Read Managalasi Maka 1 Bible Online

Maka 1 - Managalasi bible

Maka 1

¹Jesu Keriso ka'ene Godoni Harihijihuni vu'a maijihuni aneja.

²Poropetia Aisea nitama ika'ina'e heha vaji venana.Heha! Na Nuni 'ona oji'ina oni una'i ranave hu oni 'unama amairihuna.

³Hu nechi'i namine ajira 'ume'ena Ja Natohwijara rohunijihuna'e Huni 'unama amairie arira'e renama 'umehuna.

⁴Joni Papitisita nechi'i 'waravume ea puni sisea vwihane temukavume areva jihuna'e Joni pu 'unirame toa vaji samaume 'urijara.

⁵'Ene ea mapoka Jutia ora 'ee Jerusaremi ora va'e toa iha Jotani puni sisea nahama 'waravume Jonira 'unirama toi samaume 'urijara.

⁶'E'eme Joni kameru sapasi ateha vene 'ee huni sisijino charia vejara'omo ijí same aneura riha 'ee pújúharu inuna.

⁷Jonira najahe ijá 'iama Ea pina ka'ene nuni túna'i roujaho Hu niho'o natohu kaivo na natohwa pana. 'Enajihuna'e na Huni mumora hwana aja rasahuna areri pareniu.

⁸Na ja toi vaji samauta kaivo Hu ja Godoni 'Avenijino samahuna 'iamana. Jesu Toi Apúsame 'Ee Vena Kamajina

⁹Ijí vea kajino Jesuho Nasareti Karari vaji rene roume Jotani Jonira 'unama toa vaji apúsamana.

¹⁰Hu ni'aha kwino toa vaji rene 'uriji'i kavume akúpa jara'eme Godoni 'Avena marahu'ora puna'i ariha Huni roana.

¹¹'E'eme ira kahi akúpa 'ahi rena roe ijá 'wama A Nuni Hariha'omo Na A oja mahu. 'Ene Na A kavujaho niho'o teamanimu 'wamana.

¹²'Ejume ni'aha kwino Godoni 'Aveni 'ejahae Jesuho nechi ahema va'ana.

¹³Hu na'ia mapoka (40) nechi'i hi'eme Setanira roe Hu vena kamana. Hu hanuha nea pu'úmo hi'eme 'ona oji'inapo roe Hu 'ajoahara. Jesura Najahe 'Ee Tisaiporua Amura Aheramajina

¹⁴Joniho tipura vaji hi'eme Jesuho Karari roe Godoni vu'a 'waramana.

¹⁵Hu ijá 'iama Vea niapejume ja 'ajoha'inijaho Godi niranavume roana. Joni sisea vwihane are'i kaivo Godoni vu'a mamaa nimai ro'avara 'iamana.

¹⁶'Ejume Jesu Karari rori vai'i kavume Saimaniho 'ee huni 'u'ua Enituru'o úa vesavi'ina'omo puni namea soha vaji 'oname hijara.

¹⁷'Ejume Jesu ijá 'iama Ja Na 'ararihie roe Nara ja najahe jara kija'e 'ekuja'ina'e ea ahera'ejakúna 'iamana.

¹⁸Pu ni'aha kwino namea puna irecha'i kaivo 'urina Hua'e 'ararihae va'ara.

¹⁹'Ejume Hu toa kajihuni rora kaji vai'i kivume Jepati huni harihija Jemisi huni 'u'ua Joni sisima 'ahi hine puni namea turamana'omo pu ijí hine hwearikara.

²⁰Hu pu ni'aha kwino 'umenaume oma puna Jepatiho sisima vaji pwehwa pu'úmo irechami'i kaivo pu Hu 'arariha va'ara. Ea 'Avena Sisei Rosamajina

²¹'Ejume pu va'e Kapeniami usevajaho Sapatia vea'omo Jesuho aruma va'e Sinakoku vaji hine najahana.

²²Hu pu najahume pu hene oja hwa'usahara. Ijihuni maijaho Hu niho'o haruriji'i pu najahana. Areri Sikuraipiepo najahu ja'ina pana.

²³'E'eme ijí Sinakoku vaji ea 'avena sisei ajivi'ini 'urine chirivi'i ijá 'wama

²⁴Jesu Nasareti orikera 'ú A iraka vetú'ena? 'Ú A núa'e ruaru 'ahaume roane? A ea iraho na nikavu. A Godoni arira maijina 'wamana.

²⁵Jesura hu 'urarahe ijá 'wama Iruno'a are'i kaivo ariha va'a 'wamana.

²⁶'Ejume 'avena sisea kajara ea kajaho 'anaa pi'onavume mwe'i nama kuchikuchivuma kavi'i 'avena sisea kajaho eruhi'i ro 'e'ume va'ana.

²⁷'Ejume ea mapoka oja hwa'usahaume 'urina pira'arame ijá 'wava Ikaho irake? 'Unama maiu'ina harusina'e najuhu. Hu he paraji'ina ijihuni hahi 'avena sisea 'u'o 'waravu'e pu Huni ira hena veju 'wavara.

²⁸Hu ijá venajihuni vuijaho Karari vaja marako he parajara. Jesura Ea Mapoka Venaume Maraniajina

²⁹'Ejume pu Sinakoku are'ika'i Saimani'o Enituru puni sei Jemisi'o Joni pu'úmo va'ara.

³⁰'E'eme Saimani oni jura paranahijaho atama 'uname haha ohoa re'eme namajaho Hu 'waravume henana.

³¹Hu iji 'unama apena 'urijume atama ni'aha kwinu pa'are'eme hu 'urine mataume 'iruma amairia vajihume ijara.

³²Ijí nusirea kajino pu aneja vene atakina 'ee ea ka'ene 'avena sisesapo ajima'ina mapoka'e aherame Jesuni roara.

³³'E'eme ijí nusirea kajino ea ka'ene ara kajino hijujija ijí vwichajiama kajaho niho'o rarene namana.

³⁴Jesura vejume ea ka'ene atama navi'inijaho atama puna ni'aha kwino pa'arejara. Hu ea ka'ene 'avena siseapo ajima'inijija venaume ni'aha kwino va'ara. Hu 'avena sisesa 'waravume ira pa'wara'i ariha va'ara. Ijihuni maijaho pu Jesu kamareja arihara. Jesura Karari Vaji Najahajina

³⁵Jesuho sú'u vea mai'o aharasama kamino Huhusu 'urine va'e ruha pini ea pa'ajino siporua 'onana.

³⁶'E'eme Saimaniho napuhwa pu'úmo Hu sama ojara.

³⁷'Enuva'o pu Hu piuname ijá 'wava Ea mapoka'e A sarama oju 'wavara.

³⁸Jesu ijá 'iama Roe nú va'e ara 'aho'a mapoka ka'ene ikehuni rori navuji 'u'o Na ira najahuma. Ijihuni maijaho Na ijihuna'e routa 'iamana.

³⁹'Ejume Hu Karari araka mapoka kajino Sinakoku vaji vu'a najahe 'ee 'avena siseapo ea ajima'iniji sioma ato'arumana. Jesura Ea Vejume Maranajina

⁴⁰'Ejume ea reporosia rukini roe Jesuni una'i nitupari savi'i ijá 'wama A ura rena'amajaho venie na haha maa'e reniama 'wamana.

⁴¹Jesuho niho'o natohwa'e temu'eme ija hahi 'ahi ranavi'i ijá 'wama Na ura reniuna'omo oni hahakaho marana'ena 'wamana.

⁴²Ni'aha kwinu ijí reporosia kajaho pa'are'eme huni haha maranana.

⁴³'Ejume Jesu ajira ijá 'wama A viheno! A niho'o ea pina pa'wara'amana!

⁴⁴'Enakaivo va'e oni haha pirisiti nahe 'ee Mosisira nitama ka'ene najaha ja'ina'e swasa veje ea mapoka oni reporosia pa'arenajaho hena ka'avara 'wamana.

⁴⁵'Enakaivo Hu va'e ea mapoka 'warama ape onajihuna'e Jesu araka mapoka kajaho pa'urahonana kaivo Hu nechi'i rori hi'eme ea mapoka nianaapene Huni roara.