Read Mamasa Ibrani 8 Bible Online

Ibrani 8 - Mamasa bible

Ibrani 8

¹Dadi pungngu' tannunna kada ditula' temo ioamo: Dengammi Pongkena Imam taampui ma'loko dio tandai kananna Puang Allata'alla To Randan Matande yao suruga.

²Anna umpalakomo pengkaranganna illalan angngenan masero, battu' dikua lantang kapenombaan tongan napapia Puang Allata'alla, tangngia panggaraga ma'rupa tau.

³Angganna Pongkena Imam diangka' anna la umpalanda' pa'petando anna bua pemala' dio tingngayona Puang Allata'alla. Susimi duka' Puang Yesus Pongkena Imam taampui, innang la dengan duka' aka la napemalasan.

⁴Pa'rapananni la illalan liupi lino, manassa anna tae' la mendadi imam, annu dengammi imam siumpalanda' bua pemala', situru' atoran alukna to Yahudi.

⁵Angngenan pemalasan illalan lino nangei umpalako pengkaranganna imam sitonganna angga kalimbayona angngenan pemalasan yao suruga, susi napalanda' Puang Allata'alla lako Musa anna la umpake'de' lantang pemalasan nakua: “Pengkilalaii, la mupapia situru' tandengan kupaitaiko yao tanete.”[27]

⁶Sapo temo, pengkaranganna Puang Yesus marru matande anna la pengkaranganna imam inde lino. Susimi duka' pa'dandi bakarunna Puang Allata'alla lako ma'rupa tau nakarang Puang Yesus marru untondon pa'dandi yolo annu kara-kara nadandi Puang Allata'alla ummolai Puang Yesus marru mapia.

⁷Annu kela tae' dengan sassana pa'dandi bunga'na, ta'mo la manggi' umpadengan pole pa'dandi kapenduanna Puang Allata'alla.

⁸Sapo umpasala petauanna Puang Allata'alla, nakua: “Sitonganna, pissan attu la kupadengan pole pa'dandi bakaru lako to Israel sola to Yehuda.

⁹Tae' la susi pa'dandingku lako nenena angku tettei illalan mai lembangna Mesir. Tae' unturu' pa'dandingku, napolalan tae' duka' kupaillalan penawa.

¹⁰Indemi pa'dandi bakarungku lako to Israel illalan allo la ditingngayonae: La kupatitanan illalan pikki'na parentaku anna la kuuki' illalan penawanna, lambisan Kao la napodewata anna iamo la mendadi petauangku.

¹¹Anna ta'mo la umpatudu padanna battu' sa'do'doranna kumua: ‘Pengngissanniko Puang Allata'alla.’ Annu la naissanan asammo' susi to kamai tenni to barinni'.

¹²La kugarri'imi kasalaanna, anna ta'mo la kupaalai penawa angganna kasalaanna.”[28]

¹³Ianne untetteran pa'dandi bakaru Puang Allata'alla, kalembasanna malusami pa'dandi yolo. Anna angganna matuanna anna malusanna ta'mo la masae anna pa'demo.