Read Mamasa Ibrani 1 Bible Online

Ibrani 1 - Mamasa bible

Ibrani 1

¹Yolona pembuda ma'kada Puang Allata'alla lako neneta napalanda' nabi ummolai ma'rupa-rupa lalan.

²Sapo illalan inde attu kasuppikanna linoe melolomi Anakna Puang Allata'alla ullombunganni pudukna lako kaleta. Inde Anaknae innang mangkami napatantu la ummampui angga lako. Anna ia siamo napake Puang Allata'alla umpadadi langi' anna lino.

³Iamo duka' umpaarrangngiki' kamatandeanna Puang Allata'alla, anna kawanan kumua tananan penawanna susi siami tananan penawanna Puang Allata'alla. Ia toi umpatipalao angga lako ummolai battakadanna sitonda kekuasaan. Mangkai umbasei kasalaanna ma'rupa tau, lu langngammi suruga anna ummokko' dio tandai kananna To Randan Matande.

⁴Napolalan untondon angganna malaeka', susi sanga nasangaianni Puang Allata'alla marru untondon sanganna malaeka'.

⁵Annu tae' dengan kadanna Puang Allata'alla lako malaeka' nakua: “Ikomo Anakku; allo temo kupa'peassakam kumua: Kaomo Ambemu.”[1] Tae' toi dengan ma'kada lako mesa malaeka' nakua: “Kaomo la napoambe anna Iamo la kupoanak.”[2]

⁶Sapo inde anna ussua Anak pa'bunga'na tama linoe, ma'kada Puang Allata'alla nakua: “Angganna malaeka'na Puang Allata'alla la menomba dio tingngayona.”[3]

⁷Mengke'de' malaeka', nakua Puang Allata'alla untula'i: “Puang Allata'alla umpasusi talimpuru' malaeka'na anna umpasusi api ma'lana-lana pesuanna.”[4]

⁸Sapo nakua kadanna untula' Anakna: “O Dewata, la mentomarayako sae lako-lakona, maloloko ma'parenta.

⁹Umporaiko kamaloloan anna ungkabassiko kakadakean. Iamo nangei Ikomo nabengan kamatandean Puang Allata'alla, Dewatammu, untondon angganna solamu annu nabolloiko minna'-minna' la napolalan kendek kadoresan illalan penawammu.”[5]

¹⁰Nakua polepa Puang Allata'alla lako Anakna: “O Puang, parandukanna Ikomo ungkombong lino, anna Iko toi umpadadi langi'.

¹¹Angganna te maie la pa'de asan, anna la malusa susi sampin. Sapo la montong liuko Iko talumalin.

¹²Langi' anna lino la muluppi' susi bayu rui' ammu mane sondaii senga'na. Sapo tae' Iko dengan leleammu la lumalin, anna la tuo batuko.”[6]

¹³Tae' dengan la nakua Puang Allata'alla lako malaeka': “Okko'ko dio tandai kanangku, lambisan kulukkoan asangko angganna ewalimmu dio tingngayomu.”[7]

¹⁴Inde mai malaeka'e iamo penawa siumpengkarangan Puang Allata'alla anna nasua lao umpamoloi ma'rupa tau to la ullolongan kasalamasan.