Read Managalasi Matiu 19 Bible Online

Matiu 19 - Managalasi bible

Matiu 19

¹Jesura vu'a kajaho 'waravume pa'arejume Hu iji'a Karari are'i kaivo 'urine Jotani one kara'i Jutia va'ana.

²'Ejume ea niho'o mapoka mapoka Hu tamatiha va'umakame Hu ijino venaume maraniara.

³'Ejumakame Parasiepo Jesu vena kamareja pu Hu ijá 'wava 'Ú ea pina huni napara varapa pa'a mají rana'ipisa areri reja'e? 'wavara.

⁴'Ejume Hu eha vene ijá 'iama Ja nitama ea ka'ene parua napara aneja venajaho ja pataha kavare? 'iamana.

⁵'Ene Hu vukú'o ijá 'iama Ijihuna'e ea omaha oaha rana'i kaivo hu napara 'wa'amani veijaho no'o naparahe'i nikwinu'ina rehuna.

⁶'Enajihuni hahi pu majaa no'ohe'i pana kaivo haha nikwinu'ina rejara. 'Ena'omo Godira raka ka'ene ahuma venaume nikwisu'ina rejajija veje ea paturiamae ani irechami'avara 'iamana.

⁷'Ejume pu Jesu ijá 'wava Irakijihuna'e Mosisiho huni tamana vaji ei pini huni napara ranave pa'are'amajaho paruaha kajara asura venapi ma'i kaivo ranave ani va'amana 'úma 'waramane? 'wavara.

⁸'Ejume Jesura ijá 'iama Ijihuni maijaho joni ojijija kisima'ura ijihuna'e Mosisiho ijihuna'e 'waramana kaivo nitama anejijaho 'unama ija'ina pana.

⁹'Enakaivo Na ja 'waravu. Ea pipuni napara parui pini ahemo'amajaho parua kajara areri napara kajaho ranahuna. 'Enajihuna'e parua ka'ene huni napara kaji ranamajara napara pina 'wa'amajaho sisea vehuna 'iamana.

¹⁰'Ejume Huni tisaiporuepo ijá 'wava Parua naparahe'o puni hia ija'ina re'amajaho maijaho napara pasame parua paveja'a 'wavara.

¹¹'Enakaivo Jesura pu ijá 'iama Ike vu'akaho eaka mapokakija pana kaivo ea ka'ene Godira Huni harura pu mihajipo pupuso vu'a kajaho hena kahuna.

¹²'Enakaivo ea ani ani'ina niho'o napara pasavura. Ijihuni maijaho ea 'aho'a ohwapo nahenauji rene nija'ina rejura. 'Eju'e ea 'aho'a emaapo tanuvu'e napara pasavura. 'Eju'e ea 'aho'a Godoni 'unamiji vwihanare'e pu maopuipo puni ura ijine napara pasa'i 'ahiu'e pasavura. 'Enakúne ei pini ike vu'ake he'iro ve'amajaho hami he'amana 'iamana. Jesura Sesamaa Merajihajina

¹³'Enakaivo ea 'aho'apo kasima aherame 'eka roume Jesura Huni ija puni húmata 'ahi irechamihe siporua 'ona'avarono roajivara kaivo Huni tisaiporuepo eaka mapoka kajija 'urarahara.

¹⁴'Enakaivo Jesura ijá 'iama Kasima kajija maki'eje Nuni roajiva kaivo ja patanu'uriha. Ijihuni maijaho kasima ika'ina Godoni arijihuna 'iamana.

¹⁵'Enarena Hu Huni ija puni húmata 'ahi irechamarena Hu iji'a va'ana. Ea Ka'ene Uneunecha Rukima'urijina

¹⁶'E'eme ei pini roe Jesu ijá 'wama Najuhi'ine na unenu'u pina maa ichá'ina'e venareje majama hihunijaho ape'ejo? 'wamana.

¹⁷'Ejume Jesura ijá 'wama A iraka vene unenu'u pina ka'ene maijaho aporimo? Godira nikwinu'wi mamaana. 'Enakúne a ura majama hihuniji ape'i ve'amajaho a Godoni tamaneru ve'amana 'wamana.

¹⁸'Ejume hu Jesu ijá 'wama Godoni tamana ichihunichi ve'ejo? 'wavume Jesura ijá 'wama A ea pa'anae kwa'amana. Ea 'ahopuni napara paturi'amana. 'Ee nesa paape'amana. 'Ee a ea ira'atijino panama'amana.

¹⁹'Ene emahuapuni hura ve'amana. Oni ea ka'ene oni rori hijujija oja mi'amana. Areri ara oni haharu oja mahuja'ina'e mi'amana 'wamana.

²⁰'Ejume ea kajara ijá 'wama Na ike tamanakija nani ijá vesihura kaivo vu 'aho'a na raka vehune? 'wamana.

²¹'Ejume Jesura ijá 'wama A niho'o ariramaa kajara ura rena para'amajaho va'e oni uneunecha ka'ene navujija ni'aha kwino 'eke 'imé raname oni monia 'eke ea ka'ene uneunecha pa'ajihi vajiha. Ija'ina ve'amajaho oni uneunecha mapoka kahino akúpa 'ahi navakivi'i iji'a túna'i Na 'ararihie ro'amana 'wamana.

²²'Ejumakame ea kajaho hu ijí henarena hu niho'o temuma para'eme va'ana. Ijihuni maijaho hu uneunecha niho'o mapoka rukini jihuna'e avanana.

²³'E'eme Jesura Huni tisaiporu ijá 'iama Na nimaa nimaa ja 'waravu ea ka'ene uneunecha mapoka rukinijipo Godoni 'unami vahunijaho niho'o kisina 'iamana.

²⁴'Ene Na vukú'o ja 'wara'i veju. Maha nitirua huni titi vaji aruma vahuna samaa kaivo ea kukua uneunecha rukima'urijara Godoni ari vahunijaho kikisima'ura 'iamana.

²⁵'Ejumakame Huni tisaiporuepo ijí vu'a kaji henareja pu niho'o oja hwa'usaha'eme pu Hu ijá 'wava Ea irara areri Godoni ea re'ena? 'wavara.

²⁶'Ejumakame Hu pu niimaru kivi'i ijá 'iama Eaka mapokakipo ija'ina vehuna niho'o areria pana kaivo Godira Huhuso ijá kajaho vehuna 'iamana.

²⁷'Ejumakame Pitara eha vene ijá 'wama Nú uneunecha ka'ene mapokijija Onijihuna'e niare'i kaivo nú A 'arariha ojara'omo nú iraka 'ekahune? 'wamana.

²⁸'Ejume Jesura pu ijá 'iama Na nimaa nimaa ja 'waravu. Vea ka'ene mwe'a maiu'ina ve'avari veijino Ema Puni Harihijara Huni ruha hanaji'ina ka'ene asuma hi'amajino ja ea ka'ene nú pu'úmo ojukija ruha iropu ropu no'ohe'i ijí asuma hinareje Isureri opuni ituha iropu ropu no'o navujija 'otua vetihuna.

²⁹'Ejakame ea ka'ene Nuni ihijihuni hahi puni ara irechame puni 'u'ua poka irechame 'ee ma'ipija irechame oha oma irechamie 'ee puni mwe'a irechame hariha irechamiu ijija pu niho'o eha mai mapoka mapoka 'ekahuna 'ee majama hihuna apehuna.

³⁰'Enakaivo ea ka'ene iviamaa urana va'ujija túna'i rehuna kaivo ea ka'ene masuani túna'i va'ujija urasahuna.