Read Managalasi Matiu 2 Bible Online

Matiu 2 - Managalasi bible

Matiu 2

¹Vea ka'ene Jesu Petirihemi Juta vaji nahejari veijaho Herotiho Kinia rena hinana. 'E'eme ea hami hami vwihaji'ina vea ajimuja'i hijurepo Jerusaremi roara.

²Pu aporama ijá 'iava Jua puni Kinia ichí nahejare? Nú Huni china kama'i vea ajimuja'i kamareja ijihuna'e nú Hu oja mahare'e ka'i rou.

³Vea ka'ene Kinia Heroti ijí henajaho oja hwa'usunahana. 'Ejume Jerusaremi ora ka'ene hu hu'úmo hijajija 'u'o oja hwa'usunahara.

⁴'Ejumakame Herotira 'waravume pirisitia mama'ina 'ee Sikuraipi pu'úmo ahuma roume hu pu aporama ijá 'iama 'Ú ichihi Keriso nahehune? 'iamana.

⁵'Ejume pu hu ijá 'wava Poropetijara heha 'ahi venajaho Petirihemi Jutia vajina 'wavara.

⁶Ja Petirihemi ora ka'ene Jutia puni kwaa vaji hijujija ja niho'o túchamaa parehuna kaivo joni ei pini mai'o 'ajohi'ina ni'ima'ura renareje Isureri ora 'ajohahuna 'iamana.

⁷Heroti ea ka'ene hami hami vwihaji'iniji nesi aporame ijá 'iama Vea rakijiano ike chinakaho ajimane? 'iamana.

⁸'Enarena hu pu irechamie ijá 'iama Ja va'e Petirihemi ike Harihakaho samu va'o kamare ona ranave nuni roe na 'u'o vu'e Hu oja mahuma 'iamana.

⁹'Ejume pu kini huni vu'a hejume parajume va'eme china ka'ene vea ajimuja'i ajima roajaho ajima roe asitaha ruva'e ijí Hariha 'u'ua kajara hinani huriji naminana.

¹⁰'Ejumakame pu ijí china kaji kamareja pu niho'o mari'uma paravara.

¹¹'Ene pu va'e ijí ni'úha kaji aruvi'i kavajaho Hariha 'u'ua kajaho oaha Meri'i hinana. 'Ejumakame pu nitupari same oja Hu mahara. 'Ene pu puni tuja usee swara korutia 'ee senisia 'ee 'werua vajahara.

¹²'Ejume Godira navahi 'waravume pu kú'o pa'uname Herotira hinujaho va'i kaivo pu 'unama ani va'e puni ari va'ara. Juhahe Ijipiti Va'ajina

¹³'E'eme Natohwi jihuni ona oji'ini roe Josapi navahi ijá 'wama A iviamaa 'urine Hariha 'u'uakaho apene 'ee oaha aheme aseha Ijipiti va'amana. 'Enareje ijí hi'eje Nara kú'o 'warava henareje iji'a 'unama ro'amana. Ijihuni maijaho Herotira Hariha 'u'ua kaji 'ana'i 'ahau'ukamare'e sa'iro venukúnina 'wamana.

¹⁴'Ejume ijí na'ia kajiano hu 'urine Hariha 'u'ua kajaho apene 'ee oaha aheme Ijipiti va'ana.

¹⁵'Enarena pu ijino Ijipiti hi'eme Heroti kwamana. 'Ejumakame Natohwijara nitama poropeti ijá 'waramanaNuni Hariha Ijipiti vaji Nara Hu 'umejuta 'iamana. Herotira Musia Tisamajina

¹⁶'E'eme Heroti hina ajihana ea hami hami vwihaji'inijija hua pisiviara'e henarena niho'o ajivume ea 'aho'a irechamie ijá 'iama Va'e Petirihemi kasima ka'ene mai'o juara no'ohe'i papa'areji'inijihi 'aniha 'iavume va'ara. Ea ka'ene hua pisimiajipo 'waravume henaja'ina'e va'ara.

¹⁷Ikaho nitama poropeti Jeramaiara 'waramajara roe nimai renana. Hu ika'ina 'waramana.

¹⁸'Ejume pu Rama vaji he'eju'e virisia veji'i niramarume 'ee eahura ni'ima'ura ve'eju'e Recheru harihwapumu venana vo ea 'ahopo hu oja somahuna areria pana 'wamana. Ijipiti Rena 'Unama Roajina

¹⁹'E'ejume iji'a Heroti kwavumakavi'i Natohwi jihuni ona oji'inijara roe ijí Ijipiti Josapi navahi ijá 'wama

²⁰Ea ka'ene ike Hariha 'u'uake 'ana'i venajaho nikwamanakúne a kú'o 'urine Hariha 'u'uakaho apene 'ee oaha aheme 'unama Isureri va'amana 'wamana.

²¹'Ejume hu 'urine ijí Hariha 'u'ua kajaho apene oaha aheme Isureri va'ara.

²²'Enakaivo Akireasira Heroti ka'ene huni omijihuni tinia apene Jutia 'ajohuma henarena Josapiho jumana. 'Ejume Godira navahi ijá 'wama Karari va'a 'wavume hu ijí Karari va'ana.

²³'Enarena hu va'e ara iha Nasareti hinana. Hu ijá venajihuni maijaho poropetiepo raka ka'ene 'waravajija nimai re'avarono avanana. Pu ika'ina 'waravara Hu Nasareti ora 'wahuna 'iavara.