Read Managalasi Matiu 23 Bible Online

Matiu 23 - Managalasi bible

Matiu 23

¹'Ejume Jesura ea mapoka 'ee Huni tisaiporua ijihi pu'úmo ijá 'iama

²Sikuraipia 'ee Parasia vwihajujaho pu Mosisi oni tamana nihena kama paraji'ina rojura.

³Ja pura raka ka'ene 'waravujija vejurakúne pura 'unama ka'ene vejujijahija pave'avara. Ijihuni maijaho pu manajahura vo ijihipuni maijijahija pu pavejura.

⁴Pu uneunecha ka'ene ahisinijijahija iramare'e 'eka 'urine ea 'ahopuni sireha 'ahi nahuchamihura kaivo ijí pura ma'uaku'wi 'unama ni'ajihe 'unira 'urihuna niho'o pavejura.

⁵Uneunecha ka'ene pura vejujijahija emaapo ki'avarore'e pu ijá vejura. Pu era ki'avarore'e túkua ka'ene Godoni ira ijihuni vaji navi'inijaho 'eke 'ee ateha ani'iniji same 'urahojura.

⁶'Ene vea ka'ene ahaja ijuri veijaho pu ura eaka mapoki jihipuni una'i hi'irono ura rena parahuna. 'Ene pu Sinakoku ijikano eaka mapokijipo ki'avarore'e 'una'i kama hijura.

⁷'Ene pu maketia vaji emaapo pu 'ajorahuna'e ura renaura. 'Ee emaapo najahi'ina i'eje ohuna ura renaura.

⁸'Enakaivo ja paveje ea 'aho'a ja najahi'ina 'i'avara. Ijihuni maijaho joni Najahi'inijaho kwinu'wina. 'Enakaivo ja Huni vwehija.

⁹'Enakúne ja mwe'akino ea pina'e nuni Ome 'wa'ava. Ijihuni maijaho joni Oma kwinu'wi kahino akúpa 'ahi hino.

¹⁰'Enakúne ja paveje ea 'aho'a ja rone núni mama'inijihije 'i'ava. Ijihuni maijaho joni Natohwijaho kwinu'wi Kerisona.

¹¹'Enakaivo joni ei pini hu ura natohwa re'i 'aha'amajaho hu joni pwea rehuna.

¹²Ea irara ori'ini huni pinana ahasiri'amajaho Godira vetie hu ajuarana ohuna. 'Enakaivo ea irara ori'ini ajuarana o'amajaho Godira vetie huni pinana 'urihuna. Jesura Pu Aroaroti Namijuji Rone Namahajina.

¹³'Enakaivo Sikuraipi 'ee Parasia ka'ene ira'asinakije joni eha sisea namu. Ijihuni maijaho eaka mapokijipo 'unama ka'ene Godoni ari vahuniji jara hina tanu'urihu. Jara Godoni ara kajaho pava'i 'ahiu'e ea 'ahopo pava'avarore'e ja ijihuna'e tanu'urihura.

¹⁴Sikuraipi 'ee Parasia ka'ene ira'asinakije joni eha sisea namu. Ijihuni maijaho ja amuna pisivisavi'i puni aachia nesi 'eke 'ee ea pisivisame siporua jojora 'ojura. Ijihuna'e ja niho'o ni'ima'ura'e namahuna.

¹⁵Sikuraipi 'ee Parasia ka'ene ira'asinakija joni eha sisea namu. Ijihuni maijaho ja soha 'aha 'ee mwe'a 'aha va'ajimare'e are ea kwisu apeje ta'arohe jaa'ina renama ronare'e va'ura. 'Enakaivo vea ka'ene hu roe jaa'ina renujaho ja hu veju'e hura eha ka'ene veni va'e apehunijaho joni ehijaho asimareje kehi apehuna.

¹⁶Joni eha sisea namu. Nia supavi'ina ka'ene ea 'aho'a aherame va'ukera. Ja ea irara Temiporu 'urahi'i ichutoa pikivajaho unenu'u pina pana. 'Enakaivo ja ea irara Temiporu huni korutia 'urahi'i ichutoa piki'amajaho hu raka ka'ene 'waramajaho 'arariha'e vehuna.

¹⁷Nanamie nia supavi'inakije irakijarahara niho'o ni'ima'ure? Korutijarana ho Temiporu ka'ene rejume korutia kaji akuamahuna renane?

¹⁸'Ene ea irara swasa vejuri 'aijua 'urahi'i ichutoa pikivajaho unenu'u pina pana. 'Enakaivo ea irara 'aijua 'ahi swasa ka'ene namuji 'urahi'i ichutoa piki'amajaho hu iraka ka'ene 'waramajaho 'arariha'e vehuna.

¹⁹Nanamie nia supavi'inakije irakijarahara niho'o ni'ima'ure? Swasijarana ho 'aijua ka'ene vejume swasa kaji akuamahuna renajarane?

²⁰Ijihuna'e ea irara swasa vejuri 'aijua 'urahi'i ichutoa pikimujaho hu swasa vejuri 'aijua 'ee uneunecha ka'ene ijihuni 'ahi navuji 'urihi'i ichutoa pikima avanu.

²¹'Ene ea irara Temiporu 'urahi'i ichutoa pikimujaho hu Temiporu 'ee Godi ka'ene vaji hinujihuni ihi 'urahi'i ichutoa pikima avanu.

²²'Ene ea irara akúpi 'urahi'i ichutoa pikimujaho hu Godira hinuni tinia 'ee Godi ka'ene ijihuni toi hinujihuni ihi 'urahi'i ichutoa pikima avanu.

²³Sikuraipi 'ee Parasia ka'ene ira'asinakije joni eha sisea ni'ima'ura namu. Ijihuni maijaho ja joni taisi ka'ene Godi vajahajaho senisia suraka paareha 'ee imaria vajahura kaivo ja varapa mama'ina ka'ene arira vwihane numisarame 'ee nimai rojuji ja pavejura. Ja ikihi maho'o vehune sa'ina vo ja pavejura.

²⁴Ja nia supavi'ina ka'ene ea 'aho'a aherame va'ukije ja kuta ma'u'umaijaho kima sirira ato'aruvu vo maha ka'ene natohwijaho i'úsavura.

²⁵Sikuraipia 'ee Parasia ka'ene ira'asinakije joni eha sisea namu. Ijihuni maijaho ja joni kapusia 'ee tevua huraru sovura kaivo vajijaho nesa ani rene sisea itunavujara itusaha navu.

²⁶Parasia nia supavi'inakije marako'a kapusia 'ee tevua vajiji sovakame hura 'u'o mara'amana.

²⁷Sikuraipia 'ee Parasia ka'ene ira'asinakije joni eha ni'ima'ura namu. Ijihuni maijaho ja niho'o areri eucha sa'ina'omo hura kaha'ajaho 'eke sinara 'one amairia nirisame meruma amairia niho'o mavarasa'imaa rena navu kaivo kame vaja kamaho ea 'ata niho'o chire 'wame 'ee sakaha niho'o amajara'eju'e navuja'ina.

²⁸'Enajihuna'e ja 'u'o areri ija'ina. Ea 'ahopuni una'ijaho ja ea arira kaivo joni vajijaho ira'ata mama'ina 'ee sisea ani rena navu. Jesura Puni Eha Sisea Ichá'iniji Nahama 'Waramajina

²⁹Sikuraipia 'ee Parasia ka'ene ira'asinakije joni eha sisea namu. Ijihuni maijaho ja poropeti kwamasaha jihipuni arijijahija vene amairie mavarasa'ina venu va'u'e irechavu'e navu.

³⁰'Ene ja ijá 'wavure Nú vea ka'ene emahunupo hijari veijino hi'ipisa nú poropetia pa'ania'a 'wavura.

³¹'Enakaivo poropetia kaji 'ania jijahija sahu jopo avajara 'wivu hejujihuna'e ja areri joni sahipu vare'ina.

³²'Ene pura sisea ka'ene vejajihuni pwinijaho jara veje itu'o'umama.

³³'Ene ja niho'o tapare 'ee tapara kajihipuni 'u'uhija. 'Ú ja veni vahuni 'unamijaho ichá'ina asima va'eja?

³⁴'Ena'omo na nimaa nimaa ja 'waravu. Nara poropetia 'ee ea ka'ene vwiha arira vwihaji'ina 'ee Sikuraipia irechamiu'e joni roajivu. 'Enakaivo ja ea 'aho'a 'anie kwamasahune 'ee ea 'aho'a nerui icha 'ahi 'anie kwamasahuna. 'Ee ea 'aho'a joni Sinakoku ajivajijahija ja hijihae 'ee ara ara kaji sarame ruarahuna.

³⁵Joni ehijijipo ea arira ka'ene iki mwe'i hijajihi 'ania jihipuni 'aa joni 'ahi ariha jihuna'e ja eha apehuna. Eporu ka'ene ea aririjihuni 'aa arihaji rena roe Sakaraia ka'ene Perakaia oni harihijihuni 'aa ka'ene Temiporu 'ee swasa vejuri 'aijua riramo'oa kaji 'anaaji ro 'e'unana.

³⁶Na nimaa nimaa ja 'waravo. Uneunechakija roe ea ka'ene iviamaija hiju jihipuni haha 'ahi rehuna. Jesura Jerusaremi Oja Mahajina

³⁷Jerusaremi ore Jerusaremi ore jara Poropetia ka'ene Na irechamiume joni vu'ajijahija 'aniume kwamasahare 'ee ea 'aho'aka maijijahija muni 'aniume kwamasahara. Na'iaka mapokakikano Na ura ja nianaa roe rira kwinu irechami'irono areri 'u'orapo 'u'uhwaha'e nianaa roe puni sarapariji irechame ahuma hijuja'ina'e ve'iro vejujaho ja niho'o ura parenaura.

³⁸Heha! Joni seijaho jona'e ranavu'e ira'arama namu.

³⁹Na ja 'waravu. Ja iviasi rene ikikahia pakimu va'o iji'a ijá 'wahune ea ka'ene Natohwi jihuni iha 'ahi roujaho merajahu 'wahuna 'iamana.