Read Managalasi Maka 13 Bible Online

Maka 13 - Managalasi bible

Maka 13

¹Jesu Temiporu rena va 'e'u'eme Huni tisaiporu kwinu ijá 'wama Najuhi'ine ike kiama! Muna ikijahija 'ee sea ikijahija niho'o mavarasa'ina 'wamana.

²'Ejume Jesu ijá 'wama Sea ka'ene kimukaho túna'i tira'usaha para'eje kutejaru nami'eja 'wamana. Ahia 'Ee Sisei Hihunijina

³Jesu va'e huri'a Arivi Temiporu ropuna'ija'i Pitaho Jemisiho Joniho Enituruho ijá pu pu'úmo hiji'i hemi apoma ijá 'wava

⁴Vea raki uneunechakija ija'ina re'eja? A aacha pina naju'irakúne nú ijí ka'avajaho sisea ka'ene rehunaka 'warumajaho nitu'u renu 'wa'ejakúnina 'wavara.

⁵'Ejume Jesu ijá 'iama Ja hami ki'avara. Ea 'ahopo pisimia ve'ejakúne 'ee ea 'ahopo Nuni ihiji 'urahi'i Na Jesuna i'i kaivo ea mapoka pisimihuna.

⁷Vea ka'ene ja ajira vehuna hene 'ee erapo ajira vehuni pinana 'warava he'avajaho oja pahiana'avara. Ajira rena vu'a ani ani re'ena kaivo mai'o 'urijaho paroa tu'u rehuna.

⁸Kwakwa mapokakija mai'o ara'eja 'ee ararakija mai'o ara'eja. Ara kwaa 'aho'a mwevarivura roe 'ee ora vea re'ena. Ike uneunechakija ea hianahuni jihuni aneja.

⁹'Enakaivo ja ojono hami 'ajo'avara. Ijihuni maijaho pu 'eka va'e hirisima puni nini va'e 'ee Sinakoku majikari hijihahuna. Ja Nuni eijihuna'e pu ja kamatia ka'ene 'ajohi'ini jihipuni nini 'eka va'akivi'i raka ka'ene ja kima hejujaho pu najahuna.

¹⁰'Enakúne Godoni vu'a maiu'ina kwaa ara mapokakino naja'avara.

¹¹Pu ja 'eke 'otua ve'iro va'avajaho ja va'e uné raka ka'ene 'warahuniji pavwiha'avara. 'Enakaivo ja 'otua ve'iro ve'eje vu'a pina vwiha'avajaho ja pavwihahuna kaivo Godoni 'Aveni vaji'enakúne 'wara'avara.

¹²Popwapo 'warave erapo 'u'uhwaha 'anie kwamasahe omahwapo 'warave erapo sesahwaha 'anie kwamasahe sesahwapo 'warave erapo opwaha 'anie kwamasahuna.

¹³Ja Nuni eijihuna'e ea mapoka ja niho'o ki'avajaho senahuna. 'Enakaivo ea irara ija kisi 'unama va'e uri 'e'u'amajaho hu marahuna. Sisei Ni'ima'uri Rehuni Veji'ina

¹⁴Vei pini Sinakoku niho'o sisemaa pakavi'inijara tinia ka'ene panamihunijine namija ka'avajaho ea ka'ene Jutia hi'avajaho vekaji ni'aha kwino juhaha huri'i 'ahi va'avara. Ijihuni hahi ea irara ike ta'amajaho hami vwiha'avara.

¹⁵Ei pini atahuri hi'amajaho hu paariha va'e sei vaji uneunecha pa'eka'amana kaivo aseha va'amana.

¹⁶Ei pini juasi'i hi'amaji 'u'o pa'unama va'e ari huni ateha 'eka'amana kaivo ase'amana.

¹⁷'Enakaivo vea kaji ea ka'ene hari'ina 'ee hariha musa iji'inijija niho'o pivusahuna.

¹⁸'Enakaivo siporua 'o'irakúne siseakaho atuata veijaho pare'amana.

¹⁹Vea kajino sisemaa ka'ene rehunijaho nitama Godira mwe'a 'ee akúpa vejume hinapena roajino sisea ija'ina parenajara rehuna. 'Enareje iji'a túna'a kú'o ija'ina parehuna.

²⁰Natohwijara vea kaji patu'ua ve'amajaho ei pina mai'o pahihuna. Ea ka'ene Hura iji pijihajihi puni hahi Hu veje vea kajaho tu'u rehuna.

²¹Ei pini ja ijá 'i'amajaho Keka! Keriso ikena karena 'i'amajaho ja niho'o panimaa ro'avara.

²²Túna'i ea 'ahopo ira'atijino na Kerisona 'iave vu ea 'ahopo ira'atijino na poropeti 'iahuna. Pu ija'ina venareje aacha mapoka veje ea mapoka oja hianava kivi'i pisivie ea mapoka nimaa rohuna. Pu ea ka'ene Hura iji pijihajihija pisivihuna vo areri parehuna.

²³Hami heha! Mai'o raka ka'ene rehunijaho Na ni'waravuta. Emaa Puni Harihijara Rohunijina

²⁴Sisemaa kajaho pa'are'eje vea na'ive 'ee masapa pahanahuna.

²⁵China jaheusunahe arihe akúpa puni harurijihija 'unirama usihuna.

²⁶'E'eje pu Emaa Puni Hariha ka'eje Hu 'imitia vaji harura ni'ima'ura niho'o hanana para'eje rohuna.

²⁷Ija'ina ve'eje Hu Huni 'ona oji'inijihija irechamia kamareje pu roe ea ka'ene Hura iji pijihajihija arara mapokijaho akúpa 'aha mwe'a vaja ichihichihi hijujija eparahuna. Matakijara Najahajina

²⁸Na ja haa 'waravu. Ja tavo'a naheju'e kivujaho vea mara'i venu 'wavura.

²⁹Ijihuna'e vea ka'ene ike uneunechakipo reja ki'avajaho Hu niroe vwicha jiami rou roha.

³⁰Na nimaa ja 'waravu. Eaka kijahija maho'o pakwamasa'eje uneunecha ikijahija rehuna.

³¹Akúpa mwe'ijaho pa'arehuna kaivo Nuni Irijaho papa'are'ena. Ei Pini Veaho Vea Mukiji Hena Kahuna Pana

³²Vea vecha rehunijaho ea pahena pakavu'e Godoni 'ona oji'inijija pahena pakavu'e Godoni Harihiji 'u'o pahena pakamu kaivo Amora vea kajaho Huhusuma hena kamuna.

³³Heha! Vea kajaho ja pahena pakavi'ini jihuna'e hina 'ajihi'i ka'avara.

³⁴Vea kajaho areri ei pini epuni ari va'i kaivo huni ara raname huni pwehija irechamiu'e kaukara raka raka ka'ene vehunijaho najahe 'ee vwicha 'ajohi'ina hami nia niri'i 'ajohuna'e 'waramana.

³⁵Nia hami niri'i hi'avara. Ijihuni maijaho sea anesurijara 'unama rohunijaho nusireina ho na'ia ririna ho 'u'ora 'umenujina ho vea nitu'eje rohuna.

³⁶Vejuro'i ja ne'eje hu roe tatatia ve'ena.

³⁷Na ja 'waravu ja'ina'e ea mapoka 'u'o 'waravo. Hami nia niri'i hi'avara.