Read Mamasa Wahyu 22 Bible Online

Wahyu 22 - Mamasa bible

Wahyu 22

¹Mangkai too, napaitaimo' inde' malaeka'e salu naola wai katuoan karandangan passiling susi batu kristal. Inde salue buttu yao mai tongkonan layukna Puang Allata'alla anna Anak Domba,

²anna umpa'tangngai lalan illaan kota. Dengan kayu tuo dio sipatomalian biringna inde salue. Inde kayue disanga kayu mepatuo, sipessapulo dua kembua sataun battu' dikua sipissan sabulan. Anna sidipake daunna umpakulii angganna ma'rupa tau.

³Anna illaan inde kotae tae' tappa' dengan aka natado Puang Allata'alla. Iamo te kotae la nangei tongkonan layukna Puang Allata'alla anna Anak Domba. Angganna sabua'na la menomba lako,

⁴la ummita lindona Puang Allata'alla anna la tiuki' yoo kidena sanganna Puang Allata'alla.

⁵Ta'mo la dengan bongi dio napolalan ta'mo umparallui ballo. Ta' tomo umparallui pangngarrangna mata allo annu Puang Allata'allamo ummarangngi. Anna la ma'parentamo angganna sabua'na dio sirapan tomaraya sae lako-lakona.

⁶Mangkai too, nakuammo' inde malaeka'e: “Angganna inde tula'e manassa anna mala diorean. Puang Allata'alla Dewatanta To umpatigara' penawanna nabi umpalanda'i battakadanna, mangka ussua malaeka'na lao umpaitai inde kara-kara la masimpammo dadie lako sabua'na.”

⁷Ma'kada Puang Yesus nakua: “Pengkilalaii, ta'mo masae angku saemo sule! Kerongko' to unturu' angganna kara-kara dipaombo' illaan inde sura'e.”

⁸Melolo kaleku, Yohanes, urrangngi anna ummita angganna inde kara-karae. Mangkanna kurangngi anna kuita, malimuntu' siamo' dio tingngayona malaeka' to umpaitaina' angganna kara-kara iatoo la umpenombaii.

⁹Sapo tappa ma'kada nakua: “Dai! Dau penombaina'. Puang Allata'allaria la mupenombai! Anno sabua'nana' duka' Puang Allata'alla susi siamiki' anna angganna sa'do'dorammu iamo nabi anna angganna to unturu' issinna inde sura'e.”

¹⁰Nakua pole omo: “Dau buni battakada pa'paombo' illaan inde sura'e aka madappi'mi attunna la dadi.

¹¹Benna-benna ma'gau' kadake, pabeaii umpogau' liu kakadakean; benna-benna meko'do' ko'do' pa'palakona, pabeaii ungkarang liu gau' meko'-do'-ko'do'; benna-benna ma'gau' mapia, pabeaii umpogau' liu kamapiaan; anna benna-benna masero salu katuoanna, pabaii umpalako liu gau' masero.”

¹²Ma'kada Puang Yesus nakua: “Pengkilalaii! Ta'mo masae angku saemo sule. La umbaanna' sarona angganna ma'rupa tau situru' pa'palakona simesa-mesai.

¹³Kaomo Alfa anna Omega, Bunga'na anna Katampakanna, Paparandukanna anna Kasuppikanna.”

¹⁴Kerongko' angganna to umpomabusukki bayu rui'na[31] aka la sipato' ia tama inde kotae anna la siratan ummande bua kayu katuoan.

¹⁵Sapo tae' ia la tama kota angganna to kadake, to ma'issan-issan, to ullullu' pa'bannetauan, to papatean, to umpenombai dewata lino panggaraganna, anna angganna to sinaporai untetteran tula' tatongan. Angganna te mai tau susie la torro dio ia salianna inde kotae.

¹⁶Nakua Puang Yesus: “Kaomo, Yesus, mangka ussua malaeka'ku matin untetteranangko angganna kara-kara la parallu naissanan angganna kombanganna to mangngorean. Kaomo peampoanna tomaraya Daud,[32] To digente' Bentoen Perenden Allo pakkillo'-killo'.

¹⁷Ma'kadami Penawa Masero anna inde to dipasirapan baine nasibalian Anak Dombae nakua: “Maimokoa'!” Anna benna-benna urrangngi inde tula'e la nakua duka': “Maimokoa'!” Benna-benna mawarrang anna morai la ummiru' la sae anna ummala babang wai katuoa.

¹⁸Lako angganna to urrangngi kada pa'paombo' illaan inde sura'e, kupakari'di' kumua: “Benna-benna urrangnganni tula' pa'paombo' illaan inde sura'e, la narangngannianni Puang Allata'alla lako kalena kamaparrisan tiuki' illalan inde surale.

¹⁹Anna benna-benna ummalai pita tula' pa'paombo illaan inde sura'e, la naalai Puang Allata'alla tawana iamo bua kayu katuoan anna ta'mo la ditangga' tama Kota Masero susi tiuki' illalan inde sura'e.”

²⁰Ma'kada Puang Yesus to umpaombo' angganna kara-kara iatoo, nakua: “Tonganna, la masimpammo' sae!” Amin! O Puang Yesus, maimoko!

²¹Anna Puang Yesusmora untamba'koa' pada-pada. Amin.