Read Managalasi Maka 14 Bible Online

Maka 14 - Managalasi bible

Maka 14

¹Vea no'o pa'are'eje Pasova 'ee puretia isitia pa'aji ijihipuni vea re'amarono pirisiti mama'ina 'ee Sikuraipi jihipo 'unama ichá'ina Jesu pisimie 'anaa kwahuniji savara.

²Pu ijá 'wava Nú iviamaa vea natohwa ikaho pave'eja. Vejuro'i ea mapokapo sena vene 'araha ve'avarono pave'eja 'wavara. Jesu Peteni Senisi 'Onahajina

³Vea ka'ene Jesu Petani Saimani ka'ene reporosia rukini jihuni sei ojuta hwene hijara. 'E'eme napara pini kavapwa senisia rukina monia ni'ina 'imenana'omo apena roe jarae Jesuni húmata 'ahi usetiana.

⁴Ea 'aho'a ka'ene ijí hijajipo ijí kamareja niho'o ajinavume ijá 'wava Irakijihuna'e senisiakaho nisamo?

⁵Nú monia maha húmata no'opisu 'imene ea ka'ene 'iruma pa'ajihi ni'ajihuna sa'ina'e avanu 'wame 'urarahara.

⁶'Enakaivo Jesu ijá 'iama Makaha! Ja ichá vena hu 'uraraho? Hu Nununa'i mamaa venana.

⁷Ea uneunecha pa'ajijahija ja pu'úmo majama iki hihuna'omo ja ura pununa'i mamaa ve'i ve'avajaho ve'avara. 'Enakaivo Na ja pu'úmo majama pahi'eju.

⁸Naparakaho unenu'u pina hu areri renajaho hu nivenana. Nara kwahuniji hu Nuni haha amairihana.

⁹Na niho'o nimaa nimaa ja 'waravu. Kwaaka mapokakino Godoni vu'a maa maiu'ina ichihichihi 'wa'avajaho ijí napara kajara venaji 'u'o pu 'wame vwihahuna 'iamana. Jutasira Jesu Nahamahuna'e Nimaa Venajina

¹⁰Iji'a Jutasi Isikariati ka'ene ea iropu ropu no'o ijihipuni ea pina'omo va'e pirisiti mama'ina kajihi pu'úmo 'wame nimaa vene Jesuho nahame mihunijaho 'waramana.

¹¹'Ejume pirisiti mama'ina kajija ijí hejajaho niho'o teamanama parajumakame monia hu vaja'iro nahama 'waravume hu aneja vene Jesu pu mihuni 'unama samana. Jesura Pwehwa Pu'úmo Pasova 'Iruma Ijajina

¹²Puretia isitia pa'ajihuni vea rejumakavi'i pu Pasova sipi 'u'ua 'anae Godoni swasa ve'eme Huni tisaiporu Jesu ijá 'wava Nú ichihi va'e Pasova 'iruma amairiakame A i'ena 'wavara.

¹³Hu tisaiporu no'ohe'i irechamie ijá 'iama Va ari natohwi use'eje ei pini toata apena ro piuniva ka'avajaho pu pu'úmo sea ka'ene hu va'amajino 'arariha va'avara.

¹⁴'Enareje sea ka'ene hura aji'amajihuni sea anesurijaho apome ijá 'waha Najuhi'ini aporame 'waravarono 'warumana'omo 'waravu. Ea suja puni ruha ka'ene Nara Nuni tisaiporu pu'úmo Pasova 'iruma ihunijaho ichine? 'wame apo'avara.

¹⁵'Eje sea anesuri ruha natohwa ka'ene ichuto uneunecha areri rene navi'iniji najahakame ja ijí 'iruma amairiara'avara 'iamana.

¹⁶'Ejume Huni tisaiporu ara natohwi va'e Jesura 'warama kaja'ina rejume kamarena 'iruma kajaho amairiaravara.

¹⁷Nusiremai Jesuho Huni tisaiporu iropu ropu no'o pu'úmo sea kají va'ara.

¹⁸Pu ahuma ojuta hwene 'iruma iji'i Jesu ijá 'iama Na ja nimaa nimaa 'waravu ja ei pini Na nahamihuna Na hu'úmo 'iruma inu 'iamana.

¹⁹'Ejume pu temuka'eme aposarame ijá 'wava Ei pini narane 'iavume ei pini narane 'iavume 'wamapene ojara.

²⁰Hu ijá 'iama Ja ea iropu ropu no'okipo ea kwino Na nahamihuna. Ea ka'ene puretia apene Na hu'úmo tevua vaji apúsama inu karahara Na nahami'ena.

²¹Emaa Puni Harihijaho kwahuna. Areri Godoni ira vaji 'warama ja'ina'e kaivo ea ka'ene Na nahamihunijaho eha sisea apehuna. Maijaho oaha hu panaheja'a 'iamana. Natohwijara Kwamaji Vwihaji'i 'Iruma Ihunijina

²²Pu 'iruma iji'i hi'eme Jesu puretia apene Godoni siporua 'ona teamani 'wa'i kaivo tuama Huni tisaiporu vajihi'i ijá 'iama Ikaho areri Nuni hahakúne 'eka iha 'iamana.

²³'Ene Hu kapusi apene kú'o Godoni siporua 'one teamani 'wa'i kaivo vajihume pu ijumakivi'i ijá 'iama

²⁴Ikaho areri Godira nitama nahama 'waramana'omo Nuni 'aa ka'ene ea mapokijihi puna'e arihunijina.

²⁵Na niho'o nimaa nimaa 'waravu. Na ajina riha kú'o paihuna kaivo Na Godoni ara va'areja'e kú'o maiu'ina ihuna 'iamana.

²⁶Pu javaa vejuma parajume pu Arivi huri'i va'ara. Jesu Pitara Hemahuniji Rona 'Waramajina

²⁷'Ejume Jesu ijá 'iama Ja Nunijihuna'e oja hene ranamie vahuna areri Godoni iri vaji 'warama ja'ina'eNara sipia 'ajohi'ina 'anae 'ee sipia juhaha ani ani va'eja 'iamana.

²⁸'Enakaivo Na kwama vea no'opisu namareja'e iji'a Na kú'o 'urina Karari marako va'eje ja iji'a vuhuna 'iamana.

²⁹'Ejume Pita 'urina Jesu ijá 'wama Ea mapoka ranamaa va'avajaho na mai'o A paranamaa vahuna 'wamana.

³⁰'Ejume Jesu Pita ijá 'wama Na a nimaa nimaa 'waravu. Iviasi na'ii a 'aha no'opisu hemareje Na pakimuna i'eje 'u'ora 'aha no'ohe'i 'umehuna 'wamana.

³¹'Ejume Pita oja 'urina para'ejume ira ajira ijá 'wama Na A hu'úmo kwahuna re'ujaho na A pahemahuna 'wamana. Pitara 'warama ja'ina'e tisaiporu 'u'o maho'o ija'ina 'waravara. Jesura Ketasimani Siporua 'Onajina

³²Pu Ketasimani va'ajimareja Jesu Huni tisaiporu ijá 'iama Ja iki hi'eje Na siporua 'ojuma 'iamana.

³³'E'ikaivo Jesu Pita ho Jemisi ho 'ee Joni ijá aherama va'eme Jesu oja pa'are'eme niho'o temuma paranana.

³⁴'Ejume Hu pu ijá 'iama Na temukimu. Nuni oja turame kwa'i 'ahiu. 'Enakúne iki Na 'ajiha niri'i hi'avara 'iamana.

³⁵Hu kahá irechami'i kaivo mwe'i one siporua 'ona ijá 'wama Oni ura re'amajaho veje Na vea mukakaho asinavuma 'wamana.

³⁶Hu ijí siporua 'one ijá 'wama Amo Amo A uneunecha mapoka areri veji'ina. 'Enakúne veje ike kapusia ka'ene Nununai namuji ape va'a. 'Ene Nuni ura ijaho pana kaivo oni ura ijara renama 'wamana.

³⁷Hu siporua 'one 'unama roi'i kimajaho pu notuma kime Hu Pita ijá 'wama Saimani a neji'i hino? A vea muka ma'uako areri niri'i hi'ena ho pane?

³⁸Ja niri'i siporua 'oji'i hi'irakúne vwiha sisesa pairisami'amana. 'Avenijaho ura rena paranu kaivo hahijaho ajuaranu 'iamana.

³⁹Hu kú'o 'unama va'e siporua marako 'onaja'ina'e 'onana.

⁴⁰Hu kú'o 'unama roe kimajaho pu majama hine notui'i navara. Ijihuni maijaho puni nia niho'o vahima paranana. 'Ejume pu eha iraka 'warahuna puruva renana.

⁴¹'Ejume Hu 'aha no'opisuji 'unama roe kime ijá 'iama Ja siheria vena notuu raka? Vea muka niroa apenana. Emaa Puni Hariha ei pini nahamahe ea siseijihi mihuna.

⁴²'Urija nú va'ava. Ea ka'ene Na nahamahunijaho nirou 'iamana. Jesu Kamovajina

⁴³Jesu ijá 'wara'eju'e pirisiti mama'ina Sikuraipi 'ee emakinepo 'waravume Jutasi ea iropu ropu no'o ijihipuni ea pina'omo hura ea mapoka aherame so'wa hajaa vene roara.

⁴⁴Ea ka'ene Hu nahamahunijaho hu pu maraku 'waramana. Ea ka'ene na ura mina veja ka'avajaho ijinakúne apena va'i kaivo hami 'ajo'avara 'iamana.

⁴⁵'Ejume Jutasi vea panisa'ika'i va'e Jesuni nini va'i kaivo ijá 'wama Najuhi'ine 'wa'i kaivo ura mina venana.

⁴⁶'Ejumakavi'i pu ijiji 'unama apejara.

⁴⁷Ijá ve'eme ea ka'ene ija naminajara ni'aha kwino huni haha 'ahi so'wa mavana apene 'anaume sosia 'ajohi'ina ni'inijihuni pwea ataa 'uhu'usunahana.

⁴⁸Jesu ijá 'iama 'Ú ja ea nesa apeji'ina ape'iro 'ahiume so'wa hajaa vena roare?

⁴⁹Na'ia mapoka'e Na ja pu'úmo Temiporu vaji hina najahujaho ja Na pa'unirivara. 'Enakaivo iviamaa iraka ka'ene renukaho Godoni ira vaji 'waramajara renu 'iamana.

⁵⁰'Ejume Huni tisaiporu Hu rana'ika'i juhaha va'ara.

⁵¹Kivasa pina ateharu raananame haha maisu Jesu 'ararihae va'ume pu hu 'u'o aharu 'onavume huni ateha tajahe'une 'o'eme maisu aseha va'ana. Jesu Aheme Kanisoru Puni Una'i Roajina

⁵³'Ejume pu Jesu apena va'e pirisiti ni'ini jihuni va'umakivi'i pirisiti mama'ina 'ee Sikuraipija 'ee emainijihi pu'úmo nianaa ijí roara.

⁵⁴'E'eme Pitaho Jesu túna'i 'ararihia va'e pirisiti ni'ini jihuni sei va'ana. 'Ene hu pirisiti kajihuni pwehijijihi pu'úmo vena iruha hinana.

⁵⁵Pirisiti mama'ina kanisoru epo pu'úmo ea irahipo Jesu namaha kamareje apena 'ana'i 'ahiume ijihuni 'unama savajaho papiunavara.

⁵⁶Ea mapoka ira 'atijino namahara kaivo puni vu'a ani ani renarena nimaa parejara.

⁵⁷Ea 'aho'a 'urina namiji'i Jesu ira'atijino namaha ijá 'wava

⁵⁸Nú hejuma Hu ijá 'waramana Temiporukaho emaapo vejara'omo Na veje tira'usuna'ira'omo na'ia no'opisu pa'are'eje Na pina veje ma'ori rena nami'ena 'wavara.

⁵⁹'Enakaivo puni vu'a ani ani renarena nimaa parejara.

⁶⁰'Ejume pirisiti ni'inijara Jesu apoma ijá 'wama 'Ú A ea pina eha pa'waramo? A iraka sisea vejume pu kavara'omo 'waravo? 'wamana.

⁶¹'Enakaivo Jesu masuani hi'i kaivo ira pa'waravume pirisiti ni'inijara kú'o apoma ijá 'wama 'Ú A Keriso ka'ene Nimerajaha jihuni Harihe? 'wamana.

⁶²Jesu ijá 'wama I'a Na ijina. Ema Puni Harihijaho ka'eje harura rukima'uri jihuni mana'inija'i asuma hi'eje ichutoi 'imitiji'i rena rohuna.

⁶³'Ejume pirisiti ni'inijaho ijí henarena Huni ateha isokuji'i ijá 'iama Ja paki'eje ea 'aho'a kú'o vu'a 'aho'a 'eka roava.

⁶⁴Ja nihejare Jesu Godi mataha avanana. Ja ichá vwihajo? 'iamana. Pu maho'o namahe Hu kwahuna 'wavara.

⁶⁵'Ejume ea 'aho'a Hu cheri 'otie 'ee urania hwamahe haisi 'anai'i ijá 'wava Irahipo 'anaukúne 'waruva heja 'wavara. 'Eji'i sorutiapo ninu tahijahara. Pitara Jesu Hemahajina

⁶⁶Pita majaa ara hari nami'ejume pirisiti ni'inijihuni pweijaho napara'omo roana.

⁶⁷'Enarena hu kamajaho Pitaho ijí vena iruhi'i hijumakame niho'o nia hami kavi'i ijá 'wama Ea ikere a 'u'o Jesu ka'ene Nasareti oriji'i 'uraha oji'ina 'wamana.

⁶⁸'Enakaivo Pitaho niho'o hema parana ijá 'wama Pana! A uneka ka'ene 'warimu kajaho na niho'o pahejura 'wa'ika'i samai va'ana.

⁶⁹Napara kajara Pita kamarena hu ea 'aho'a ka'ene ijá namijajija kú'o ijá 'iama Ea ikaho Jesuni ea 'iamana.

⁷⁰'Enakaivo Pita kú'o hemana. 'Ejume ma'uako hinareje ea pina Pita oni rori naminajara ijá 'wama A nimaa nimaa puni ea pina. 'Ene a 'u'o nimaa nimaa Karari ora 'wamana.

⁷¹'Enakaivo hu sirikaravi'i ichutoa pikime 'urarahi'i ijá 'wama Na niho'o ea ka'ene ja rona 'warivu kajaho pakavura 'iamana.

⁷²'E'eme ijakaru 'u'ora 'aha no'o 'umenana. 'E'eme iji'a Pitaho Jesura vu'a ka'ene 'waramajaho vwihanana. 'U'ora mai'o 'aha no'o pa'ume'eje a 'aha no'opisu Na pakimuna i'ena 'wamajaho vwihanarena niho'o ni'ima'ura niramana.