to kadake umpasokki lako kayu pantokesan.

²⁴Sapo' napatuo sule Puang Allata'alla, naalai dio mai kakuasaanna kamatean annu inning tae' dengan leleanna la nakuasai liu kamatean.

²⁵Annu inde Puang Yesus-e innang mangka napokada Daud nakua: ‘Tontong liu dio sa'deku Puang Allata'alla anna tontong liuna' nakambi' kupolalan tae' sarubeba' illalan salu katuoangku.

²⁶Iamo too anna buttumo kadoresan illalan penawangku umpakendek pampudian anna dengan kaparannuan naampui batang kaleku.

²⁷Annu tae' mupabeai batang sunga'ku torro illalan alla'-alla'na to mate, anna tea' mupabeai puru' batang kalena inde To Maseromue.

²⁸Mangkamo' mupaturoi lalan lu lako katuoan anna la ma'dore'-dore'na annu la tontong liuna' musolaan.’

²⁹Dadi mentu'ko siulu'ku, malamo' untula' neneta Daud lako kalemua' temo kumua tangngia kalena napatu kadanna, annu mangkami bonno' anna dilamun anna taitapa liangna sae lako temo.

³⁰Sapo' inde Daud-e mesa nabi, dadi naissanan kumua mangka ummoton pinda Puang Allata'alla anna ma'dandi la ummangka' mesa peampoanna Daud mendadi tomaraya.

³¹Natimang duka' umpokada katuoanna sule To nabassei bayu-bayu Puang Allata'alla, kumua tae' la napabeai Puang Allata'alla torro illalan alla'-alla'na to mate, anne tae' napabeai puru' batang kalena.

³²Puang Yesusmo to napatuo sule Puang Allata'alla dio mai alla'na to mate, anna kamimo ussa'bii.

³³Mangkanna naangka' Puang Allata'alla langngan angngenan kamatandean dio tandai kananna, untarimami Penawa Masero situru' pa'dandinna Puang Allata'alla Ambena. Iamo te Penawa Masero napaturunne susi muita anna murangngia' temo.

³⁴Annu tae' ia lao langngan suruga Daud sapo' ma'kadaria nakua: “Mangka ma'kada Puang Allata'alla lako Puangku nakua: Okko'ko dio tandai kanangku[2]

³⁵angku lukkoangko angganna ewalimmu dio tingngayomu.’

³⁶Dadi parallua' muissanan tongan anggammua' to Israel kumua inde Puang Yesus to mangkaa' mupopetoke'e naangka'mi Puang Allata'alla mendadi Dewatanta anna nabasseii bayu-bayu la umpasalama'ki'.”

³⁷Tappana urrangngi tula'na Petrus masussa siami penawanna angganna to dio reen napolalan mekutana lako Petrus sola Solana nakua: “Akamo la kipogau'?”

³⁸Natimba' Petrus nakua: “Pengkatoba'koa' ammu ditedok illalan sanganna Puang Yesus Kristus anna malara digarri'i kasalaammu anna bengkoa' Penawa Masero Puang Allata'alla.

³⁹Annu ikomoa' sola peampoammu napatu pa'dandi iatoo anna budapa to mambela la natambai Puang Allata'alla Dewatanta.”

⁴⁰Budapi tula' senga' napalanda' Petrus lako tau kamban naola umpakilalai kumua: “Alaikoa' kalmu illalan mai alla'-alla'na inde mai to kadake gau'e ammu malara salama'.”

⁴¹Ditedokmi angganna to ummorean tula'na Petrus, napolalan kerangngan to mangngorean allo iatoo umbai tallu sa'bu tau.

⁴²Inde mai taue barring umperangngii pepa'guruanna rasul. Sima'rempun umpamesa penawa, umpiak-piak roti anna ummande sola-sol, anna ma'sambayang.

⁴³Buda tanda memangnga-mangnga sola ma'rupa-rupa tanda napogau' rasul napolalan mengkarea' asan tau langngan Puang Allata'alla.

⁴⁴Anna angganna inde to mangngoreanne tontong liu ma'mesa anna angganna aka-aka nasola-solai.

⁴⁵Ianna dengan umbaluk ewananna natawa-tawami allinna situru' kaparalluanna.

⁴⁶Allo-allona ma'mesa liu illalan Banua Ada'na Puang Allata'alla. Sibala'-bala'mi nangei banuanna ma'mesa sitonda penawa malenna' ma'dore-dore ummande

⁴⁷napasiolaan umpudi sanganna Puang Allata'alla. Naporai asammi tau dio Yerusalem anna allo-allona narangnganni liu Puang Allata'alla bilanganna to dipasalama'.