Read Mamasa Filipi 2 Bible Online

Filipi 2 - Mamasa bible

Filipi 2

¹Matoro penawammua' annu mesa kappa'mokoa' Kristus. Maranga liukoa' annu nakamaseikoa' Kristus. Nasolaammokoa' Penawa Masero,[3] anna ummampuimokoa' pa'rantangan bua sola pa'kamase.

²Iamo too kupelau matin la mupasundunanna' kadoresangku. La sundummi kadoresangku ke mesa penawakoa', sikamase-mase, mesa pikki', anna mesa pattuyu.

³Daua' umpalako mesa karangan ke angga kalemua' la mupikki' iaraka anna moraikoa' la umpeang sanga. Sapo la malenna' penawakoa' ummangga' solamu marru ma'tandalangnganan anna kalemu.

⁴Tae' angga kalemua' la mupikki' sapo la mupasaluia' duka' penawa kaparalluanna solamua'.

⁵La ma'penawa susikoa' Kristus Yesus.

⁶Moi anna Dewata duka' Kristus Yesus susi Puang Allata'alla, sapo tae' umpengnganda' kasiranteanna Puang Allata'alla.

⁷Sangngadinna untampean kamatandeanna sae tama lino merrupa tau sirapan sabua'.

⁸Inde anna mendadi ma'rupa taumoe, mengkareppe'mi anna unturu' pa'kuanna Puang Allata'alla lambisan mate yao kayu pantokesan.

⁹Iamo too anna napomatandemo Puang Allata'alla anna beenni kakuasaan untondon angganna kuasa senga'.

¹⁰Anna malara angganna issinna suruga anna issinna lino, anna issinna apa' litak, la menomba dio tingngayona Puang Yesus,

¹¹anna la mangngaku kumua: “Yesus Kristus iamo Dewata,” napolalan dipomatande Puang Allata'alla Ambeta.

¹²Anggammua' sa'do'dorangku to kukamasei, innang simanuru' liukoa'i. Iamo too la mengkarea'koa' umpalako la sipato'na napogau' to dipasalama', tae' angga angku diopa reen, sapo la ondongpia ke tae'na' dio reen.

¹³Annu melolo Puang Allata'alla mengkarang illalan penawammua' napolalan kendek kamoraian anna kamatoroan umpogau'i pa'kuanna.

¹⁴Tae'koa' la ma'nuku-nuku tala sipekka-pekka ungkarang angga lako,

¹⁵ammu malara masero tala ditula' kadake napolalan kawanan kumua anaknakoa' Puang Allata'alla, to tae' dengan sassana illalan alla'-alla'na to kadake penawa anna to kadake gau'. La passassangkoa' sirapan bentoen ummarrang kamalillinan,

¹⁶ke untetterangkoa' battakada meparunduk lako katuoan. Ianna mupasusimoa' tee, dengammi la napolalan sende penawangku ke saemi sule Kristus annu iamo la umpakawananni kumua tae' masala resoku umpalako passanangku.

¹⁷Moi la dipateina' ura'na pengkarangangku umparundukkoa' lako lalan kasalamasan anna dibolloan raraku langngan pemala'mua' battu dikua kapangngoreanammua', la ma'kurru' sumanga'na' anna la dore'kia' pada-pada.[4]

¹⁸Anna la ma kuru'ru' sumanga'koa' duka' anta dore'a' pada-pada.

¹⁹Ianna siolaan pa'kuanta Puang Yesus, Ia kusua matin Timotius masimpan anna malara tiala penawangku urrangngi karebammua' ke saemi sule.

²⁰Annu angganna to siumpamoloina' ta'mo dengan la nasusian penawanna anna kalantukanna umpikkisangkoa' kamasannangammu.

²¹Annu tangngiaria karanganna Yesus Kristus napasalui penawa tau pira sapo kalenaria napa'kadua-duai.

²²Mukawanammia' kumua to la mala dirannuan Timotius. Mangkamokan sola mengkarang sirapan to sipoanak umpalanda' Kareba Kadoresan.

²³Ianna ma'lesoammo inde kara-kara kutingngayoe, tappa kusuami matin umpellambi'ikoa'.

²⁴Anna parannuna' langngan Dewata kumua ia masimpanna' matin umpellambi'ikoa'.

²⁵Anggaria Epafroditus, to kuala siulu'mo, to musua sae umpamoloina' parallumi kusua matin sule. Mangkamo' nasolaan illalan pengkarangangku anna pangngewaangku.

²⁶La kusuami matin annu nakamalli'i sigalimokoa'i anna masussa penawanna annu naissanan kumua mupekarebamia' kumua masaki.

²⁷Innang masaki tongan anna ambo titti' bonno', sapo nakamasei Puang Allata'alla anna nakamaseina' indaku tuttuan masussamo.

²⁸Iamo too angku ma'sirra'mo ussuai matin ammu malara dore'a' sule ke muitami anna la mattammo duka' penawangku.

²⁹La sitonda kadoresangkoa' untarimai susi la sipato'na mupalako ke untarimakoa' sa'do'dorammu to mangngorean. Pakasalleia' angganna to susi Epafroditus.

³⁰Anna ambo' titti' bonno ura'na pengkaranganna Kristus anna umbotoran sunga'nu umposara tae'napa mupogau' lako kalekua' la ungganna'i kaparalluangku.