Read Mamasa Ibrani 10 Bible Online

Ibrani 10 - Mamasa bible

Ibrani 10

¹Pepa'guruan illalan sura'na Musa mala dikua kalimbayona babang kamapiaan la sae ke dako' anna morong tau tangngiapi melolo kalena. Napolalan innang tae' dengan leleanna la diangga' malolo tau dio olona Puang Allata'alla annu unturu' inde pepa'guruanne menomba sitonda bua pemala', moika anna taun-taun umbaa liu bua pemala'na susi liu siami.

²Annu kela pa'de tonganni kasalaanna to memala' susi dio olona Puang Allata'alla, innang ta'mo la umpenawa-nawaan liu kasalaanna anna ta'mo la umbaa liu bua pemala'na.

³Sapo innang tae' susi. Annu inde pemala'na taun-taunne, angga umpakilala to memala' kumua to kasalaan.

⁴Annu tae' dengan leleanna rarana saping battu beke la umpa'dei kasalaan.

⁵Iamo too anna ma'kadamo Kristus lako Puang Allata'alla anna tama lino nakua: “Tangngia pantunuan sola bua pemala' senga' muporanan, sapo batang kale mupatokanna'.

⁶Tangngia toi pantunu battu' bua pemala' la umpa'dei kasalaan la umpomasannang penawammu.

⁷Kukuamo: ‘O Puang Allata'alla, diomo' reen la umpalako pa'kuammu susi tiuki' illalan Buku Masero untetteran kaleku.’ ”[34]

⁸Tula'na Kristus lako Puang Allata'alla nakua: “Tangngia bua pemala' sola pa'petando muporanan, tangngia toi pantunu battu' bua pemala' la umpa'dei kasalaan la umpomasannang penawammu” moika anna situru' pepa'guruanna Musa.

⁹Anna mane nakua pole: “Diomo' reen la umpalako pa'kuammu.” Dadi napa'deammi Puang Allata'alla angganna pemalasan yolo, nasonda kamateanna Yesus Kristus.

¹⁰Anna Yesus Kristusmo umpogau' pa'kuanna Puang Allata'alla umpopemala' kalena pissan anna la tontong sae lako-lakona, tapolalan masero dio tingngayona.

¹¹Angganna imam allo-allona ke'de' umpalako pengkaranganna umpakendek pemalasan napa'sule-sulei susi liu siami, moika anna tae' dengan leleanna la umpa'dean kasalaan.

¹²Sapo Kristus, angga pissan umpebeen kalena dipatei mendadi bua pemala' umpa'dean kasalaan, anna la tontong liu sae lako-lakona. Mangkaii, ummokko'mi yao angngenan randan matande dio tandai kananna Puang Allata'alla.

¹³Temo ummampaimi attu la nangei angganna balinna la napatirokon Puang Allata'alla dio tingngayona.

¹⁴Dadi angga pissan umpebeen kalena Puang Yesus dipatei mendadi bua pemala', napolalan angganna to disarakki mendadi petauanna ta'mo dengan sassana dio tingngayona puang Allata'alla sae lako-lakona.

¹⁵Kara-kara iatee napa'pesa'bian duka' Penawa Masero lako kaleta nakua:

¹⁶“Indemi pa'dandi la kupadadian ma'rupa tau illalan allo la ditingngayonae: La kupatitanan illalan penawanna parentaku anna la kuuki' illalan pikki'na.” Susimi kadanna Dewata.

¹⁷Anna mane nakua: “Ta'mo la kupaillalan penawa kasalaanna ma'rupa tau sola gau' kadakena.”[35]

¹⁸Dadi, digarri'imi angganna kasalaan sola gau' kadake, napolalan ta'mo manggi' dengan pemalasan la umpa'dean kasalaan.

¹⁹O anggammua' sa'do'dorangku, malamiki' melolo tama Angngenan Randan Masero silanda' Puang Allata'alla ura'na rarana Puang Yesus mangka to'do.

²⁰Mangkami umpapia lalan bakaru la taola ullolongan katuoan ummolai batang kalena sirapan ussesse' sampin pesapa' illalan Banua Ada'na Puang Allata'alla.[36]

²¹Anna Puang Yesusmo Pongkena Imam taampui to urrepi' banuanna Puang Allata'alla.[37]

²²Iamo too, anta umpellambi'imoa' Puang Allata'alla sitonda penawa mapatting anna kapangngoreanan matoto'. Annu mangkami napippikki rarana Puang Yesus penawa kadaketa anna mangkamo nadio' wai randang batang kaleta.

²³La tontongkia' untoe manda' kaparannuanta mangka taakui, annu tae' mala tala ungganna'i dandinna Puang Allataalla.

²⁴La tontongkia' duka' sipoinawaan anna malara kendek pa'kamase anna panggauan mapia.

²⁵Tae'kia' la makuttu ma'rempun memala', susi sinapogau' tau pira. Sapo la tongkia' sipakatoto', anna la tuttuan barringkia' umpalakoi annu tuttuan madappi'mi kasaeanna Dewata.

²⁶Annu ianna taangga'i umpogau' liu kasalaan moika anna ummissanammiki' pepa'guruan tongan, manassa anna ta'mo dengan la dipopemala' pole la umpa'dean itin kasalaantao.

²⁷Sapo anggami kamareasan ummampai pa'parokkona Puang Allata'alla sirapan to ma'bisara anna api ma'lana-lana la ussumpunni to umbali Puang Allata'alla.

²⁸Ianna dengan tau untumpu pala' pepa'guruanna Musa, dipatei anna tae' dengan pa'kamase lako kalena ke denganni dua battu' tallu tau ussa'bii.

²⁹Marru la mabanda' polepi ia la natarima to umpa'lullu' Anakna Puang Allata'alla anna ussanga tae' keangga' rara umpomanassa pa'dandinna Puang Allata'alla la umpa'deanni kasalaanna, anna untellepa Penawa Masero kabuttuanna pa'kamase.

³⁰Annu taissanan to ma'kada nakua: “Angga Kao mala umpembalasan tau. Kaomo la umpabambanni sangka'to kasalaan.” Anna nakua polepa: “Dewata la umbisara petauanna.”[38]

³¹Tae' dengan pada megiri-giri ke Puang Allata'allamo Dewata tuo mepabambanni sangka'.

³²Pengkilalaia' umba mukua yolona ammu mane tama kamasianganna Puang Allata'alla. Attu iatoo pembudakoa' nalambi' kamasussaan sapa tontong liukoa' matutu lako Dewata.

³³Dengangkoa' ditelle-telle sola didarra dio tingngayona tau bnda, anna dengan toikoa' umpamoloi to didarra mupolalan didarra duka'.

³⁴Mapa'di' penawammu ummita to ditarungkun ura'na kapangngoreananna. Anna la tontongkoa' masannang moi dirappaikoa' ewanammu, annu muissanan kumua ummampuipokoa' ewanan marru mapia anna la da'da' sae lako-lakona.

³⁵Dadi dau rappanan kapangngoreanammu, annu la kamai saromua' yao suruga.

³⁶La tontongkoa' sa'bara' untingngayo angga lako ammu malara ullolongan pa'dandinna Puang Allata'alla ke mangkami mupalako pa'kuanna.

³⁷Annu dengan tiuki' illalan Buku Masero nakua: “Ta'mo masae anna saemo to diampai; anna ta'mo la napadende attu kasaeanna.

³⁸Anna angganna petauangku to malolo la ullolongan katuoan bakaru ura'na kapangngoreananna. Sapo ianna dengan ma'sorong boko', tae' la masannang penawangku lako.”[39]

³⁹Sapo tangngiakia' kita to ma'sorong boko', to la sanggang sapo to mangngoreangkia', to la ullolongan kasalamasan.