Read Managalasi Matiu 17 Bible Online

Matiu 17 - Managalasi bible

Matiu 17

¹Na'ia iropu kwinu pa'are'eme Jesura Pitane 'ee Jemisine 'ee huni 'u'ua Joni ijá pupusu aherame huri'a jopatu'ura 'ahi ajima va'ara.

²'Enareja pu hine Jesu ka'eme puni una'i Huni haha ta'arohe niho'o ani'ina re'eme Huni nia urijaho niho'o hanane vea puna'i ri'eme Huni atehijija niho'o sajasa'ina rene hanajara.

³'Ejume pu ki'eme Mosisi'o Iraija'o Jesui pu'úmo hina vu'a 'wavara.

⁴'Ejumakame Pitara Jesu ijá 'wama Natohwe niho'o mamaa venareja nú iki roara'omo A ura rena'amajaho nú ikakaro ara pina Ona'e vene 'ee pina Mosisi ona'e vene 'ee pina Iraija ona'e vejava 'wa'eme

⁵ni'aha kwino 'imitia hanaji'ina puni hura kajaho sa'eme 'imitia vaja kajino ira roe ijá 'wama Ikaho Nuni Hariha ka'ene Na niho'o ura renia paraju'e oja mahi'inijinakúne ja Huni ira hami he'avara 'iamana.

⁶'Ejumakame tisaiporu ira kaji henareja niho'o tea junama parajume pu puni urania mwe'i aruhara.

⁷'Ejumakame Jesura puni roe ija 'uniravi'i ijá 'iama Juvujaho are'i kaivo 'uriha 'iamana.

⁸'Ejume pu 'urine nia ahasirima niriajaho ea 'aho'a pakivara kaivo Jesu huhuso kavara.

⁹'Enareja pu huri'a kaji rene ariha roi'i Jesura pu ijá 'iama Jara iviamajai raka ka'ene kavakaho niho'o ja ea pina pa'wara'avara. 'E'eje Emaa Puni Harihijara kwamareje kú'o 'urija kama'e iji'a nahama 'wara'avara 'iamana.

¹⁰'Ejumakame Huni tisaiporuepo Jesu apoma ijá 'wava Irakijihuna'e Sikuraipi Iraijara maraku'a rohuna 'úvare? 'wavara.

¹¹'Ejume Jesura eha vene ijá 'iama Iraijara maraku'a urana roe uneunechaka mapokijija amairihuna.

¹²'Enakaivo Na nimaa nimaa'e 'waravu Iraijana 'wavujaho nimarako roana. 'Ejume pu hu pahena pakavara kaivo pu apene raka ka'ene pu ura renau ja'ina'e 'ahaara. 'Ena'omo ija'ina'e Emaa Puni Hariha 'u'o pura puni ijijino sise'i 'ahahuna 'iamana.

¹³'Ejumakame Huni tisaiporuepo hejajaho Hu Joni Papitisita rona 'waramana. Jesura Sesama 'Avena Sisei Rosamaji Vejume Maranajina

¹⁴'Enareja pu iji'a roe ea mapoka hijajino roume ea pini roe Huni una'i nitupari savi'i ijá 'wama

¹⁵Natohwe nuni hariha numima. Ijihuni maijaho hu na'ia mapoka húmata siseraju'e nanamare'e 'one veni rene 'ee toi 'onuna.

¹⁶'Eju'e na apene Oni tisaiporue puni routa kaivo pu pavejume maranana 'wamana.

¹⁷'Ejume Jesura eha vene ijá 'iama Ike panimaa roji'ina ka'ene sisemakije Na na'ia icharo ja pu'úmo hi'ejo? 'Ene na'ia icharo Na ja najahapena va'ejo? Ahema iki Nuni roha 'iamana.

¹⁸'Ejume Jesura 'avena sisea kajaho 'urarahume ariha va'eme ni'aha kwino ijakaru kasimaa kajaho maranana.

¹⁹'E'ejume Huni tisaiporuapo hemi roajimareja ijá 'wava Irakijihuna'e nú 'avena sisea areri pasiomaho? 'wavara.

²⁰'Ejumakame Hu ijá 'iama Ijihuni maijaho ja hamia panimaa rojujihuna'e areria parenau. 'Enakaivo Na nimaa ja 'waravu joni nimaa roijaho areri kwava 'ina sa'ina'e re'amajaho ja 'warave huri'a karaho tajahena va'e kamakaru namina 'wa'avajaho huri'a kajaho tajahene kamakaru vahuna. 'Ene unenu'u pina jonuna'a kisina parehuna.

²¹'Enakaivo 'avena sisea ikakajija pava usevura kaivo 'aura areme siporua 'ojujari reju'e va usevura. Jesura Kwahuniji Kú'o Nahama 'Waramajina

²²'Ene pu Karari ahuma hijumakivi'i Jesura ijá 'iama Emaa Puni Harihijaho emaa puni ija tahi vahuna nitu'u renu.

²³'Eje pu 'anaa kwamareje na'ia no'opisu vaji namareje kú'o 'urihuna 'iavume pu niho'o temukavara. Temiporu Huni Takisi

²⁴'Ejume pu va'e Kapeniami use'eme ea ka'ene Temiporu takisia apeji'inijipo roe Pita apome ijá 'wava 'Ú joni Najahi'ina kajaho Temiporu takisi venuna raka? 'wavara. 'Ejume Pitara eha vene 'I'a 'wamana.

²⁵'Ene hu iji'a sei ajima roajaho Jesura marako'a ira 'warame ijá 'wama 'Ú Saimani a ichá vwihano? Mwe'a kehuni kinijihija ea irahipo puni takisia venahure? 'Ú puni takisia ehwapo venahura ho ea 'ahopo venahure? 'wamana.

²⁶'Ejume Pitara eha vene ijá 'wama Ea 'ahopuna 'wamana. 'Ejume Jesura eha vene ijá 'wama Ijihuni hahi ehwaha takisia pavenahura.

²⁷'Enakaivo vejuro'i pu ajina'ejakúne va'e sohi kimai oname kija amura ka'ene e'ama jihuni ira jara'amajaho monia tita apene Nuna 'ee onaji'i takisia ve'amana 'wamana.