Read Managalasi Maka 3 Bible Online

Maka 3 - Managalasi bible

Maka 3

¹Jesu Sinakoku kú'o vai'i kavume ea ka'ene ija ajuaraji'inijaho ijí hinana.

²'Ejume pu Jesu Sapati vei iraka veja ka'i 'ahiume Hu ea ija ajuaraji'inijaho veje mara'ena 'aho pamara'ena ronareja hina kanavara. Jesu veje maraja kamareje pu nama 'ahiume avajara.

³Jesu ea ija ajuaraji'inijaho ijá 'wama A 'urina namina roa 'wamana.

⁴Jesu pu ijá 'iama 'Ú nú Sapati uneunecha mamaa vehuna ho sisea vehune? Ea ni'ajihuna ho ea 'anie kwamasa'eja 'iavume pu varirareasahe mahina nii ma kame ira pa'waravara.

⁵Jesu pu kimajaho Hu oja ajimana kaivo pu Jesu pata'arohajara Hu temumana. 'Ejume Jesu ea ija ajuaraji'iniji ijá 'wama Oni ija ahasirima 'wavume hu ahasirivume maranana.

⁶Parasi ijipo Heroti oni kanisoruepo pu'úmo marako'a ma'ahi va'ajime ahuma hina Pu ichá'ina Jesu 'anaa kwahuna'e 'wavara. Ea Mapoka Karari Soha Rori Ani Renavajina

⁷Jesu tisaiporuhwa pu'úmo sohi va'eme ea mapoka Karari ora 'ee Jutia ora Hu 'ararihaara.

⁸Ea mapoka Jerusaremi ora Itumea ora Jotani ona kara'i hijura 'ee Taia Saitoni orapo Jesura raka ka'ene venaji hejajaho pu ka'iro roara.

⁹Jesu tisaiporuhwaha ijá 'iama Va'ajime sisima kame apena roe ranave na'eje emaapo Na mwavahinami'avajaho Na ijí ajime vahuna 'iamana.

¹⁰Hu ea mapoka veju'e marania jihuni hahi ea puni haha siseijipo Jesu iji 'una'i 'ahiume tacharavara.

¹¹'Avena siseapo vea ka'ene Jesu kavujaho mwe'i arihi'i A Godoni Hariha 'umejura.

¹²'Ejume Jesu pu ira kisi 'waravume Hu ea irana parone 'warahuna 'waramana. Jesura Ea Iropuropu No'o Pijihajina

¹³'Ejume Jesu va kahi huri'a 'ahi va'iro vai'i ea ka'ene Hu ura rejajija 'waravume pu 'urine pu pu'úmo va'ara.

¹⁴'Ejume Hu ea iropu ropu no'o iji pijihe pu pu'úmo 'urahojujija Hu irechamie ea najaha apenohuna.

¹⁵'Ene Hu harura mihe pu 'avena sisea siomahuna.

¹⁶Hu ea iropu ropu no'o 'eka irechamia kajihipuni iha Saimani iha pina Pita 'iamarena

¹⁷Jemisi'o Joni'o Sepati oni harihija Jesu pu ea no'ona kaivo iha nikwinu'ina kaji Poanejisi ahuma 'uriha 'waramana. Ihaka Poanejisina 'wavujihuni maijaho Akúpi 'Anúu Harihija 'wavura.

¹⁸Enituru ho Piripu ho Pataramiu ho Matiu ho Tomasi ho Jemisi ho Aripiasi oni hariha'o Tariasi ho Saimani ho Kenani ora

¹⁹Jutasi Isikariati Jesu niho'o nahamahajina. Jesune 'Ee Pierisiparu

²⁰'Ejume pu va'e sei 'iruma i'iro ve'eme ea mapoka mapoka kú'o ani rejume pu 'iruma paijara.

²¹Ea mapoka 'wamapenonu va'ume ijá 'wava Jesu nanamukúne 'wavajihuna'e Huni ehijijipo va'e ahe'iro va'ara.

²²'Ejume Sikuraipijipo Jerusaremi rena roajivi'i ira'atiji ijá 'iava 'Avena sisea Pierisiparu ka'ene 'avena sisea 'ajoha'inijara Jesu ajivi'ina'omo 'avena sisea kajara Jesu ni'ajahu'ukame ea 'avena sisea ajima'inijija siokunia ato'arumauna 'iavara.

²³Jesu pu 'umenaume Huni roume Hu haa 'warama ijá 'iama Ichái'ina'e Setaniho Setani sioku'ena?

²⁴Ara ahaama hina 'arahi'i hi'ipisa areri pa'areja'a.

²⁵Kachi'inapo 'urai'i hi'ipisa pu ahaame hija'a.

²⁶'Eje Setani oni pwehija 'avena sisea'omo pu pu'úmo 'arahi'i hi'ipisa pu ahaama hinareje pa'areja'a.

²⁷'Ene ea roe ea ajisima'ori jihuni sei ajima kukua 'eka'iro ro'ipisa hu marako ajisina kajaho kamo'i kaivo ijia huni kukua 'etujaha'a.

²⁸Heha! Na nimaa ja 'waravu. Na emaa puni sisea mapoka'e vwihanie arehuna. 'Ee sisea niho'o mapoka ani ani'ina ea rona'avajaho Godi vwihanie arehuna.

²⁹'Enakaivo Godi oni 'Aveniji rona'avajaho Hu pavwihana arehuna kaivo majama eha sisei mahuna 'iamana.

³⁰Hu ija'ina'e 'warama jihuni maijaho pu ijá 'wava Jesuho 'avena sisei ajivi'ina 'wavara. Jesuni Oha 'Ee 'U'uhwapo Roajina

³¹'E'ejume oaha 'u'uhwa pu'úmo roe ma'ahi nami'i kaivo Hu ro'amarono 'umejara.

³²Ea ka'ene Jesuni rori namijajipo Jesu ijá 'wava Hena! Ohona 'u'uhuana roe ma'ahi A saravu 'wavara.

³³Jesu pu ijá 'iama Nuni ohija 'ee 'u'uhija irahije? 'iamana.

³⁴Hu 'urina ea ka'ene Huni rori hija kaji kimapenoji'i ijá 'iama Ike kiha! Nuni oha 'u'uhija ikena.

³⁵Ea irahipo Godoni ira hena veji'inijija Nuni 'u'uhije 'ee Nuni ma'ipija 'ee Nuni oha 'iamana.