Read Managalasi Maka 12 Bible Online

Maka 12 - Managalasi bible

Maka 12

¹Hu aneja vene pu haa 'warame ijá 'iama Ei pini juara menarena ajina 'one vera irame nú'úha vene hu ea 'aho'a irechamiume juara kajaho 'ajoha hi'eme hu kwaa pini va'ana.

²'Iruma kajara maranani veijino huni pwea ranavume va'e ajina 'eka'i va'ana.

³'Ejume ea ka'ene juara kaji 'ajohujipo 'urina 'anau va'o piranavume maisu va'ana.

⁴Vu kú'o huni pwea pina ranavume va'ume ea ka'ene juara kaji 'ajoha kajipo muni 'eka huni húmati 'ahi 'anaume hija'aravumakavi'i pu apena sise'i 'ahau va'ume piranavume va'ana.

⁵Hu pina ranavume pu 'anauma kwamana. 'Ejume hu vu kú'o pwehwaha 'aho'a irechamiume va'ume pu 'aho'a hijiha'e 'ee 'aho'a 'aniuma kwamasahara.

⁶'E'eme hu ea kwino ranave vahuna hinana. Huni hariha ka'ene niho'o oja mahi'inijina. Hu túchamaijaho raname ijá 'iama Pu nuni hariha kehuni hura ve'eja 'iamana.

⁷'Enakaivo ea ka'ene juara kaji 'ajohujipo 'wamapenoji'i ijá 'wava Ea ka'ene kahe rou kahehunakúne roe 'anae kwa'eje núni aachia'e re'ena 'wavara.

⁸'Ejume pu hu 'anauma kwavume pi'onavume vera hana'i va'ana.

⁹'Ejumakame juara anesura kajaho ichá'ina ve'ena? Hu roe ea ka'ene huni juara 'ajohi'ina kajija 'anie kwamasa'eje hu ea 'aho'a juara kajaho mihuna.

¹⁰Ja nihejara Godoni heha vaji ijá 'iamaEa ka'ene ara veji'inijipo kuteja ka'ene pi'onavajara ara kajihuni kúrúti kuteja kaji rena naminana.

¹¹Ikaho Natohwi jihuni rena roajihuna'e nú kivujaho mavarasa'ina rejura 'iamana.

¹²Hura haa ka'ene pua'e ronarena 'waramaji 'waramana. Pu ura henareja Hua ape'irono savara kaivo pu emaa'e juhamareja arema va'ara. Takisia Vejuji Rone Apovajina

¹³Pu Parasi 'ee Heroti oni pwehijijihi pu'úmo irechamiume va'e Jesu 'waravi'i pisivi'i 'ahiuma va'ara.

¹⁴Pu va'ajimareja ijá 'wava Najuhi'ine nú niheju A nimaa nimaa. A eakaho natohwa 'ee eakaho ma'u'ua ija'ina paronu jihuna'e A ea mapoka areri kwinu'wi kaivo A Godoni 'unamaru arira najuhuna. Nú unenu'u pina aporavu. 'Ú nú Sisa takisi vaja'avajaho areri re'ena 'aho pane?

¹⁵'Ú nú ve'eja 'aho nú pave'eja? 'wavara. 'Enakaivo Hu henajaho pu ira'ata vejuma henarena ijá 'iama Ja rakijihuna'e Na vena kivo? Monia oma kwino miha Na kavuma 'iamana.

¹⁶'Ejume pu mahume Hu moni kama ijá 'iama Ikaho irahuni pikisa'e 'ee asuri namo? 'iamana. 'Ejume pu Hu ijá 'wava Sisa ona 'wavara.

¹⁷'Ejume Jesu ijá 'iama Sisa oni uneunechijaho Sisa vajaha 'ee Godoni uneunechijaho Godi vajaha 'iavume pu ijí hene oja hwa'usunahana. Kwamasahe 'Urihuniji Rone Apovajina

¹⁸'Ene Sajusi 'ahopo ea ka'ene kwamasahi'inijipo kú'o 'urijujaho panimaa rojura. Jesu apoma ijá 'wava

¹⁹Najuhi'ine Mosisira vu'a pina heha 'ahi vena ijá 'úma Ei pini napara 'wahe naparahijaho amuja pave'eje hu kwa'amajaho 'u'uahi aheva kamareje ijara pokahoni hariha nahehuna 'úmana.

²⁰Nitama ea pipuni hariha iropune no'ona'omo pokijara napara 'wahana kaivo huni napara amuja pave'eme hu kwamana.

²¹'Ejume huni nijahijara ahevume amuja pave'eme hu 'u'o kwamana.

²²'Ejume ijihuni nijahijara ahevume amuja pave'eme hu 'u'o kwamana. Ija'ina vena apena va'o va'ume túchamai jara ahevume amuja pave'eme parua kajaho kwavume napari ijí 'u'o kwamana.

²³Vea ka'ene ea mapoka kwamasahajipo kú'o 'uri'avajaho hu irahuni napara re'ena? Ijihuni maijaho ea iropune no'o hu 'wahara 'wavara.

²⁴Jesura eha vena ijá 'iama Ja pahejujihuna'e Godoni ira pahene 'ee Godoni harura 'u'o paheju.

²⁵Vea ka'ene kwamasahi'ina kajipo kú'o 'uri'avajaho napara pasahuna kaivo areri Godoni 'ona oji'inapo akúpa 'ahi hijuja'ina'e hihuna.

²⁶Ea ka'ene kwamasahi'inijipo kú'o 'urihuni jihuni vu'a ka'ene Mosisi oni heha vaji vejajaho patahara raka? Vu'a ka'ene icha renani vaji Godira Mosisi ijá 'wama Na Eparahami oni Godi 'ee Aisiki oni Godi 'ee Jekapi oni Godi 'wamana.

²⁷Hu Godi ka'ene kwavi'inijaho pana kaivo Hu Godi ka'ene mai'o hiji'ini jihipuna. Ja vu'a ira'ata 'wavura 'iamana. Varapa Natohwijina

²⁸Sikuraipi kwino ro hi'eme ea mapoka kajipo vu'a ka'ene Jesu 'waravajaho hu henana. 'E'eme Jesu pu eha hami 'waravume hu Jesu aporama ijá 'wama Godoni tamana mapokijaho ichara natohwe? 'wamana.

²⁹Jesu eha vene ijá 'wama Godoni tamana natohwijaho ikena. Isureri ora ja hami heha. Núni Godijaho Natohwe 'ee nikwinu'wina.

³⁰Joni Natohwa Godiho 'aveniji'i maho'o oja mahe 'ee vwihaji'i maho'o oja mahe 'ee haruriji'i maho'o oja mahe 'ee ojiji'i maho'o oja ma'avara.

³¹Ikaho ijihuni nijahijina. Ja ojono oja ma'aravu ja'ina'e joni rori ea ka'ene hijujija 'u'o oja mi'avara. Tamana 'aho'a ike no'ohe'i ikija paasitahara 'wamana

³²'Ejume Sikuraipijara Jesu ijá 'wama Najuhi'ine ijaho nimaa nimaa 'warimu. Oni vu'a ariramaa. Godi kwinuna kaivo pina pana Hu Huhusuna.

³³'Ejume ja Hu ojiji'i maho'o oja mahe 'ee joni vwihaji'i maho'o oja mahe 'ee haruriji'i maho'o oja mahe 'ee ea ka'ene oni rori hijujija oja mihe areri ja ojono oja ma'aravu ja'ina. Ijipo swasa ka'ene 'eka roe swasa vejujaho maho'o asitahana 'wamana.

³⁴Jesu kamajaho hu eha arira vene Huni vu'a arira hejuma kamarena Hu ijá 'wama A kwaa jora pahinu kaivo a Godoni ara rori hinu 'wamana. 'Ejume ijá rene ea 'aho'a kú'o paapovara. Keriso Rone Apovajina

³⁵'Enakaivo Jesu Temiporu vaji hina najaha ijá 'iama Rakijihuna'e Sikuraipi Kerisoho Teviti oni Hariha 'wavure? 'wavara.

³⁶Teviti ori'ini Godoni 'Avena vaji ika 'waramanaNatohwijara nuni Natohwiji ijá 'wama A Nuni ija mana'inika'i asuma hi'eje Na Oni nana'eji'ina Oni mumora hari irechavuma 'wamana.

³⁷Tevitira huhusu Hu Natohwa 'iamana. 'Ena'omo 'unama ichá'inijino Hu Teviti oni Harihe? 'iamana. Hu 'waravume ea mapoka hena teamanavara. Jesura Varapa Tamana Najahi'iniji Jujuvua 'Waramajina

³⁸Jesu najahi'i ijá 'iama Ja Sikuraipi hami ki'avara. Pu ura emaapo kime puni hura vene 'ajora'avarono ateha jojora same maketi va'e 'urahojura.

³⁹'Ene pu ura Sinakoku vaji una'i asuma hi'i 'ahie 'ee erapo ahaja ijuri veijino tinia mama'inijino hihuna ura renaura.

⁴⁰Pu amuna pisimisame puni ara 'eke 'ee emaapo ki'avarono siporua jojora 'ojura'omo ea ijá kajija túna'i niho'o eha sisemaa 'ekahuna 'iamana. Amunijihuni Swarijina

⁴¹Jesu va'e katua savuri tevua rori ijí hina ea mapokapo monia ka'ene savaji kivi'i hi'eme ea ka'ene monia puna ani reji'ina kajipo puni monia mapoka 'eka roe savara.

⁴²'E'eme amuna ka'ene uneunecha pa'amaa kaivo monia sahura oma no'o ma'u'umai areri monia toia oma no'o erusamana.

⁴³'Ejume Jesu Huni tisaiporu 'umenaume pu Huni roume Hu ijá 'iama Nimaa Na ja 'waravu amuna kajarahara uneunecha pa'amai monia eaka mapoka kajipo roe katua ka'ene savajaho asita ranamana.

⁴⁴Ea pu monia mapoka vajahajihuni maijaho pu monia rukini jihuni hahi avajara kaivo amuna kajaho uneunecha pa'ajihuna'e huna ka'ene areri navuji samana 'iamana.