Read Mamasa 1 Petrus 5 Bible Online

1 Petrus 5 - Mamasa bible

1 Petrus 5

¹La kupakilalakoa' anggammu perepi' illalan simesa-mesa kombonganna to mangngorean annu mesana' duka' perepi', anna melolona' ussa'bii kamaparrisanna Kristus anna la mangngala tawana' illalan kamatandeanna ke dipakawanammi.

²Kupelau matin la ungkambi' manappakoa dombana Puang Allata'alla mangka diparokkoangkoa' lisu pala'mu. La masannangkoa' ungkambi' manappai situru' pa'kuanna Puang Allata'alla, tae' la mukabandasan. Tae' toi la mupalako annu la mupopallolongan, sapo la ke'de' illalan penawammua' morai la mengkarang.

³Tae'koa' la torro to ma'parenta illalan alla'-alla'na to mangka dipalessu lako kalemua', sapo la umpa'paitaangkoa' tandengan anna pampalapaii.

⁴Ianna saemo To Ma'kambi' Randan Matande, la napasongko'ikoa' songko' kamatandean tae' dengan la malusanna.

⁵Susi duka' lako to mangngura, la ma'perangngikoa' lako to matua. Anna kupakilala asangkoa' kumua la marampam penawakoa' lako padammu. Annu dengan tiuki' illalan Buku Masero nakua: “Puang Allata'alla umbali to malangka' penawa, sapo ungkamasei to marampan penawa.”[8]

⁶Iamo too mengkareppe'koa' dio olona Puang Allata'alla to umampui kamatoroan anna tandeangkoa' ke nalambi'mi attunna.

⁷Ianna dengan mupomalallan penawa, sorong langnganni Puang Allata'alla annu tontongkoa' nakambi'.

⁸Pengkilalakoa' ammu matangkin, annu ewalimmu iamo ponggawana setang tae' dengan torro lu rekke lu sau' susi singa ummorron to la mala naamma' kalebu.

⁹Kapangngoreanan matoto'mua' la mupake ummewai. Annu muissanan kumua angganna sa'do'dorammua' to mangngorean illalan lino nalambi' asan duka' kamasussaan susi ullambi'koa' temo.

¹⁰Anna Puang Allata'allamora to'na pa'kamase, to untambaikoa' ummolai Kristus napalutama kamatandeanna la da'da' sae lako-lakona, la umpatepukoa', napakatoto', nabengangkoa' kamatoroan, anna bangunangkoa' ke mangkamokoa' ussa'dingan kamaparrisan sappai'.

¹¹Puang Allata'allamo to ummampui kakuasaan sae lako-lakona. Amin.

¹²Inde sura' kapotti' kupopebangkoa'e, mala dadi annu napamoloina' Silas[9] mesa sa'do'doranta to mala dirannuan. Ia kungei umpopebaangkoa' sura' annu la kupakilalakoa' anna la kupomasiangangkoa' kumua angganna te maie innang pa'kamasena Puang Allata'alla. Pengnganda' tongan-tongannia'.

¹³Salama'na angganna sa'do'doranta to nakala' kombonganna to mangngorean inde Babilon[10] to pada-padakoa' napile Puang Allata'alla. Salama'na duka' Markus to kuala anak dadian.

¹⁴Sisalama'-lama'koa' sitonda pa'kamase susi la sipato'na napogau' to mangngorean. Anna Puang Allata'allamora untandoikoa' kamasakkean to mesa kappa'mo Kristus.