Read Mamasa Wahyu 18 Bible Online

Wahyu 18 - Mamasa bible

Wahyu 18

¹Tapakala, ummita pole omo' mesa malaeka' senga' turun yao mai suruga. Ummampui kakuasaan kamai anna passassang lino napobua' pangngarrangna.

²Metamba-tamba nakua: “Loppo'mi! Loppo'mi Babel kota kamai! Natongkonnimi pole' ma'rupa-rupa setang; anna nakesserangngimo angganna dassi meko'do'-ko'do' nakasinnang ma'rupa tau.

³Annu mentu'na pembatisan illalan lino mangka napapusa gau' kadakena sirapan napalangoi anggur. Anna umbawai angganna tomaraya illaan lino ullullu' pa'bannetauan, anna untomakakaimo mentu'na pa'baluk illaan lino annu umpangngula' sigali kamoraianna.”

⁴Kurangngi pole omi kamara senga' ma 'kada yao mai suruga nakua: “O petauangku, mallaikoa' illaan mai itin kota Babel-o indana sussuikoa' kasalaana napolalan nalambannikoa' perambingku.

⁵Annu ma'tombommi kasalaanna sae langngan langi anna tae' dengan nakalembi Puang Allata'alla gau' kadakena.

⁶Bala'i angganna gau' kadakena. Bala'i penduan tiluppi' angganna pa'palakona, sirapan anggur, patamanni irusanna penduan tilluppi' masarru'na anna inde anggur sinabeen taue.

⁷Palambi'i kamasussaan anna parri'na salu kamatean sitinti kamalangkasan penawanna anna ewanan napomasannangan penawanna. Annu sinakua illaan penawanna: ‘Tomarayana', tangngiana' baine balu, anna tae' dengan leleangku la ussa'dingan parri'na salu kamatean.’

⁸Iamo too anna anggamo illaan allo sangngallo anna lambi'mi ma'rupa-rupa kamaparrisan susinna: kamatean, pa'barataan, anna karorian. La naande api annu tadisirantean kakuasaanna Puang Allata'alla Dewatanta to umpabambannii sangka'.

⁹Angganna tomaraya illaan lino to nasolaan ungkarang gau' meko'do'-ko'do' anna mangngala tawa illaan katoma kakaanna la umbatingngi itin kotao, ke ummitami rambu ma'balole' langngan ba napobua api ussumpunni kota Babel.

¹⁰La naparandan mambela annu marea' la narua inde pandarraanne. Anna ma'kada nakua: ‘Sanggang tongammi Babel, kota kamai anna matoro! Annu angga satettek anna mangkamo natananni Puang Allata'alla.’

¹¹Angganna pa'baluk illaan lino umbatingngi kasangganganna Babel, annu ta'mo dengantau la ummalli balukanna,

¹²susinna: bulawan, pera', batu masulli', mutiara, sampin mabusa pakkillo-killo', sampin mellolo pao rupanna, sampin sa'be, anna sampin malea. Susi toi duka sangga' rupanna porewa kayu bumanangnga', anna porewa tora dipapia anna porewa kayu masulli' allinna, porewa gallang, porewa bassi, anna porewa batu pualam.

¹³Ta' tomo dengan la ummalli kuli'na kayu magolla, rampa-rampa, minna'-minna', kemenyan, mur, anggur, minnak zaitun, tappung anna gandum, saping, domba, darang sola bendi, sabua' anna to diala illaan mai pa'bundusan.

¹⁴La nakua inde mai pa'baluk lako issinna kota Babel-e: “Pa'de asammi angganna pa'poraimmua'. Tallan asammi angganna porewa masulli' simupobelo-beloa', anna ta'mo dengan leleanna la mukabuttuia'.”

¹⁵Angganna to sisae umbaluk inde mai porewa dio Babel lambisan natomakakaie, la umparandan mambela inde kotae annu' marea' la narua pandarraan. Nabatingngi mandami,

¹⁶nakua: ‘Sanggang tongammi issinna Babel kota kamai, to siumpake sampin pakkillo'-killo', sampin mellolo pao rupanna, anna sampin malellang. Anna to sima'porewa bulawan, batu masulli', anna mutiara!

¹⁷Annu anggaria satettek anna pa'de asammo inde ewanannae!’ Susi toi duka' angganna ponggawa illaan kappala' limbang, angganna to sima'kappala' limbong, anna to mengkarang illaan kappala', sola angganna to ma'pallolongan tama tasik, umparandan mambela

¹⁸rambu api ussumpun inde kotae anna sikaoli nakua: ‘Ta'mo dengan la susinna inde kota kamaie.’

¹⁹Pantan umpessembusan soyok langngan ulunna tanda pa'barataan, anna sikatangi' umbatingngi inde kotae napasiolaan metamba-tamba nakua: ‘Sanggang tongammi Babel, kota kamai! Kota untomakakai angganna to ummampui kappala' limbong! Annu anggaria satettek anna pa'de asammo aka akanna.

²⁰Sapo ikoa' angganna issinna suruga, la dore'koa' ummita katallananna inde kotae. O anggammua' petauanna Puang Allata'alla sola angganna rasul anna nabi, la dore'koa' annu napabambannimi sangka' Puang Allata'alla la bala'na aka mangka napogau' lako kalemua'.’ ”

²¹Mangkai too, dengammi mesa malaeka' magassing ummangka' mesa batu, kamai ia anna issong poa anna pa'lebasanni tama tasik, nakua: “La dipasusimi te ditallanan kota Babel-e mesa kota randan kamai, lambisan ta'mo dengan leleanna la diita.

²²Anna ta'mo dengan aka la dirangngi illaan kota Babel susinna to ma'katapi, to menani, ta ma'tulali, anna to ma'tamboro'. Ta' tomo dengan la dilambi' ta manarang lima, anna ta' tomo dengan la dirangngi to lumambuk.

²³Ta'mo dengan la naita tau pangngarrangna ballo illalan kota Babel, anna ta' tomo dengan la dirangngi to umpakaroa' pa'sombaan. Aka to ma'balukmumo randan kaissanan illaan lino, anna issan-issammumoa' simuapake umpapusa angganna ma'rupa tau illaan lino.

²⁴Ia nangei dipabambanni sangka' kota Babel annu iamo angngenan nangei tisembu' rarana angganna nabi anna rarana petauanna Puang Allata'alla, anna rarana angganna to dipatei illaan lino.”