Read Managalasi Matiu 20 Bible Online

Matiu 20 - Managalasi bible

Matiu 20

¹'Enakaivo ijí Godoni arijihuni 'unamijaho areri ei pini kwai huni ajina juara na'ira'omo hu nina'i arihe pwehwaha aherame ijino kaukara ve'iro va'uja'ina.

²'Ejukame hu teamama para'eju'e pwehwaha ijá 'iama Ja kaukara iviasi ve'avajaho monia tita vajihuna 'iamana. 'Ejume pu kaukara ve'i va'ajivara.

³'Ejumakame hu sú'u sú'u vea ajiru naminu kamino nami'eme va'i kimajaho maketia kwai ea 'aho'a onekajaho pave'i kaivo maijino namimaravuma kimana.

⁴'Ejumakame hu pu ijá 'iama Ja 'u'o va'e aja 'ina juasi'i kaukara vejakame na ja eha areri renahuna vaji'uta 'iavume pu va'ara.

⁵'E'eme hu vea 'u'arirakano naminajaho nijaa venana'omo vukú'o vea hareha 'aha karo karu naminaji 'u'o ijá venana.

⁶'Enarena vukú'o vea ni'o'irono ve'eme vai'i kivume ea 'aho'a niiji ruha kajino namina ojara. 'Ejuma kimarena hu pu ijá 'iama Ja iraka vene roe ma'uraha ikino namina ojo? 'iamana.

⁷'Ejume pu hu ijá 'wava Ijihuni maijaho ea pina nú kaukara pamúhu'e avaju 'wavara. 'Ejume hu pu ijá 'iama Ijinakúne ja 'u'o va'ajime juasi'a kajino kaukara veha 'iamana.

⁸'E'eme vea nusirevume ea ka'ene juara anesurijara roe namikia 'waravume hura ea ka'ene kaukara veji'inijija 'umenaume niana roumakivi'i ea ka'ene túchamai roajivajino maraku'a eha vajiharena'e iji'a ea ka'ene urasaha roajaho vajihana.

⁹Ea ka'ene nusire mai aneja vene kaukara vejajija eha monia tita apejara.

¹⁰'Ejumakame ea ka'ene nimarako roe vejajipo vwihajajaho pu monia ni'ina ape'eja rojara kaivo pu 'u'o eha nija'ina monia tita vajihana.

¹¹'Ejumakame pu ijí puni monia kajaho 'ekareja iji'a ea ka'ene juara anesurijaho chichahaara.

¹²'Enakaivo ea ka'ene túchamai roajija vea ma'uako kaukara vejara kaivo nú ea ka'ene nimaraku roajivajija vea ni'ina 'e'une 'anúe kaukara harura vejara kaivo eha ka'ene nú múha kaja'ina'e pu mihana 'wavara.

¹³'Ejume ijí ea ka'ene juara anesurijara ea kwino ijá 'wama Ea nune ike hena na ja pasise'i 'ahiu kaivo nú ja pu'úmo nimaraku 'wavajaho ja monia tita iviasi kaukara vehuna avacharavara.

¹⁴'Enakúne joni eha 'ekareje joni ari va'avara. Nara eaka túchamai roaji eha areri ja mihu kaja'ina'e vaji'ujaho nara nuni ura ijino nija'ina vaji'ejukúne pavwiha'avara vo va'aji'avara.

¹⁵'Ú nuni monijaho nara ura reniuja'ina'e vehuna arerine? Na mamaa kaivo ja na kivujaho sisea kivo?

¹⁶'Enajihuna'e ea ka'ene urasahujija túna'i reje 'ee ea ka'ene túna'i rejujija urasahuna 'iamana. Jesura Kwahuni Vu'a No'opisuji Rona 'Waramajina

¹⁷'E'ikaivo Jesuho Jerusaremi va'i 'ahaume Hu Huni tisaiporu iropu ropu no'o ijá aherama ro vai'i ijá 'iama

¹⁸Hami heha nú iviamaaja kahino Jerusaremi va'akame pirisiti mama'ina Sikuraipia mama'inijipo Emaa Puni Harihijaho apene namahe 'anae kwa'amarono vehuna.

¹⁹'Ene pu Hu apene Jenitaru mihe pu apene sipana asutie 'ee hijahe 'ee icha 'ahi raname nerui 'anahuna. 'Ejakame na'ia no'opisu pa'are'eje vukú'o 'urihuna 'iamana. Oahi Jarima 'Waravajina

²⁰'Ejumakame Sepati oni harihija no'ohe'i jihipuni ohijara harihwaha no'ohe'i aherame roe Jesuni una'i nuana vetie unenu'u pina Hu jarimana.

²¹'Ejume Jesura hu ijá 'wama A iraki ura renao? 'wamana. 'Ejume napara kajara ijá 'wama Vea ka'ene Ara ea mapokakehi 'ajoha'amani veijino ike nuni harihijakija pina Oni ija mana'inija'i asumahije 'ee vu pina Oni ija ana'inija'i asuma hihuniji nahama 'warima 'wamana.

²²'Ejumakame Jesura pu ijá 'iama Ja niho'o raka ka'ene jara jaririvu kajihuni maijaho pahene pakavi'i maiji avaju 'iamana. 'Eji'i Hu 'ijá 'iama 'Ú ja Nara kapusia ka'ene mai'o ihunijaho ja areri ija'ina i'eja 'iavume pu ijá 'wava 'I'a nú areri i'eja 'wavara.

²³'Ejume Jesura ijá 'iama Ja nimaa Nuni kapusia vaja areri i'eja kaivo mai'o ea ka'ene Nuni ija mana'inija'i asuma hine 'ee ana'inija'i asuma hihunijaho Na ijija areri ijá pavajihuna. Ijí ruha ka'ene Nuni Omijara amairiujaho ea irahija'e iji pijiha jihipuna'e amairiahana 'iamana.

²⁴'Ejumakame Huni tisaiporu 'aho'a ka'ene iropu ropu ijija ijí vu'a kaji henareja pu ijí 'u'uahe'o pokahe'o puna'i niho'o ajinavara.

²⁵Ijihuna'e Jesura pu 'umenaume nianae Huni roume Hu ijá 'iama Ja nihena kivura. Jenitaru puni 'ajoha'ina mama'ina 'aho'ijija vu ajisina 'ahopo 'ajoahaura.

²⁶'Enakaivo ijí 'unama ka'ene ijá'inijija joni vaja kajaho panahuna. 'Enakaivo ea irara ura joni vaji natohwa re'i ve'amajaho hu joni pwea re'amana.

²⁷'Ene ijí joni vaji ei pini 'ura'i ve'amajaho hu joni pwea re'amana.

²⁸Ema Puni Harihijara roujaho ea mapoka Huni pwea pare'avarono roana kaivo Hu puni pwea re'i 'ahaume roana. Hu Huni hia ea mapoka'e mihana. Areri ema 'imenaana 'iamana. Jesura Ea No'ohe'i Nia Pa'ana Vejume Maraniajina

²⁹'Ejume Jesu ijí Jeriko rene va'eme ea mapoka pua'e 'ararihie va'ara.

³⁰'E'ejume ea no'ohe'i nia supama'inapo 'unamu toi hi'eme Jesuho va'e puni rori va'uma henareja pu Hu jarime ijá 'wava Natohwe Teviti oni Harihakera nú numiruma 'wavara.

³¹'Ejumakame eaka mapoka kajipo pu 'urarahe ijá 'iava Iruno'a areha 'iavara. 'Ejumakame ea kajipo no'o ira ajira ijá 'umeja Natohwe Teviti oni Harihakera numiruma 'umejara.

³²'Ejumakame Jesu areme ijá namiji'i pu 'umenae ijá 'iama Ja ura Na joni raka vena'ejo? 'iamana.

³³'Ejume pura ijá 'wava Natohwe nú ura Ara nuni nia venuhe niri'irono 'waravu 'wavara.

³⁴'Ejumakame Jesura pu numiramarena Huni ija puni nia 'ahi irechamihume puni nia maraniume pu Jesui pu'úmo va'ara.