Read Managalasi Matiu 9 Bible Online

Matiu 9 - Managalasi bible

Matiu 9

¹'Ejumakame Jesuho va'e sisima vaji ajime va'e toa one kara'i Huni ari va'ana.

²'E'ejume ea 'ahopo ea pina atami 'unamarena huni 'ata niho'o ajuaranana'omo pu huni suhiji'i apene Jesuni roume Hu kimajaho pu niho'o nimaa nimaa rojuma kimarena Hu ijí ea kajaho ijá 'wama Nuni harihe oja pahiana'amana. Oni sisea nipa'arenukúne 'wamana.

³'Ejumakame Sikuraipiepo ijí 'wamapene oji'i ijá 'wava Hu hine Godi mataha 'waramu 'wavara.

⁴'Ejume pu raka ka'ene vwihaja kaji Jesura kimarena Hu pu ijá 'iama Ja raka vene hine 'unama sisea ani ani vwihajo?

⁵'Ú 'unama ichá'inijara samaumaa'e a oni sisea niparanu 'wa'eju ho a 'urine namina va'a 'wa'ejo?

⁶'Enakaivo jara ijí hena ka'avarono ijihuna'e Ema Puni Harihijara iki mwe'i roe sisea vwihana arehuni haruriji'i roana 'i'i kaivo ea ka'ene 'ata ajuaraji'ina kajaho ijá 'wama 'Úrine oni suha apene ari va'a 'wamana.

⁷'Ejume hu 'urine huni sei va'ana.

⁸'Ejumakame ea mapoka ijí Godoni harura kaji kamareja Godi ta'arohara. Ijihuni maijaho Godira harura kajaho emaa vajihana. Jesura Matiu 'Umenajina

⁹'E'eme Jesuho ijí ara kaji rene va'i kavume ea pina ka'ene huni iha Matiuna 'wavujaho takisia apejuri seijino hinana. 'Ejume Hu ijá 'wama Na 'ararihie roa 'wamana. 'Ejume hu 'urina 'arariahae Hu hu'úmo va'ana.

¹⁰'Enarena Jesuho Huni tisaiporu pu'úmo sei vaji hi'eme ea mapoka ka'ene takisia apeji'ina 'ee ea ka'ene sisea veji'inijija roe pu pu'úmo ahuma 'iruma ijara.

¹¹'E'eme Parasiepo kamareja pu Huni tisaiporu aporame ika 'iava Irakijihuna'e joni Najahi'inakaho ea ka'ene takisia apeji'inijija 'ee ea ka'ene sisea veji'inijihi pu'úmo 'iruma iji'i hino? 'iavara.

¹²'Ejume Hu ijí henarena ijá 'iama Ea ka'ene atama pa'uniravi'inijija juketa pasaravura. 'Enakaivo ea ka'ene atama 'uniravi'inijipo pupusu saravura.

¹³Ja ma va'ajimareje Godoni ira vaji ika'inaka 'waramaji sama ka'avara. Na emaapo temukivu kaivo Na swasa vehuna senimu. Ijihuni maijaho Na ea mamaa'e 'eka'i rohuna pana kaivo ea sisea punijihuna'e Na routa 'iamana. 'Aura Arevuji Rone Apovajina

¹⁴'E'ejume Joni oni tisaiporu Jesuni roe ijá 'wava Irakijihuna'e núa 'ee Parasia 'aura arevu kaivo Oni tisaiporu 'aura paarevo? 'wavara.

¹⁵'Ejume Hu ijá 'iama 'Ú ei pini napasi ne'i 'aha'eje hu ehwa pu'úmo hi'ipisa ijihuna'e chora hija raka? Niho'o pana. 'Enakaivo ea ka'ene ijí napasi nena kaji apena va'e hu kú'o pu pu'úmo pahija kamareje iji'a pu 'aura arehuna.

¹⁶'Ene ea 'aho'a ateha sahasapo napavujaho pu ateha maiu'ina puni pwina pa'eke suhura. Ijihuni maijaho ijí suhakavi'i ijí ni'ajahe ni'ima'ura napa'amarono pasuhura.

¹⁷'Ene vukú'o 'wainia maiu'ina hanuha sisa sahasa vaji veri'avajaho hanuha sisa sahasa kajaho napama arihuna. 'Eje hanuha sisa sahasa kaji 'u'o siserahuna. 'Enakaivo hanuha sisa maiu'ina vaji 'wainia maiu'ina veri'amajaho marahuna 'iamana. Ea Ni'ina Huni 'Apaja 'Ee Napari Jesuni Ateha 'Unamajina

¹⁸'E'eme Jua puni 'ajohi'ina natohwijaho roarene Huni una'i nitupari savi'i ijá 'wama Nuni 'apaja iviamajai kwamanakúne roe Oni ija huni haha 'ahi ranave 'urinama 'wamana.

¹⁹'Ejume Jesuho 'urine hu hu'úmo va'ume Huni tisaiporu 'u'o pu pu'úmo va'ara.

²⁰'E'eme napara pina 'aa vuravi'ina juara iropu ropu no'ohe'i pa'arenana'omo Jesuho vai'i paka'eme hu túna'i rou va'o ija joranajaho va'e Huni ateha uri vwemana.

²¹Ijihuni maijaho hu huhusu ijá rona Na Huni ateha ura kaji vwe'ujaho na marani'ena ronarena ijihuna'e vwemana.

²²'Ejume Jesura aroma napara kajaho kavi'i ijá 'wama Nuni 'apajakera oja pahiana'amana. Ijihuni maijaho ara nimai ronajara veju'e maranaukúnina 'wamana. 'Ejume napara kajaho ni'aha kwinu maranana.

²³'Ejumakavi'i Jesuho iji'a va'e ea natohwa kajihuni sei vai'i kivume ea mapoka hine hurisia hwasihe 'ee hine iruno'a apeji'i kúrúhwa ani rejara.

²⁴'E'eme Hu ijí va ajime ijá 'iama Ariha va'aha! Ike napaiseakaho pakwamana kaivo hu nenu 'iamana. 'Ejume ea mapoka Hu ijahara.

²⁵'Ejumakivi'i eaka mapoka kajaho vejume ma'ahi va'eme Hu ijí aruma va'ajino ijí napaisea kajihuni iji 'unamapene 'urijume hu 'urinana.

²⁶'Ejumakame ijihuni pinana kajara renapene arara kajiano va'ana. Jesura Ea No'o Nia Pa'ana Vejume Maraniajina

²⁷'E'eme Jesuho ijí ara kajaho are'i kaivo va'eme ea no'ohe'i nia supavi'inapo Hua 'ararihai'i ijá 'umeja Teviti oni harihakera nú numiruma 'umejara.

²⁸'Ejume Jesuho va'e sei aji'eme ea ka'ene nia supavi'ina kajija no'ohe'i ijí va'ume Jesura ijá 'iama Nara ike veje maranihunijaho ja nimai rojo? 'iamana. 'Ejume pu ijá 'wava Natohwe nú nimai roju 'wavara.

²⁹'Ejume Hu puni nia 'aha kajino ija 'uniravi'i ijá 'iama Jara nimai rojujara venau'e maraniu 'iamana.

³⁰'E'eme puni nia ni'aha kwino jaraume niriara. 'Ejume Jesura ira kisi ijá 'iama Ja ea 'aho'a pa'wara'avara 'iamana.

³¹'Enakaivo pu no'o va'ajimareja ea mapoka 'waramapena ojumakame Jesuni vu'a kajaho rausahapene va'ana. Jesura Ira Pa'anae Vejume Maranajina

³²'Ejume pu va'eme ea pina ira pa'ana 'avena siseapo ajivura'omo pu apene Huni roara.

³³'Ejumakame 'avena sisea kajaho 'e'una va'eme ea kajaho ira 'waravumakame ea mapoka ijí kamareja oja hwa'usunaha'eme ijá 'wava Nú ea ika'ina Isureri opuni vaja pakivura 'wavara.

³⁴'Ejumakame Parasi ijá 'wava 'Avena siseijihipuni natohwijara ni'ajahu'e 'avena sisea ato'arumau 'wavara. Jesura Ea Numirame Puamu Venajina

³⁵'E'eme Jesuho va'e ara mama'ina 'ee ara ma'u'umaa ijino puni Sinakoku ka'ene namijujino Godoni vu'a mai maiu'ina ka'ene Huni ara rona 'waramaji najahana. 'Eji'i ea ka'ene atama 'uniravi'ina 'ee unenu'u 'aho'a ani'ina renaujija vejume sonahiara.

³⁶'Eji'i Hu kimajaho ea mapoka ijí ani rejara kaivo pu majikari areri sipiepo sipia 'ajohai'ina pa'a ojuja'ina'e vejume Hu niho'o temumana.

³⁷'Ejumakame Hu Huni tisaiporu ijá 'iama Juara mapoka'e tuma navu kaivo ea ka'ene juara sahunijaho kwinu kwinuna.

³⁸'Enajihuna'e juara savuri Natohwiji jarivakame Hura ea ka'ene juara sahunijaho irechami'amana 'iamana.