Read Mamasa Wahyu 7 Bible Online

Wahyu 7 - Mamasa bible

Wahyu 7

¹Mangkai too, ummitamo' appa' malaeka' ke'de' ussandai appa' katetukna lino, urrinding appa' katumbunan bara', aka' indana dengan bara' mangngiri' yao gantanan battu' dio tasik, iaraka anna lako to' kayu.

²Angku mane ummita malaeka' senga' lu yaya mai tandai kabuttuan allo, umbaa petandana Puang Allata'alla, Dewata tuo. Napemandui metamba lako inde appa' malaeka' to mangka dibeen kuasa la ussanggangngi lino anna tasikke,

³nakua: “Dau tokke' ussanggangngi gantanan sola tasik battu' angganna to' kayu, ke ta'pa mangka kitandai kidena angganna sabua'na Puang Allata'alla, Dewatanta.”

⁴Anna mane pokadanna' kumua saratu' appa' tapulo appa' sa'bunna tau ditandai kidena. Inde mai taue pantan diala dio mai sapulo dua to'na pembaptisanna to israel,

⁵iamo pa'pabuttunna Yehuda sapulo dua sa'bunna tau, pa'pabuttunna Ruben sapulo dua sa'bunna tau, pa'pabuttunna Gad sapulo dua sa'bunna tau,

⁶pa'pabuttunna Asyer sapulo dua sa'bunna tau, pa'pabuttunna Naftali sapulo dua sa'bunna tau, pa'pabuttunna Manasye sapulo dua sa'bunna tau,

⁷pa'pabuttunna Simeon sapulo dua sa'bunna tau, pa'pabuttunna Lewi sapulo dua sa'bunna tau, pa'pabuttunna Isakhar sapulo dua sa'bunna tau,

⁸pa'pabuttunna Zebulon sapulo dua sa'bunna tau, pa'pabuttunna Yusuf sapulo dua sa'bunna tau anna pa'pabuttunna Benyamin sapulo dua sa'bunna tau.

⁹Mangkai too, ummitamo' tau tirempun tadiissan disangai budanna. Ke'de' dio tingngayona tongkonan layak anna Anak Domba. Napissanni ma'bayu rui' mabusa, anna pantau ummanda'i daun andulan. Inde mai taue pantan lu dio mai ma'rupa-rupa kaparentaan, pembatisan, botto-ma'botto anna basa.

¹⁰Sipetamba-tambaan nakua: “Kasalamasanta lu yao mai Puang Allata'alla, to ummokko' yao tongkonan layuk, anna lu yao mai Anak Domba.”

¹¹Napissannimi malimuntu' untingngayo tongkonan layuk umpenombai Puang Allata'alla inde malaeka' ulliling tongkonan layuk sola perepi' anna appa' penatuoe.

¹²Sipetamba-tambaammi nakua: “Amin! Kipakasalle Puang Allata'alla, Kipomatande Dewatanta, Kurru' sumanga' kipakendek langngan sae lako-lakona! Kiakui kumua Puang Allata'alla: to randan keaka' to ma'kuasa anna to matogon sae lako-lakona! Amin.”

¹³Dengammi mesa perepi' mekutana lako kaleku, nakua: “Bennara inde lako ma'bayu rui' mabusae anna umba naola sae?”

¹⁴Kukuamo: “Tae' kuissanan tuang, ikoria ummissananni.” Nakuamo: “Inde mai taue iamo to mangka ussa'dingan pandarraan mabanda'. Mangka asammi umbasei bayu rui'na umpake rarana Anak Domba napolalan mabusamo.

¹⁵Iamo napolalan ke'de'mo dio olona tongkonan layukna Puang Allata'alla anna menomba allo bongi illalan Banua Ada'na Puang Allata'alla. Anna To ummokko'mo yao tongkonan layuk la ummongannii.

¹⁶Inde lako taue ta'mo la tadea' ta'mo la mawarrang, ta'mo la ussa'dingan malassunna allo

¹⁷annu'Anak Dombamo, to ke'de' dio sa'dena tongkonan layuk, la ungkambi'i anna untettei lako kalimbuang tamatti', kalimbuangna wai katuoan. Anna Puang Allata'allamo la umpolisanni wai matanna.”