Read Managalasi Matiu 11 Bible Online

Matiu 11 - Managalasi bible

Matiu 11

¹'Enarena Jesuho Huni tisaiporu iropu ropu no'ohe'i kajipo raka ka'ene vehunijaho 'waravume pa'arejume Hu ijí rene va'e puni ari najahe vu'a 'wara'irono va'ana.

²'E'eme Joni tipurai hiji'i Kerisora raka ka'ene venajaho henarena hu huni tisaiporua no'o irechamiume Huni roara.

³'Enareja pu Hu apoma ijá 'wava 'Ú A ea ka'ene rohunaka 'waruvajina ho nú ea pina sa'eja? 'wavara.

⁴'Ejume Jesura ijá 'iama Ja iviamaa 'unama va'ajimareje ja raka ka'ene hena kavajaho Joni 'waraha.

⁵Ea ka'ene nia supama'inijija nia niriu'e ea ka'ene irima'inijija 'urahe matauma oju'e ea ka'ene reporosia rukina pa'arenau'e ea ka'ene ataa pa'ajija heju'e ea ka'ene kwamasahi'inijija ni'urine mai'o hiju. 'Eju'e Godoni vu'a mai maiu'inijaho ea ka'ene pivusahi'iniji najahu.

⁶'Ena'omo ea irara Nuni hahijihuna'e paju'amajaho niho'o hu merajahi'ina 'iamana.

⁷'Ejume Joni oni pwehijijija va'eme Jesura eaka mapoka kajihi Joni rona 'waramarena ijá 'iama Ja va'e nechi'a riri va'ajaho ja iraka kavare? Ja vi hwa'oha raka'e hwasisi'i ninamarena varivi'i navumakame ja ijí ka'i va'ara raka?

⁸Ja ijino va'ajaho ja raka'e ka'i va'are? 'Ú ei pini ateha ka'ene mavarasa'inijino apúsavumakame ja ka'i va'ara raka? Heha! Ea ka'ene ateha mamai savujaho kini huni sei hijura

⁹kaivo ijí jara raka ka'ene ka'i va'a kajaho 'wariva hejuma. Ja poropeti ka'i va'are? I'a Na ijaho ja ni'waravume hejara. Hura poropeti 'aho'akija asitahu.

¹⁰Ikaho nitama ea kaji Godoni ira vaji rona 'waramajina.Heha! Na Nuni vu'a 'waravi'ina ranave Oni una'i vu'akame hu Oni 'unama amairiahuna 'úmana.

¹¹Na niho'o nimaa nimaa ja 'waravu Joni Papitisita eaka mapoka ka'ene mwe'a kakino hijujaho hura asitahana. 'Enakaivo Godoni ehija ma'u'umaijipo Joni asivu.

¹²'Enakaivo veaka Joni Papitisita aneja vene ea najahaji rena roe iviamaa 'e'unukino renareja ea mapoka Godoni ara pi'ona'iroreja harura ni'ina veju kaivo ea ka'ene ajisinijipo niho'o Godoni ara kajaho harura vene ape'i veju.

¹³'Enakaivo nitama Godoni poropeti 'ee ea ka'ene Godoni tamana vaji 'warama apena rou va'o roe iviamaa Jonira roani veakino 'e'unakena.

¹⁴'Enakúne ja ura ijí hena nimai ro'i 'ahi'amajaho Joniho Iraijana. Hu ea ka'ene rohuna 'waruvajina.

¹⁵Ea irara areri ataa jaraa'e he'i ve'amajaho ataa apúsame henama.

¹⁶Ea ka'ene iviasi hijukija Na iraki apene manura veti'ejo? Ijihuni maijaho pu areri sesamaapo maketi hine sesamaa 'aho'a'e 'umenai hijuja'ina'e veju.

¹⁷Nú jona'e hurisia hwasihihura kaivo ja pajavavura. 'Ene nú virisi vejura kaivo ja paniramaruvura 'umejara.

¹⁸'Enakaivo Jonira roarena 'aura areme 'iruma paine 'ee toa paijumakame ea mapoka ijá 'wava Hu 'avena siseapo ajivu'e avanu 'wavara.

¹⁹'Enakaivo Ema Puni Harihijara roajaho Hu 'iruma ine 'ee toa inana. 'Enajihuna'e pu ika'ina 'wavu Kaha! Hu 'iruma arisi isa'ora 'ee Hu arisi toa sisea isa'ora Hu ea ka'ene takisia apeji'inijihija 'ee ea ka'ene sisea veji'inijihi puni napura. 'Enakaivo ea ka'ene vwiha mamaa rukinijija pura ichá'ina ka'ene vejujara najahujaho pu hena kavi'ina 'iamana. Ara Ka'ene Panimaa Roji'inijina

²⁰'Ejumakame kwaa ara 'aho'a uneunecha ka'ene ea areri pavehunijija venana kaivo ea mapoka puni sisea paarevumakame Hu pu 'uraraharena ijá 'iama

²¹Ja ea ka'ene Koresini hine 'ee Petasaita hijujija eha sisea apehuna. Ijihuni maijaho Na joni ari uneunecha ea areri pavejura veju'ukame ja panimai roju kajihuna'e ja eha sisea apehuna. Na Taia 'ee Sairani ija'ina'e ve'ipisa pu niho'o maraku'a puni sisea niaremamaa areva'a.

²²'Ena'omo na nimai ja 'waravu. Vea ka'ene Godira mwe'akaki 'otua venuni veijaho kwaa iha Taia 'ee Sairani ijija jara eha ka'ene ni'ima'ura ape'avaja'ina'e papehuna.

²³'Enakaivo 'ú ja Kapeniami orakija ja ma joni haha kakino 'eka kahino Godoni ari va'iro avajo? Ja niho'o kwa ka'ene veni renuni kwaijino vahuna. Ijihuni maijaho Nara uneunecha ka'ene ea areri pavejuraka joni vaji veju'ukame ja panimai rojuke Satami ija'ina ve'ipisa ijí ara kajaho iviasa ijí nava'a.

²⁴'Enakaivo Na nimaa ja 'waravo. Vea ka'ene Godira 'otua ve'amani veijaho Satami opo eha ma'uako mihuna kaivo ja niho'o eha ni'ima'ura mihuna 'iamana. Nuni Roe Ojuta Hweha

²⁵'E'ikaivo ijihuni vea kajino Jesura eha vene ijá 'wama Amo ka'ene akúpa mwe'a ijihuni Natohwiji'o Na teimani 'wavujihuni maijaho Ara uneunechakija ea ka'ene vwiha mamaa vwihaji'inijija 'ee hena kavi'ini jihipuni una'a pavejume samaa renana kaivo kasimaaru najahana.

²⁶Nimai Amo A ija'ina venajara teamanamu.

²⁷'Enakaivo uneunecha mapokijija Amora Nuni ija tahi irechamana. Ijihuna'e eaka mapokijija Godoni Harihijaho hami pakama pahejura kaivo Amora huhusu hami hena kamuna. 'Eju'e eaka mapokijija Amoho hami pakama pahejura kaivo Hariahi huhusu hami hena kamuna. 'Enakaivo Hariahi ea irá ura renajiru Omaha'e nahume hu 'u'o Omaha hena kamuna 'wamana.

²⁸'Ene Hu pu ijá 'iama Ja ea ka'ene ahija apene oja vaja sirua pa'arenaujija Nuni roajive Nara vena'e joni ahija pa'areje ojuta hwena hiha.

²⁹'Ene Nuni 'unama ka'ene kisima'urijaho jona'e apene Nuni 'unamiji kama heha. Ijihuni maijaho Na matauvi'ina 'ee masuani hiji'ina. 'Ene veje joni oja masuani sonama namama.

³⁰Ijihuni hahi Nuni 'unamijaho samaumaa. 'Ene Nuni ahijijaho nimaa nimai nasina 'iamana.