Read Managalasi Matiu 26 Bible Online

Matiu 26 - Managalasi bible

Matiu 26

¹'Ejumakame Jesura Huni tisaiporua vu'a ka'ene 'waramajaho pa'arejumakavi'i Hu ijá 'iama

²Ja nihena kavu. Na'ia no'ohe'i pa'are'eje Pasova vea re'amajino Ema Puni Harihijaho pu apenareje icha 'ahi nerui 'anahuna 'iamana.

³'E'eme pirisitia mama'ina 'ee ema puni mama'inijija va'e pirisitia natohwa ka'ene Kaiapasina 'wavujara hinujino ahuma hijara.

⁴'Enareja pu ahuma hine hemi vu'a 'wama pirahe Jesu ichá'ina'e nesi apena 'anaa kwahuniji 'wavara.

⁵'Enakaivo pu ijá 'wava Oo nú ike ahaja ijuri veakino ijá ve'avajaho eaka mapokakipo 'ara'eja 'wavara. Jesu Petani Senisi 'Onahajina

⁶'Enakaivo Jesuho Peteni va'e Saimani ka'ene reporosia rukinijihuni sei hinana.

⁷'E'eme napari pini huni roe kavapwa ka'ene muni vejara'omo ijihuni vaji senisia ka'ene monia ni'ima'ura 'imehunijaho apena roe Jesuho 'iruma iji'i hi'eme hu Huni húmata 'ahi usetiana.

⁸'Ejumakame Huni tisaiporua ijí kamareja ajina'eme ijá 'wava Irakijihuna'e ike senisiakaho manisamo?

⁹Ike senisiakaho apena va'e ea 'ahopuni moni aneja ni'ima'ura 'imenareje ea ka'ene uneunecha pa'ajihi vajiha'a 'wavara.

¹⁰'Ejumakame Jesura ijá 'iama Ja iraka vene naparakaho 'uraraho? Hu niho'o unenu'u pina mamaa Nununa'i vene avanu.

¹¹'Enakaivo ja ea ka'ene uneunecha pa'ajijahija na'iaka mapokakaho ja pu'úmo hihuna kaivo Na ikaho ja pu'úmo majama pahihuna.

¹²Ike hura senisia ka'ene Nuni haha 'ahi usetiakaho Nuni haha ka'ene kwananahuniji amairia avanana.

¹³'Enakaivo Na nimaa nimaa ja 'waravu Mwe'i kwaaka mapokakino ike Godoni vu'ake ichihi chihi naja'avajaho ike naparakara raka ka'ene Nuna'e venukaho pu 'wavi'i hu vwihahuna 'iamana. Jutasira Jesu Nahamahuna'e Nimaa Venajina

¹⁴'E'eme ijí pu ea iropu ropu no'ohe'ina vaja kajino ea pina huni iha Jutasi Isikariatina 'wavujara pirisitia mama'inijihi puni va'ana.

¹⁵'Enarena ijá 'iama Nara Hu najahe nahama ja 'wara'ujaho ja raka na vaji'eja? 'iamana. 'Ejume pu ni'aha kwino monia siriva mapoka (30) tahe vajahara.

¹⁶Ijihuni vea hu aneja venarena Hua'e nahamahuni 'unamijaho samana. Jesura Pwehwa Pu'úmo Pasova 'Iruma Inajina

¹⁷'E'eme puretia isitia paajihuni vea amurijino Huni tisaiporuepo roe Jesu ijá 'wava 'Ú A ura nú ichihichano Pasova veijino ihunijaho Ona'e amairia'eja? 'wavara.

¹⁸'Ejume Hura pu ijá 'iama Ja ara natohwiji va'ajimareje ea pina piuna'avajaho ijá 'wara'avara Núni Najahi'inijara ijá 'warumane Vea niroe tu'u rejukame Pasova veakaho oni sei Nuni tisaiporu pu'úmo vehuna 'úmana 'wa'avara.

¹⁹'Ejume Huni tisaiporua kajija Jesura 'warama kaja venareja pu Pasova amairiara.

²⁰'Ena'omo vea nusire'eme Hu Huni tisaiporua iropu ropu no'ohe'ijihi pu'úmo 'aijua rori hijasama hijara.

²¹'Ene hine 'iruma iji'i Hu ijá 'iama Na nimaa nimaa ja 'waravu Joni vajakino ei pini Na nahamihuna 'iamana.

²²'Ejumakame mapokijija niho'o temukama para'eme 'urine ea kwinu kwinu Hu apome ijá 'wava 'Wi! Natohwe Na pane? 'wavara.

²³'Ejume Hu eha vene ijá 'iama Ea ka'ene Na hu'úmo huni ija tevui vaji apúsamukara Na nahamihuna.

²⁴Ijí Emaa Puni Hariha kajaho areri nitama Godoni Ira vaji Hua'e rone 'warama ja'ina'e vahuna kaivo ea ka'ene ijí Hu nahama ea 'aho'a 'waramajaho vi eha niho'o sisea ape'ena. Maijaho ike ea ka'ene Emaa Puni Hariha nahamahuna kajaho panahe'ipisa mamaa'e veja'a 'iamana.

²⁵'Ejumakame Jutasi ka'ene Hu nahamahuna kajara eha vene ijá 'wama 'Wi! Najuhi'ine na pana 'wamana. 'Ejume Jesu ijá 'wama Ara orono 'waramana 'wamana. Natohwijara Kwamaji Vwihaji'i 'Iruma Ihunijina

²⁶Ijí pu hine i'eme Jesura puretia kajaho apenarena Godoni siporua 'one teamani 'wa'ika'i iji'a túchamaa Huni tisaiporua vajihi'i ijá 'iama Ikaho Nuni hahakúne 'eke iha 'iamana.

²⁷'Enarena vukú'o kapusia ka'ene toa rukinijaho apene Godoni siporua 'one teamani 'wa'ika'i pu vajihi'i ijá 'iama Ja maho'o ikaho iha!

²⁸Ijihuni maijaho ikaho Nuni 'aa ka'ene eaka mapoki jihipuni siseijihuna'e 'arihakame puni sisea pa'arehunaka nimaa vena 'waramajina 'iamana.

²⁹'Enakaivo ike heha! Na vukú'o ike aja'ina riha kakaho ja pu'úmo paahume hina ihuna vo va'e vea ka'ene jara Nuni Omijihuni ari ro'avaji'a vukú'o ja pu'úmo maiu'ina'e ahuma ihuna 'iamana.

³⁰'E'eme pu javaa vene pa'arejume usema Arivi huri'i va'ara. Jesu Pitara Hemahuniji Rona 'Waramajina

³¹'Ejumakame Jesura pu ijá 'iama Ja iviasi na'iakino Nuni hahi ja juhahuna. Ijihuni maijaho nitama Godoni ira vaji ika'ina 'warumana.Nara ea ka'ene sipia 'ajohi'ina kajaho 'anaakame ijí sipia kajijahija juhaha jirijiri va rana'eja 'úmana.

³²'Enakaivo Na kwamareje vukú'o 'uri'uti veijaho Na urane kami Karari va'eju 'iamana.

³³'Ejumakame Pitara eha vene Hu ijá 'wama Eaka mapokakija pu Oni hahi kame ni'aha kwinu varanahuna vo na niho'o A papataarora'eju 'wamana.

³⁴'E'eme Jesura Pita ijá 'wama Na nimaa nimaa a 'waravu. Iviasi na'iakikano iji'a 'u'ora 'ume'avarono a 'aha no'opisu Na hemi'ena 'wamana.

³⁵'Ejume Pitara ijá 'wama Na A Hu'úmo kwahuna vo na pahema'eju 'wamana. 'Ejume Huni tisaiporu 'u'o maho'o ija'ina 'wavara. Jesura Ketasimani Siporua 'Onajina

³⁶'Ene Jesuho Huni tisaiporu aherama roarena roe kwaa iha Ketasimani pu ijá 'iama Ja ikano hi'eje Na va'e karohi siporua 'ojuma 'iamana.

³⁷'E'eme Jesura Pita aheme 'ee Sepati oni harihijaho no'ohe'i aherame pu pu'úmo va'ejume Hu niho'o temumarena oja tura'i 'ahaa paranana.

³⁸'Ejume Hu pu ijá 'iama Nuni ojakaho niho'o temukimare'e oja sui 'ahiukúne ja ika mai'o hine 'aiha veji'i hiha 'iamana.

³⁹'E'eme Hu ma'uaku'wi kahakaru vanamarena'a iji'a mwe'i 'one siporua 'one ijá 'wama Amo ike kapusia ikaho maka'eje asitiha ruva'ama kaivo ikaho Nuni ura pana 'avo Oni urijara renama 'wamana.

⁴⁰'Ejume Hu kú'o 'unama Huni tisaiporu puni vai'i kivume pu nejuma kimarena Hu Pita ijá 'wama 'Ena'omo ja vea muka kwinu Na hu'úmo mai'o hine 'aiha pave'eja?

⁴¹'Ene 'aiha veji'i siporua 'oha. 'E'irakúne ja siseijihuni harurijaho pava'e aru'avara. Joni 'avenijaho ura rena paranu kaivo joni hahijaho niho'o ajuarana paranu 'iamana.

⁴²'Enarena Hu kú'o pu irechami'i kaivo siporua 'o'i va'arena siporua 'one ijá 'wama Amo ike kapusia ikaho maka'eje asitiha ruva'ama vo pa'ana re'amajaho Na ihuna. 'Enakúne Oni ura ijara renama 'wamana.

⁴³'Ejumakame Hu kú'o 'unama roi'i kimajaho pu niho'o nia vahima parajume notuara.

⁴⁴'Ejumakame Hu pu maki'i kaivo Hu 'aha no'opisuji siporua 'o'i 'unama va'arena Hura kú'o nisú'u 'warama kaja'ina'e vukú'o 'waramana.

⁴⁵Hu kú'o 'unama roarena Huni tisaiporua ijá 'iama 'Ú ja mai'o hina notue 'ee ojuta hwejo? Iviamaa vea muka nituranu. Ema Puni Harihijaho emaapo nahamahareje ea sisea puni ija tahi ranahuna.

⁴⁶'Ee 'urija nú va'a. Ea ka'ene Na nahamihunijaho nikara'i rou. Jesu Kamovajina

⁴⁷'Ejumakame Hu ijá 'wara'ejume Jutasi ka'ene Huni tisaiporua pinijaho ea mapoka juha hajaa so'wa 'eki'inijija emaapuni ea mama'ina 'ee pirisitia mama'inapo irechamiume roajivara.

⁴⁸'Ejume Jutasira nimarako ika'ina 'waramana. Nara va'areje ea ka'ene Hu 'ajovi'i ura mina veja ki'avaji ape'avara 'iamana.

⁴⁹'Ena'omo hu ajiru Jesuni nini 'e'unarena Jesu ijá 'wama Ese Najuhu'ine 'wa'i kaivo ura mina venana.

⁵⁰'Ejumakavi'i Jesura ijá 'wama Ea nuna a iraka ve'irono roaji vena 'wa'eme eaka mapoka kajipo usevajino Jesuho ijija 'unavara.

⁵¹'E'eme Jesuni tisaiporua pini ija jora rova kajikano so'wa apene 'anaumakame pirisitia natohwi jihuni pweijaho 'ataa 'uhusahana.

⁵²Jesu ijá 'wama Oni so'wa huni ruhi ranama. Ijihuni maijaho ea irahipo so'wa 'ekujaho pu so'wa 'aha kajino kwamasahuna.

⁵³A mai'o Na pakimuna'e kavu! Nara Nuni Omiji 'ume'ipisa Hu Huni ona oji'ina iviamaa 72,000 asisame irechavakame Nuni roa'a.

⁵⁴Ija'ina ve'ipisa Godoni ira vaji nitama 'waramajaho iviamaa ija'ina pareja vo ika'ina rehuna 'waramana.

⁵⁵'Ejume ijihuni vea kajino Jesura eaka mapoka kaji ijá 'iama Na ea nesa apeji'ina'omo ja juha so'wa 'ee hajaa vena Na apeni'iro roare? Na na'iaka mapoka kame Temiporu vaji hine ja najahura vo ja Na paapeniura 'iamana.

⁵⁶Ija'ina'e rejumakame nitama Godoni Ira vaji raka ka'ene 'waramajaho nimaa nimaa'e renuna 'iamana. 'E'ejume Huni tisaiporua mapokijija Hu raname juhahe varanavara. Jesu Aheme Kanisoru 'Ee Kaiapasi Oni Roajina

⁵⁷'E'eme ijí ea ka'ene Jesu apeja kajipuhipo Jesu apena va'e pirisitia natohwa ka'ene Kaiapasina 'wavujihuni sei va'ara. 'E'eme Sikuraipia 'ee emakinijija ijino pu pu'úmo ahuma hijara.

⁵⁸'Enakaivo Pita hu ijino Huni túna'i makameri roi 'ararihaa va'e pirisitia natohwi jihuni apirunijino va'ana. 'Ene aruma va'e hirisima ka'ene hijajija kimarena ijihipuni vaji hiji'i ki'eje pu ichá veje ki'i 'ahaume roe ijí hinana.

⁵⁹'Ejumakame ijí pirisitia mama'ina 'ee kanisorua maho'o kajipo vu'a ira'ata 'ekarene Jesu namahareje apena va'e 'anaa kwa'amarono saravara.

⁶⁰'Enakaivo ijí ira'ata mapoka nipiunivara vo ijí pura vu'a ka'ene 'wamareje Jesu namahunijaho areri niho'o parenana. 'Enakaivo ijihuni túna'i ea no'ohe'i usema roara.

⁶¹'E'eme ijí ea kajipo ijá 'iava Ike Ea ikarahara ijá 'warumana Godoni Temiporukaho Nara veje tirausahakame vukú'o veje na'ia no'opisu vajijino ni'aha kwinu 'urinareje nami'ena 'úmana 'wavara.

⁶²'Ejumakame ijí pirisitia natohwijara 'urina nami'i kaivo ijá 'wama 'Ú A eha pa'waru'ena? 'Ú ea ikija iraka'e hine A ronahe ikaho 'waruvo? 'wame 'wamana.

⁶³'Enakaivo Jesuho niho'o ira pa'waramana. 'Ejumakame pirisitia natohwa kajara ijá 'wama Godi ka'ene mai'o hiji'inijinakúne 'waruma. A Keriso ka'ene Godoni Harihiji re'amajaho 'waruma 'wamana.

⁶⁴'Ejumakame Jesu ijá 'wama A ni'warimu kajina. Ema Puni Harihijaho ka'eje ija mana'ini harurija'i asuma hine 'ee 'imitia vaji akúpa 'ahi rena rohuna 'wamana.

⁶⁵'Ejumakame ijí pirisitia natohwa kajara huni ateha kajija 'unirame puachavi'i ijá 'umena Ea kakaho hine Godi matahooo nú niho'o ei pina Hu panamahu kaivo Hura Godi matahajaho ja nihejara.

⁶⁶'Ena'omo ja ichá'ina'e vwihajo? 'Ejume pu eha vene ijá 'wava Hu kwahuna 'wavara.

⁶⁷'Ejumakame pu Hu cheri niuri 'otie 'ee haisi 'anae 'ee ea 'ahopo nonu tahijahara.

⁶⁸'Eji'i pu Hu sivaa ijá 'wava A Kerisonakúne ivi'a raka ka'ene renuji 'warume 'ee ea irahipo A 'anaujaho 'waruve heja 'wavara. Pitara Jesu Hemahajina

⁶⁹Ijá ve'eme Pitaho ijí ara rori hi'eme napara pwea pini roarena hu ijá 'wama A 'u'o Jesu ka'ene Karari oriji'i 'urahonuna 'wamana.

⁷⁰'Enakaivo hu puni una'a kajino hema ijá 'iama Ara raka ka'ene rone 'warimujaho na niho'o puruva retiu 'wamana.

⁷¹'E'eme Pita hu iji'a kami vwicha jiami va'eme vu napara pwea pini kamarena ijí ea ka'ene vwicha jiami namijaji ijá 'iama Ike ea kakaho Jesu ka'ene Nasareti oriji'i 'urahonuna 'iamana.

⁷²'Ejumakame Pitara kú'o hemarena ichutoa pikivi'i ijá 'iama Na niho'o ea kajaho pahena pakavura 'iamana.

⁷³Ijihuni túna'a kajakaru ea ka'ene ijí manamija kajipo roareja Pita ijá 'wava Nima'e a 'u'o puni ea pina. Ijihuni maijaho ara ira ka'ene 'warumujara samaa renu 'wavara.

⁷⁴'Ejume hu aneja vene ira sisea 'waravi'i ichutoa pikime ijá 'iama Ea ikaho na niho'o pahena pakavi'ina 'i'eme ni'aha kwino 'u'ora 'umenana.

⁷⁵'E'eme iji'a Pita Jesura ira ka'ene 'waramajaho vwihanana. 'U'ora mai'o 'ume'i ve'eje a Na 'aha no'opisu hemi'ena. 'Ejume hu va 'e'une nirame niho'o oja tura'i 'ahaana.