Read Managalasi Matiu 24 Bible Online

Matiu 24 - Managalasi bible

Matiu 24

¹Jesuho Temiporui vaji rene ro 'e'une va'eme Huni tisaiporuepo roajime Temiporua kaji kama 'waravara.

²'Enakaivo Jesu pu eha vene ijá 'iama Ike uneunecha mapoka kija nikivo? Na nimaa nimaa'e ja 'waravu. Ike araka kehuni toi ja kivu kijahija ni'aha kwino tira'usahe arira na'eja vo muna pina niho'o pihuna toa pamakave nahuna 'iamana. Ahija 'Ee Sisei Hihunijina

³'E'ikaivo pu va'e Arivi huri'i hi'eme Huni tisaiporu pupusu roe Hu ijá 'wava Vea vecha ijá kajaho re'ena? Mwe'akara pa'are'iro ve'amani urijaho marako'a iraki rejakame nú kamareje A ivi'a ro'iro venu 'wa'eje A ro'ena 'wavara.

⁴'Ejume Jesura pu eha vene ijá 'iama Ja hami kivakame ea 'aho'a ja papisimisa'avara.

⁵Ea ani ani'ina mapoka Nuni iha 'ahi roajimareje ja pisimia Na Kerisonakúne Nuni roha 'i'i kaivo ja aherama 'unama ani vahuna.

⁶'Enakúne ja he'eje kwaa araka mapokakija ajira vene 'ee ijí ajira vehuni pinana kajaho 'urina rohuna. Ija'inijaho re'eja vo ijaho mai'o ura paru'e'unukúne patea juna'avara.

⁷Ijihuni maijaho kwaa ara mama'ini jipuhipo vu ara mama'ina 'aho'ijihi pu'úmo ajira veje ara 'ahosupo vu ara 'ahosu pu'úmo ajira vehuna. 'Ene ora vea rene 'ee mwe varivura rohuna.

⁸'Ena'omo ikipuhipo aneja re'avajaho areri napapo hariha nahe'iro haha hejuja'ina'e rehuna.

⁹'Enajihuna'e ea 'ahopo ja 'eka sise'i 'ahie 'ee 'anie kwamasahuna. Ijihuna'e kwaa araka mapoka kijahija Nuni ihijihuni hahi ja niho'o senama paranihuna.

¹⁰'Enareje eaka mapoka ka'ene Nuni 'unama 'urahojujijahija ijaho are'i kaivo ta'arohe ani vahuna. 'Ene ea 'aho'a ea 'aho pu'úmo sena vetiarahune 'ee sise'i vetiarahuna.

¹¹'Ene poropetia ira'asipo mapoka roajimareje ijipuhipo najahakama'e ea mapoka pisimisame 'unama ani vahuna.

¹²'Ene sisea niho'o ni'ima'ura rena para'ama jihuna'e erapo oja 'ekaravujaho roe pa'arehuna.

¹³'Enakaivo ea ka'ene Nuni 'unami jihunijikano kirasaha hi'avajipo pu niho'o maranihuna.

¹⁴'E'eje ijí Godoni arijihuni vu'a maa maiu'iniji kwaka mapoka kakino najahapene ohuna. 'Ejakame kwaaka mapokakino ea ka'ene hijujijahija ijaho hina ka'eja'e iji'a mwe'akara pa'arehuni urijaho rohuna. Sisea Ni'ima'uri Rehuni Veijina

¹⁵'Ea irara ike ta'amajaho hami he'amana. Poropeti Tanerura 'warama ja'ina'e vei pini niho'o sisemai pakavi'inijara akuavuri tiniji namija ka'avajaho

¹⁶ea ka'ene Jutia hijujijahija ni'aha kwinu juhahareje huri'i va rana'avara.

¹⁷'Eje ea ka'ene 'ahutoi hi'avajija paariha va'e puni sea vaja kukua 'eka'avara.

¹⁸'Eje vu ea ka'ene juasi'i 'uraho'amajaho pa'unama roe huni ateha 'eka'amana.

¹⁹'Enakaivo vea kajara nitu'amani veijaho naparaka hari'inijija 'ee hariha musa iji'inijijahija niho'o sisesei hihuna.

²⁰Vea ka'ene ija'inijija siporua 'ojakame jara juhahunijaho sapatia 'ee neha rija pare'amana.

²¹Ijihuni vea kajino sisemai ka'ene rehunijaho nitama mwe'a akúpa vejume hinapena roajino sisea ija'ina parenajara rehuna. 'Enareje iji'a túna'a vu ija'ina parehuna.

²²Natohwijara vea kaji patu'ua ve'amajaho ea pina areri mai'o pahihuna. Ea ka'ene Hura iji pijihajihi puni hahi Hu veje vea kajaho tu'ua rehuna.

²³Ei pini ja ijá 'i'amajaho Keka! Keriso ikena karena 'i'amajaho ja niho'o panimaa ro'avara.

²⁴Túna'i ea 'ahopo ira'atijino na Kerisona 'iave vu ea 'ahopo ira'atijino na poropeti 'iahuna. Pu ija'ina venareje uneunecha mapoka veje ea mapoka oja hianava kivi'i pisivie ea mapoka nimaa rohuna. Pu ea ka'ene Hura iji pijihajihija pisivihuna vo areri parehuna.

²⁵Hami heha! Mai'o raka ka'ene rehunijaho Na ni'waravuta.

²⁶'Enajihuna'e ea 'ahopo ika 'iava he'avajaho Hu karohu nechi'ina 'iava he'avajaho niho'o pava ka'avara. 'Ene kare sea vajina 'iava he'avajaho niho'o panimai ro'avara.

²⁷'Enakaivo vea ka'ene Ema Puni Harihijara ro'amani veijaho aresi vei ajimuja'i pi'ime va'e vea 'onuja'i 'e'unuja'ina'e rehuna.

²⁸Unenu'u pini kwama na'amajaho púrúha ijá emo'eja. Emaa Puni Harihijara Rohunijina

²⁹Sisemai re'avari túna'i ni'aha kwinu vea na'ive masapa pahanahuna. China jahe'usahe ariha akúpa puni harurijihija 'unirama usihuna.

³⁰'E'eje ijá re'eje ijihuna vaja kajino Ema Puni Harihijihuni aacha ka'eje ijí 'imitia vaja kajino harura ni'ima'ura hanaji'iniji'i roakame eaka mapoka ka'ene mwe'akaki hijujijahija pu kamareje niho'o niramaruma parahuna.

³¹'E'eje Hura Huni ona oji'ina irechamiakame ijipuhipo tauja hwasihakame Huni ehijaka mapoka ka'ene kwaka mapokakino hijujijahija ni'aha kwinu nianae aherame roe rira kwinu rohuna. Matakijara Najahujina

³²'Enajihuna'e Na iviamajai tavo'a puniji apúsamare'e haa 'wara'ejukúne hami he'avara. Ijí tavo'a kajara 'anaare'e vukú'o nahenare'e sisira apúsamujaho ja nihena kivujaho vei mai mara'i venu 'wavura.

³³'Ena'omo ja uneunecha kajipo aneja vene reje ki'avajaho Hu iviamaa ijí vwicha jiami namine roi venu ro'avara.

³⁴Na nimaa nimaa'e ja 'waravu. Ea ka'ene iviamajai mai'o hijukijahija pakwamasa'eje ikaho rehuna'e 'waravu.

³⁵Ike akúpa mwe'a ijaho ni'aha kwinu pa'arehuna vo ike Nuni irijija niho'o papa'arehuna. Ei Pini Vea ho Vea Mukiji Hena Kahuna Pana

³⁶Ijarahara rehuni veijaho eaka mapoka kijahija pahena pakavu'e ona oji'ina ka'ene akúpi 'ahi hijujijahija 'u'o pahena pakavu'e Harihiji 'u'o pahena pakamu kaivo Omijara Huhusu hena kamu.

³⁷Vea ka'ene Ema Puni Harihijara ro'i ve'amani veijaho areri Noara hinani veija'ina'e rehuna.

³⁸Vea ka'ene toa kajarahara paitu'o'unani veijaho pu hine ahaja inareja javamareja toa sisea inareja napara pina 'waha raname pina 'waha raname pina 'waha raname apene va'o va'ume va'e vea ka'ene Noara sisima vaji ajimaji 'e'ujara.

³⁹Pu pahena paka'eme toi itu'o'une imwasamia ja'ina'e Emaa Puni Harihijara ro'amajaho ija'ina rehuna.

⁴⁰Vea ka'ene Hura ro'amani veijaho ea no'ohe'i puni juasi'i hine kaukara ve'ira 'omo ea pina ape'i kaivo pinijaho makahuna.

⁴¹'Eje napara no'ohe'i sei vaji pu hine kaukara puna ve'ira'omo ea pina ape'i vo pinijaho makahuna.

⁴²Ijihuni hahi vea ka'ene joni Natohwijara rohunijaho ja pakame paheji'inakúne amairiarame areri rena paraji'i hiha.

⁴³'Enakaivo ja niheju. Sea anesurijara he'eje nesa apeji'inijara vea irakiji roe nesa ape'i ro'ipisa hu 'ajohe tanurahakame hu paroe huni sea ruarahe nesa apeja'a.

⁴⁴Ijihuni hahi amairiarame nirisame areri rena para'eje 'ajaha hi'avara. Vea muka ka'ene ja pa'ana rone matauvajino Ema Puni Harihijaho rohuna. Pwea Ka'ene Uchaha Pa'aji'o Uchaha Rukiniji'o Puni Vu'a?

⁴⁵'Ú pwea irara pasevi'ine 'ee vwiha hami vwihaji'ine huni natohwijara huni sea 'ajohe 'ee 'iruma vea 'ahi areri vajihuna'e ranamane?

⁴⁶Vea ka'ene huni natohwijara roi'i kave huni pwea kaukara veji'i hi'amajaho hu merajahuna.

⁴⁷Na nimaa nimaa'e a 'waravu. Hu huni kukua mapoka kajija maho'o huni ija tahi ranave hura 'ajohuna.

⁴⁸'Enakaivo ea ka'ene pwea siseijaho hu oja vaji ika ronu Nuni natohwijaho paro'eju'e 'aha jora renu ro'ika'i

⁴⁹aneja vene hu huni napuhija hijiha'e hu 'iruma maina hine 'ee toa sisea iji'inijihi pu'úmo toa inonana.

⁵⁰'Ene vea ka'ene pwea kajihuni natohwijara ro'amani veijaho hu pakame pa'ajo'eje rohuna. Vea ka'ene Hura rohunijaho pakame paheji'ina.

⁵¹'Enareje hura eha mahareje ranave ea ka'ene ira'asinijipo tinia ka'ene niramarume 'ee upaja ja'i'uji'i hijuri tinijino vahuna.