Read Managalasi Maka 10 Bible Online

Maka 10 - Managalasi bible

Maka 10

¹Jesu kwaa kajaho are'i kaivo 'urina Jotani 'ona kara'i Jutia va'ana. Ea mapoka kú'o nianaa Huni roume Hu najahu ja'ina'e najahana.

²'Ejume Parasipo Jesuni roe vena ka'i 'ahiume apoma ijá 'wava Ei pini napara huna rana'ipisa areri reja'e? 'wavara.

³Hu eha vene aporame ijá 'iama Mosisi hu ja raka vehuna 'waramane? 'iamana.

⁴Pu ijá 'wavaMosisira 'warumajaho ea napara ranahuna asura ve ma'i kaivo ranave vahuna'e 'warumana 'wavara.

⁵'Enakaivo Jesu ijá 'iama Hu nitama heha 'ahi ija'ina 'warama jihuni maijaho joni oja kisima'uri jihuna'e hu venana.

⁶'Enakaivo nitama anejijaho Godira uneunecha mapoka vene 'ee parua vene 'ee napara venana.

⁷Ijihuni hahi parui napara 'wa'amajaho opwaha irechami'i kaivo pu no'o nikwino rehuna.

⁹Godi raka ka'ene ihenamiajaho ea pina patura'amana 'iamana.

¹⁰Pu kú'o sei vaji va'ajimareja huni tisaiporu ijí vu'a kajaho apovara.

¹¹'Ejume Hu ijá 'iama Parua irara huni napara rana'i kaivo napara pini 'wa'amajaho hu huni napara ka'ene amuriji niho'o sise'i 'ahaa avahuna.

¹²Napara irara huni parua rana'i kaivo parua pina ve'amajaho hu niho'o sise'i 'ahaa avahuna 'iamana. Jesura Sesamaa Merajihajina

¹³'Ejume ea 'aho'a sesamaa 'eka Jesuni roume Hu iji 'unirame meraji'iro venana kaivo tisaiporuepo ea kajija 'urarahara.

¹⁴Jesu kimarena niho'o sevuma ijá 'iama Sesamaa paroturi'avara kaivo maki'eje Nuni ro'avara. Ijihuni maijaho Godoni arijaho ea ka'ene sesamaa puna'i vejujihipuni ara.

¹⁵Na nimaa ja 'waravo. Ea irara Godoni ariji sesamaa puna'i paape'amajaho hu ijaho pavahuna 'iamana.

¹⁶'Enarena Hu sesamaa kajaho mwachame Huni ija puni haha 'ahi irechavi'i merajihana. Ea Uneunecha Rukima'urijina

¹⁷Jesu va'i 'ahauma va'eme ea pina ninuma roajino Huni una'i nitupari sa'i kaivo apoma ijá 'wama Najuhi'ina Mamaa'e na ichá'ina'e vene majama hihunijaho ape'ejo? 'wamana.

¹⁸Jesu ijá 'wama Irakijihuna'e a Na mamaa 'wimo? Eaka mapokakaho mamaa pana kaivo nikwino Godira mamaa.

¹⁹A Godoni tamana nihenuna. A ea pa'anaa kwa'amana 'ee a napara patura'amana. A nesa paape'amana. A ea pina panama'amana. Ohuna omuna ijihipuni hura ve'amana 'wamana.

²⁰'Ejume hu ijá 'wama Najuhi'ine na nitama sesamu'uru rene tamana kajaho hami venapena routa 'wamana.

²¹'Enakaivo Jesu hu kamajaho Hu oja mahe ijá 'wama A unenu'u pina kwino mai'o areri pa'ana. A va'e oni uneunecha mapoka 'eke 'imenareja'e monia ona 'eke ea uneunecha pa'aji vajihakame oni eha maa akúpi 'ahi na'eje roe Na 'ararihi'amana 'wamana.

²²Hu ijí henajaho niho'o temume oja tura'i 'aha'eme va'ana. Ijihuni maijaho hu uneunecha mapoka rukina.

²³'E'eme Jesu niriapenoji'i Huni tisaiporua kima ijá 'iama Ea ka'ene uneunecha mapoka rukina re'avajihuna'e pu Godoni ari vahuna kisina rehuna 'iamana.

²⁴Jesu 'waravume Huni tisaiporua hena oja hwa'usahana. 'Ejume Jesu kú'o eha vene pu ijá 'iama Sesahu Nune ea pu nimaa rohuna kaivo pu uneunecha mapoka rukina re'avajihuna'e pu Godoni ari vahuna kisina rehuna.

²⁵Maha nitirua titi aru'ipisa areri reja'a kaivo ea hu nimaa rohuna kaivo hu uneunecha mapoka rukina re'amajihuna'e hu Godoni ari vahuna kisina rehuna 'iamana.

²⁶Pu ijí henareja oja niho'o hiana'eme ijá 'wava 'Ú Godi ea irá ni'aja'ena? 'wavara.

²⁷Jesu pu kivi'i ijá 'iama Emapo areri vehuna pa'ana kaivo Godiho arerina. Godira areri uneunecha ve paranuna 'iamana.

²⁸Pita Hu ijá 'wama Ike hena nú uneunecha mapoka irecha'i kaivo A 'ararihae roara 'wamana.

²⁹Jesu ijá 'iama Na nimaa ja 'waravo. Nuna 'ee Godoni vu'ijihuna'e ei pini huni mwe'a ara omaha oaha pokaha 'u'uaha ma'inaha sesahwaha irechami'amajaho

³⁰hu túna'i areri mwe'a mapoka mapoka ara mapoka mapoka oma mapoka mapoka oha mapoka mapoka poka mapoka mapoka 'u'ua mapoka mapoka ma'ina mapoka mapoka sesamaa mapoka mapoka rehuna. Ea hu sise'i 'aha'eja kaivo hu Godoni ari va'e majama hihuna.

³¹'Enakaivo ea irahipo urasa'avajaho pu túchamai rehuna kaivo ea irahipo túchamai re'avajaho pu urasahuna 'wamana. Jesura Kwahuni Vu'a No'opisuji Rona 'Waramajina

³²Pu Jerusaremi va'iro va'eme Jesu urana va'eme Huni tisaiporu túna'i va'ajimareja oja hianamana. 'Ee ea ka'ene pu 'ararihia va'ajaho tea junamana. 'Ene Hu kú'o ea iropu ropu no'o aherame ani ro va'e iraka ka'ene Hua rehunijaho 'waramana.

³³Hu ijá 'iama Ja heha! Nú Jerusaremi va'ajive ea 'ahopo Ema Puni Harihijaho apene pirisiti mama'ina 'ee Sikuraipi ijihi mihe pu apena 'anae kwahuna 'wa'ika'i pu Jenitaru mihuna.

³⁴Pu Hu matahe chera pisotie hisi hijahe 'anae kwahuna kaivo vea no'opisu mwe'i vaji namareje iji'a kú'o 'urihuna 'iamana. Jemisi'o Joni'o Jarima 'Waravajina

³⁵'Ejume Jemisi'o Joni'o Sepati oni harihija'omo ijí pu roajime Jesu ijá 'wava Najuhi'ina nú unenu'u pina raka'e A 'wara'avajaho A ve'amana 'wavara.

³⁶'Ejume Hu ijá 'iama Ja ura iraka Na jona vena'ejo? 'iamana.

³⁷Pu ijá 'wava Na'ia pini a ea mapoka 'ajoha'amajino nú ea pina Oni ija mana'inija'i hije 'ee ei pini ana'inija'i hi'ejakúne 'wavara.

³⁸'Enakaivo Jesu pu ijá 'iama Oneka ka'ene ja Na 'warivu kajihuni maijaho ja paheju. 'Ú ja areri Na kapusi toa ka'ene ihunijaho i'eja? 'Ene Na toa apúsamie 'uriuja'ina'e ja 'u'o toi samae 'uri'eja? 'iamana.

³⁹Pu ijá 'wava Nú arerina 'wavara. Jesu ijá 'iama Nara kapusi toa ka'ene ihunijaho ja nimaa ihuna. 'Ene 'u'o Na toi apúsamie 'urihuni ja'ina'e ja nimaa toi samae 'urihuna.

⁴⁰'Enakaivo ea pina Nuni mana'ini hije 'ee ea pina Nuni ana'ini hihunaka 'warivujaho Nara vajihuna pana kaivo emaa puna'e iji pijiha amairie irechavu navu 'iamana.

⁴¹'Ejume ea iropu ropu ijí henareja pu Jemisi Joni puna'i sena vena 'urarahara.

⁴²'Ejume Jesu 'umenaume pu rouma ijá 'iama Ja niheju. Jenitaru ea mama'ina rejajaho pu majikari 'ajoahura. Puni ea mama'ina 'waravu'e ea mapoka puni ira hena vejura.

⁴³'Enakaivo ja ija'ina pana kaivo ea irara ura joni natohwa re'i ve'amajaho hu joni pwea re'amana.

⁴⁴Ea irara ura'i ve'amajaho hu ea mapoka puni pwea re'amana.

⁴⁵Ema Puni Harihijara roajaho ea mapoka Huni pwea pare'avarono roana kaivo Hu puni pwea re'i 'ahauma roana. Hu Huni hia ea mapoka'e mihana. Areri emaa 'imenaana 'iamana. Jesura Patimeasi Ka'ene Nia Supavi'iniji Vejume Maranajina

⁴⁶'Ejume pu Jeriko ro 'e'une usema va'iro vai'i Jesuho Huni tisaiporu 'ee ea mapoka 'ee Patimeasi nia supavi'ina ka'ene Timiasi oni hariha'omo vwama rori jariravi'i hinana.

⁴⁷Hu hejume Jesu Nasareti ora'omo roume hu ijí he'ika'i ijá 'umena A Teviti Oni Hariha A na temuka'amana 'umenana.

⁴⁸Pu hu ijá 'umeja Iruno'a 'arema 'umejara kaivo hu niho'o pasonananavi'i ijá 'umena Teviti Oni Hariha'omo A na numiri'amana 'umenana.

⁴⁹Jesu henarena masuani namiji'i ijá 'iama 'Umeje ro'ama 'iamana. 'Ejume pu ea nia supavi'ina kajaho ijá 'umeja Teamana'eje 'urina Hu a 'umenaukúne 'umejara.

⁵⁰'Ejume hu marako huni ateha irecha 'o'i kaivo 'urina Jesuni roana.

⁵¹Jesu hu apoma ijá 'wama A ura raka'e Na veta'ejo? 'wamana. 'Ejume ea nia supavi'inijara ijá 'wama Najuhi'ina A veje na kú'o nia niriuma 'wamana.

⁵²Jesu hu ijá 'wama A nimaa ronajara veju'e maranaukúna va'a 'wamana. 'E'eme ni'aha kwino huni nia marajume hu Jesu'i va'ana.