Read Managalasi Matiu 28 Bible Online

Matiu 28 - Managalasi bible

Matiu 28

¹'Ejume Sapati pa'arejume Hurapoki sú'u sú'u vea nitu'eju'e Meri Matarini'o vu Meri ka'ene napara pina iji'i pu no'o va'e ijí eucha kaji ka'i 'ahiume roara.

²'E'eme mwe'a varivura niho'o ni'ima'ura ro'eme Natohwi jihuni ona oji'ini kahi akúpa 'ahi rena roarena muna kajaho tahumapene rori rova'ika'i ijihuni toi asuma hinana.

³'E'eme ijí Huni hahijara hananajaho areri veapo pi'ivu kivuja'ina'e rene 'ee huni atehijaho niho'o sajasa'imai renana.

⁴'Ejumakame ea ka'ene ijí 'ajoha namijajija niho'o simarame tea junama para'eme areri kwamasahu ja'ina'e renaara.

⁵'Ejumakame ona oji'ina kajara eha vene napara kajija ijá 'iama Juvujaho areha. Na nihena kivu. Ja Jesu ka'ene pura icha 'ahi 'anaaji ka'i 'ahiume roajivara.

⁶'Enakaivo Hu niho'o ikaho pahinu. Hu nimaraku'a ja 'waravume hejaja'ina'e Hu ni'urinana. 'Enakúne roe Hura tinia ka'ene namajaho kaha.

⁷'Enareje marako va'ajime Huni tisaiporua ijá 'iha Hu kwamajaho ni'urinana. Heha! Hu urana Karari va'una'omo ja ijí Hu kahuna. Heha! Na ja 'waravu 'iamana.

⁸'Ejumakame pu euchi rene tea juname 'ee teamanama para'eme oharoharu ninukujaha va'e Huni tisaiporua 'wara'i va'ara.

⁹'Ene heha! Jesuho 'e'uru piunime 'ajoramana. 'Ejume pu Huni mumora 'uname Hu oja mahara.

¹⁰'Ejume Jesu pu ijá 'iama Ja niho'o paju'i kaivo ninukujaha va'e Nuni vwehija 'waravakame pu kami Karari vu'e Na kiha 'iamana. Sorutiapo Rakaka Renaji 'Waravajina

¹¹'Ejume pu mai'o va'eme 'unamutoi vai'i ni'aha kwinu kivume ea ka'ene eucha 'ajoha namijajija roe ari pirisitia mama'ina iraka ka'ene renajaho ho'o 'waravara.

¹²'Ejumakame pu roe emaapuni ea mama'ina ahuma hine vu'a 'wame monia ni'ima'ura sorutia ka'ene 'ajoha kaji vajihara.

¹³'Ene ja ika'ina 'wara'avara. Huni tisaiporuepo na'ii nú notui paki'eme roe Hu nesi apena va'ara 'i'avara.

¹⁴'Enareje ijí vu'a kajara rena apena va'e kwaa ara 'ajohi'ina natohwi jihuni atahuri aru'amajaho núra hu hami 'warama amairiakame jonuna'a unenu'u pina pare'enakúnina 'iavara.

¹⁵'Ejumakame monia kajija 'eke pura 'warava ja'ina'e vejara. 'Ene ike vu'akaho ra'usaha apenaji Jua puni vaja kajaho 'ona apena rou va'o iviamaa iki 'e'unu. Jesura Huni Tisaiporu Puni Una'i Samaahiramajina

¹⁶'E'ejume ijí tisaiporu kajija ea iropu ropu kwinu ijá va'e kami Karari huri'a ka'ene Hura pu ijí va'avarono 'waramajino va'ajivara.

¹⁷'Ejumakame pu ijí Hu kamareja pu Hu oja mahara. 'Enakaivo 'aho'a pu ma'uaku panimai rojara.

¹⁸'Ejumakame Jesura puni roarena Hu pu ijá 'iama Harura ka'ene mwe'akaki namuna 'ee kahi akúpi 'ahi namuna ijaho ni'aha kwinu Na mihana.

¹⁹'Enakúne kwaka mapokakino va'ajimareje najahakame Nuni tisaiporu re'avara. 'Ene Amo Hariha 'Avena ijihipuni ihi 'ahi 'unirama toi sama'avara.

²⁰'Ene pu najahakame iraka ka'ene Nara ja 'waravujija pu ija kisi apena ve'avara. Parunami'avara. Na ja pu'úmo na'ia mapoka mapoka hina apena va'u va'u va'e mwe'a pa'are'amani uriji 'e'uhuna 'iamana.