Read Managalasi Matiu 22 Bible Online

Matiu 22 - Managalasi bible

Matiu 22

¹'E'ejume vukú'o Jesura eha vene haa 'waramarena ijá 'iama

²Godoni arijaho areri kinia natohwijara hariahi napasine'i veju'e 'iruma vei venuja'ina.

³'Enarena hu huni pwehija irechamiume pura 'ona apene ara 'ahosupuni va'e 'warave pura roe 'iruma kajaho i'avarono 'waravume va'e 'waravara kaivo pu ucha'asahe paroara.

⁴'Ejume hu vukú'o huni pwehija 'aho'a irechamie ijá 'iama Va'e ea ka'ene nara 'umenaujija ika 'wara'avara. Núni 'iruma amairie 'ee maha amene 'ee hanuha 'eka roe amairie uneunechaka mapokijija niareri rena hijukúne roajiha i'avara 'iamana.

⁵'Ejume ijí huni pwehija kajipo va'e 'waravara kaivo pu ucha'asahe ea pwina'a puni juasi'i va'ume ea pwina'a puni moni kaukara vejara.

⁶'Ejumakivi'i ea 'aho'ijipo ijí pwehija kajija 'eke hijiha'e 'ee 'aniuma kwamasahara.

⁷'Ejumakame kinia natohwa kajaho henajaho ijara ajivume hu huni amia irechamiume pura roe ea kajija 'anii raname 'ee puni ara kwaa kajaho veni jaume reranamana.

⁸'Ejume hu pwehwaha ijá 'iama Ike napasi nejari 'irumakaho niamairia irechavara kaivo ea ka'ene 'waravajija paroara 'iamana.

⁹'Enakúne iviamajai ma 'unamaka mapokakino va'ajimareje eaka mapokijihi piuni'avajaho 'warave pura roe ike napasi nejuri 'irumakaho i'avara 'iamana.

¹⁰'Ejumakame pwehwaha kajijahija 'unamutoi va'e ea ka'ene piuniva kajaho aherama roe ahumu va'ume ea sisea ea mai iji'i aherama roume napasi nejuri sea kajaho hijume itu'o'unana.

¹¹'E'ejume kinia natohwa kajara va'e ijí vaji arume ki'iro vai'i kamajaho ea kwino ijí ateha maa paapúsamana kamana.

¹²'Ejumakame kinia kajara ea kajaho ijá 'wama Ea nune a ichá vene napasi nejuri ateha paapúsa'ika'i roane? 'wavume ea kajaho huni vwiha pa'arenana.

¹³'Ejumakame kinijara pwehwaha 'waravume pura eakaho apene ija mumora kamome apene pi'onavume ma'ahi nutuma namajino va'arena nirame 'ee upaja chanichanivi'i namana.

¹⁴'Enajihuna'e Godira ea mapoka 'umenau kaivo ea makwinu kwinu iji pijihana 'iamana. Sisa Oni Takisia Vejuji Rone Apovajihuni Vu'a

¹⁵'Ejumakame Parasi ijí henareja va'e kanisorua pu'úmo ahuma hine 'unama ichá'ina venareje Jesura 'warama kajihuni 'ahi pata'aro'i kaivo tanu'ura'irono 'unama savara.

¹⁶'Enareje pu puni pwehija 'ee Heroti oni pwehijijihi pu'úmo irechamiume Jesuni va'areja pu ijá 'wava Najuhi'ine nú nihena kavu A vu'a nimaaru 'waramuna. 'Ene Godoni 'unama ka'ene aririjiru ea mapoka najahuna. 'Ene A ea kwinuru pavwihanuna. 'Ene eaka mapokijija ira nikwinu 'waramuna.

¹⁷'Enakúne Ara vwihana 'waruva heja A vwihanujaho nú ea iha Sisa oni takisia ve'eja ho pane 'wavara.

¹⁸'Ejumakame pura Jesu pisivi'iro vejajaho Hu nikima henarena ijá 'iama Ea ka'ene ira'asinakije ja raka vena Na vena kivo?

¹⁹Iviamajai monia ka'ene takisia apejujaho najiha kavume 'iavume pu oma kwinu nahara.

²⁰'Ejumakame Hura pu aporama ijá 'iama Ikaho irahuni ihe 'ee ikaho irahuni pikisa'e 'iamana.

²¹'Ejume pu Hu ijá 'wava Ikaho Sisa ona 'wavara. 'Ejume Hu ijá 'iama Ijinakúne Sisa oni uneunechijaho Sisa vajaha kaivo Godoni uneunechijaho Godi vajaha 'iamana.

²²'Ejumakame pu ijí henareja oja hwa'usuna- haume pu Hu raname ani va'ara. Kwamasahe 'Urihuniji Rone Apovajina

²³'E'eme veaka nikwinu'ina kajino Sajusia ka'ene kwamasahi'inijija kú'o pa'urihuna rojura'omo hu Huni roe Hu apovara.

²⁴'Ene Najuhi'ina Mosisi oni tamana vaji 'warumajaho ei pini napasi nenareje naparaha hariha panahe'eje hu kwa'amajaho huni 'u'uijara napara kajaho ahemareje huni hariha nahesamahuna 'waramana.

²⁵'Ena'omo nuni vajakino nú ea iropu no'ohe'ina'omo pokijara marako napara 'wahumakame naparaha hariha panahe'eme hu kwamana. 'Ejume vu ijihuni ni'ajahijara napara kajaho ahemana.

²⁶'Enarena vu ijí pokijihuni nijahijara 'u'o ahevume kame ijá vene apena va'e túchamai 'u'uijihuni usevara.

²⁷'E'eme iji'a napara kaji 'u'o kwamana.

²⁸'Ena'omo vea ka'ene vukú'o ea kwamasahi'inijipo 'uri'avari veijaho hu irahuni napara re'ena? Eaka mapoka kajihi puni napara renana 'wavara.

²⁹'Ejumakame Jesura eha vene ijá 'iama Ja hami pa'waravu. 'Ee Godoni irijaho pahena pakavu. 'Ee ja Godoni harura pakavura'omo ja hine ira sisea 'waravu.

³⁰Ea ka'ene kwamasahi'inijipo 'urimara'avajaho vukú'o panapasi nehuna kaivo niareri ona oji'ina ka'ene kahi akúpa 'ahi hijujipo hijuja'ina'e hihuna.

³¹'Ú ja Godoni ira vaji ea ka'ene kwamasahi'inijipo 'urimarahuna ka'ene Godira ika'ina 'warumajaho ja pataha kavare? 'iamana.

³²Hu ijá 'iama Na Eparahami oni Godi 'ee Aisiki oni Godi 'ee Jekapi oni Godia. Na kwamasahi'ini jihipuni Godi pana kaivo Na majama hiji'inijihipuni Godi 'úmana 'iamana.

³³'Ejumakame ea mapoka ijí Hura najaha kaji henareja pu oja hwa'usunahara. Varapa Natohwijina

³⁴'Ejume Parasiepo hejajaho Jesura Sajusia puni vu'a tanuvuma henareja pu ni'aha kwino nianaa roe huni rori ahuvara.

³⁵'E'eme puni vaja kajino Jua puni 'otua 'ajohi'inijara Jesu vena ka'i 'ahaume apoma ijá 'wama

³⁶Najuhi'ine Mosisi oni tamana irakijara tamanaka mapokijaho asitaha paranane 'wamana.

³⁷'Ejume Hu ijá 'wama Niho'o ni'ima'urijaho Godi ka'ene joni Natohwiji joni oja maho'o ni'aha kwino mahe 'ee joni vwiha maho'o ni'aha kwino mahe joni haruriji'i maho'o ni'aha kwino Hu mahuna.

³⁸Tamana ijara kwino ni'inane 'ee ijara kwino urana namu.

³⁹'Enakaivo vu tamana pina ka'ene ijihuni rorijaho niareri ija'ina jara joni haha'e vwihajuja'ina ea ka'ene joni rori hijujija oja mi'avara.

⁴⁰Ike tamana no'ohe'ikipo tamanaka mapokijija 'ee poropetia puni vu'ijaho 'uninamie navu 'wamana. Keriso Rone Apovajina

⁴¹'E'ikaivo Parasia kajija ahuvumakivi'i Jesura ika'ina'e aporamana

⁴²'Ú ja Kerisoho ichá'ina vwihajo 'ee Hu irahuni Hariha rojo? 'iavume pu Hu ijá 'wava Teviti oni Hariha 'wavara.

⁴³'Ejume Hu pu ijá 'iama 'Ene 'unama irakijino Godoni 'Aveni vejume Tevitiho Hu Natohwiji'o 'wamane? 'iamana.

⁴⁴'Ejume Natohwijara ijá 'wamanaNuni Natohwe Nuni mana'inika'i asuma hija kamareje Nara oni nana'eji'ina oni mumora hari irechamahuna 'wamana.

⁴⁵'Ú 'unama ichá'inijino Tevitiho Hu rone nuni Natohwe 'wamana re'amajaho Hu 'unama ichá'iniji Huni Hariha renane? 'iamana.

⁴⁶'Ejume ea pina niho'o Jesuni vu'a kajaho areri eha pa'waravara. Ijihuni vea kaji rene ijí kahi ijaho Hu juhamareja vukú'o túna'a unenu'u pina paapovara.