Read Mamasa Kisah Para Rasul 28 Bible Online

Kisah Para Rasul 28 - Mamasa bible

Kisah Para Rasul 28

¹Kendekkan langngan gantanan mane kiissanarri kumua inde gantananne disanga libukan Malta.

²Madota' asan to ma'tondok lako kaleki. Umpadukkumi api anna tambaikan mendarang annu naparandukmi uran anna masakka' padang.

³Ulliumi ranga' Paulus anna patamai api, tappa tilo'do' siami ula' ma'ipo illalan mai annu malassumi anna untitok limanna Paulus.

⁴Inde anna ummitamo ula' ma'sintio dio limanna Paulus-e, sipantula'-tula'mi to ma'tondok nakua: “Inde taue manassa to papatean, annu moika anna salama'mo illalan mai tangnga tasik, sapo' tae' napabeai dewata Dike[28] la tuo.”

⁵Umpenteteammi limanna Paulus napolalan lu tama api inde ula'e anna tae' dengan maaka Paulus.

⁶Sapo nasanga to ma'tondok la kambangmi limanna battu tokke' songka bonno'. Napenandai liumi masae-sae, ta'ra dengan maaka Paulus lambisan kendek illalan penawanna kumua dewataria.

⁷Inde angngenan kingie toroe sikadappi' litakna Publius, gubernur dio libukan iatoo. Madota' lako kaleki annu natosaekan tallungngallo tallu bongi.

⁸Attu iatoo masaki ambena Publius, lumalla' anna untuttaian rara napolalan mamma' liu. Laomi Paulus tama angngenanna anna pa'sambayanganni anna mane balla'i pala' napolalan malapu'.

⁹Mangkanna te kadadianne, sasaeammi to masaki dio libukan iatoo napomalapu' asan duka'.

¹⁰Naangga' tongan-tongangkan to ma'tondok, lambisan napatokangkan sanda rupanna la kiparalluinna angki mane mengkalao.

¹¹Tallu bulangkan dio libukan Malta, langngammokan mesa kappala' lu dio mai Aleksandria disanga Dioskuri battu dikua dewata To Rambung. Inde kappala'e torro duka' dio libukan Malta umpelessu' attu masakka' padang.

¹²Saekan lako Sirakusa torromokan dio tallu bongi,

¹³angki mane umpatarru' kappala'ki ummundu' biring tasik, sae lako tondok Regium. Masiangngii, naparandukmi mangngiri' bara ma'paludiomai boko'na kappala', napolalan angga dua bongi angki saemo lako Putioli.

¹⁴Dio tondok iatoo silambi'mokan buda to ummorean Puang Yesus. Napelaumi kenamala torropakan dio, lambisan torro tongangkan duka' saminggu Angki mane pole' tarru' lako Roma.

¹⁵Naissananna to mangngorean dio Roma kasaengki, saemokan natammui dio Pasa' Apius anna dio Banua Pa'bongian Tallu. Silambi'kan ma'kurru' sumanga'mi Paulus langngan Puang Allata'alla napolalan matoro penawanna.

¹⁶Saekan lako Roma, dipabeaimi Paulus ma'banua senga' sola mesa tantara to undagaii.

¹⁷Katallu bongingki dio, untambaimi angganna perepi'na to Yahudi Paulus. Tirempunni, ma'kadami Paulus nakua: “Anggammua' sa'do'dorangku, tae' tongan-tongan dengan kasalaan kupogau' lako solata anna tae' dengan ada'na neneta kulenda. Sapo' nasakkana' dio Yerusalem anna sorongna' rokko lisu pala'na to ma'parenta Roma.

¹⁸Mangkana' diparessa moraimi to umparessana' la urrappananna' annu tae' dengan kasalaangku kupolalan dipabambanni sangka' dipatei.

¹⁹Sapo' moka tongan-tongan to Yahudi ke la dirappananna' iamo kungei umpelaui la dibisara dio olona tomaraya Roma, sapo tae' kukua la saena' umparapa' satondokku to Yahudi.

²⁰Iamo te balayanna kungei untambaikoa'e anta siita sola sipantula'. Ia kungei dirante bassi annu ummoreanna' to masae allomo taampaia' angganta to Israel.”

²¹Sapo' natimba' to Yahudi nakua: “Tae'kan dengan untarima sura' dio mai Yudea untetterangko, anna tae' toi dengan sae solata dio mai umpokadangkan kasalaammu.

²²Sapo' moraikan la urrangngi tula'mu umba nakua pikki'mu annu kiissanan kumua buda tau umbali kombongan mungei temo.”

²³Nasituru'-turu'imi mesa allo la nangei sitammu pole. Tappana nalambi' tempona, saemi buda tau dio banua nangei torro Paulus. Mengkalao dio mebongngi' sae lako karuen naola Paulus ummulelean kaparentaanna Puang Allata'alla anna issinna pepa'guruanna Musa sola sura'na nabi annu umpeang lalan anna malara nabawai ummorean Puang Yesus.

²⁴Dengan ummorean tula'na Paulus, sapo' dengan duka' moka ummoreanni.

²⁵Sisoro'-sorosan inde mai taue anna tae' dengan kasiturusanna. Sapo urrangngi asampi tula'na Paulus nakua: “Tonganna battakada napalanda' Penawa masero lako neneta ummolai nabi yesaya, nakua:

²⁶‘Laomoko umpellambi'i to Yahudi ammu pokadanni kumua: La parangngi liukoa' sapo' tae' dengan leleanna la mupekalambanan, anna la mennenne' liukoa' sapo' tae'koa' dengan leleanna la paita.

²⁷Annu makarra' penawanna anna ma'taru-taru sola ma'kabuta-buta, indana paita matanna, parangngi talinganna anna indana paalai penawanna, aka indana ma'pasule lako kaleku napolalan kupomalapu'.’ ”

²⁸Untampakkimi tula'na Paulus nakua: “Iamo too parallu la mupengngissanannia' kumua: Kasalamasan lu yao mai Puang Allata'alla mangka dipalanda' lako tau senga' salianna to Yahudi anna natarima manappa.”

²⁹[Mangkanna mantula' Paulus, sale'bammi to Yahudi anna sipekka-pekka annu tae' nabela ummala kada situru'.][29]

³⁰dua taun torro Paulus illalan inde banua nabaya' dio Romae iamo sinangei untarima manappa angganna tau to sae umpellambi'i.

³¹Sitonda kabaranian umpalanda' kaparentaanna Puang Allata'alla anna umpa'pa'guruan Dewatanta Puang Yesus Kristus anna ta' mammmo dengan ullewa'i.