Read Managalasi Maka 5 Bible Online

Maka 5 - Managalasi bible

Maka 5

¹'Ejume pu soha sue ropuna'i kwaa iha Kerasinisi usevara.

²Hu sisima vaji ariha ro'eme ea ka'ene 'avena sisei ajivi'inijaho euchi hinuna'omo roe piunamana.

³Ea kajaho euchi hinuna'omo ea hu niho'o senia areri pakamovura.

⁴Na'ia mapoka'e ea kajaho anikuroa 'ee senia kamovujaho hu turama useuna'omo ei pini hua 'ajoahuna areri pana.

⁵Hu na'ia veiri'a euchia 'ee huri'a vaji emaavaji'i muna 'eke huni haha puavi'i hinuna.

⁶'Ejume hu kahakaro namiji'i Jesu kamarena ninuma roe Huni una'i nitupari samana.

⁷Hu ira ajira emaavaji'i ijá 'wama Jesu Godi niho'o Natohwi jihuni Hariha A iraka na veti'ena? Na jarirama 'waravukúne A na pasise'i 'ahi'amana 'wamana.

⁸'Avena siseijara 'warama jihuni maijaho Jesura 'avena siseakera eakaho rana'i kaivo 'e'una 'wamajihuna'e 'waramana.

⁹'Ejume Hu ijá 'wama Oni iha irane? 'wamana. Hu eha vena ijá 'wama Nuni iha Rijani. Ijihuni maijaho nú 'avena mapoka 'wamana.

¹⁰Hu hina mi'imi'ivi'i Hu kwaa pina pairechamúe va'a 'wamana.

¹¹Maha mapoka kahe 'iruma iji'i huri'a hari hiju.

¹²'Ejume pu mi'imi'ivi'i Hu ijá 'wava A irechamúe nú va'e maha kahehi puni vaji va'a 'wavara.

¹³'Ejume Jesu pu irechamiume 'avena sisesa kajija ariha va'e maha ajimaume maha mapoka mapoka (2,000) ni'aha kwinu 'urina ninukujaha va'e rarahi arihe soha vaji niname imwasamiume kwamasahara.

¹⁴Emaa ka'ene maha 'ajohi'inijija kimareja juhaha ninuma va'e ari ora'e 'waramapenojume ea mapoka raka ka'ene renaji ki'i 'ahiume roara.

¹⁵Pu Jesuni roi kavume ea ka'ene 'avena sisei ajivi'inijaho ateha iruhe húmata mara'eme masuani hijuma pu kamareja niho'o tea junamana.

¹⁶Ea ka'ene kavajipo 'avena sisei ajivi'ini jihuni vu'a 'ee maha puni vu'a ni'aha kwino ari ora 'waravara.

¹⁷'Ejume ari ora kajipo aneja vene 'ejahae ijá 'wava A núni kwaa are'i kaivo va'a 'wavara.

¹⁸'Ejume Hu 'urina sisima ajima va'iro vejumakavi'i ea ka'ene 'avena sisei ajivi'ina kajara Hu hu'úmo va'irono 'waramana.

¹⁹Hu tanurahe pava'amarono 'waramana. 'Enakaivo Hu ijá 'wama Ehuapuni va'e raka ka'ene Godira vetae ni'ajahajaho ijá ehuana 'wara'amana 'wamana.

²⁰'Ejume hu 'urina va'e Tikaparasi Jesura raka ka'ene hua'e vetiajaho ijá najahume pu ea maho'o hena oja niho'o hwa'usahara. Jairasi Oni 'Apaja 'Ee Napari Jesuni Ateha 'Unamajina

²¹Sisima 'aha kajino Jesu kú'o sue toa ropuna'i va'eme ea mapoka toa rora kajino nianaa roara.

²²Jairasi Sinakoku kaukara 'ajohi'ina pina'omo roe Jesu kame nitupari satiana.

²³'Ene niho'o 'ejahae ijá 'wama Nuni 'apaja niho'o kwa'iro venu. A huni roe ija 'unave maraje hinama 'wamana.

²⁴'Ejume Jesu hu hu'úmo va'eme ea mapoka roajime 'unama tanu'urahara.

²⁵Napara pina juara iropu ropu no'o 'ai vuaravu'e hinuna.

²⁶'Ejukamare'e hu juketapo na'ia mapoka amairiahura kaivo hu pamaranuna. Hu monia mapoka 'úsia 'imenuna kaivo venahujaho pamarane 'ee niho'o siserana paranuna.

²⁷Ijá ve'eme napara kajaho hiji'i hejume ea 'ahopo Jesura raka ka'ene venuji 'wavuma henarena 'urina ea vaja kajino 'uraha ruva'uvaume Jesuni túna'i namiji'i Huni ateha 'unamana.

²⁸Hu ijá rona Na Huni atehake 'una'ujaho sonahi'ena ronana.

²⁹'E'ikaivo hu ateha Huna kajaho uri 'unama kajino ni'aha kwino 'aa huna kajaho pa'arenana. 'Ejume napara kajaho henajaho huni haha vaja sonanana.

³⁰Ijá ve'eme Jesuni harura ma'uako pa'arejuma henarena Jesu ta'arohe nia niriapenoji'i aporama ijá 'iama Irara Nuni ateha 'unamane? 'iamana.

³¹'Ejume tisaiporu epo ijá 'wava Ea mapoka ani reja kajihipuni vaji A naminana'omo pura 'unaravara. 'Enakaivo A raka vena Irara 'unirimana 'úmo? 'wavara.

³²Jesu kú'o nirie napara ka'ene ateha 'unamajaho samapenonana.

³³Ijá ve'eme ijí napara kajaho henajaho huni haha nisonavuma henarena juma simavi'i ni'aha kwino Jesuni una'i oji'i nahama Jesu 'waramana.

³⁴Hu napara kajaho ijá 'wama Naparakera a iraka ka'ene nimaa rona ijarahara vejume a maranaana. A sonahaanakúna teamana'eje va'a 'wamana.

³⁵Hu hina vu'a 'wara'eme ea 'aho'a Sinakoku natohwijihuni sei rena roe ijá 'wava 'Apajuna nikwamana kaivo rakijihuna'e Najahi'ina 'waravi'i hino? 'wavara.

³⁶'Enakaivo ea kajipuhipo vu'aka 'waravajaho Jesu henarena Hu Sinakoku natohwa ijá 'wama A patea junamana kaivo nimaa ro'amana 'wamana.

³⁷'Ejume Jesu ea mapoka ruravume hijumakivi'i Pita ho Jemisi ho 'ee 'u'ua huna Jonina'omo ijihi pu'úmo va'ara.

³⁸'Ejume pu va'e Sinakoku natohwi jihuni sei usevi'i hejume pu niramaruma piraname niho'o natohwa temukavara.

³⁹'Ejume Hu ijí sei vaji ajima va'arena ijá 'iama Ja raka venare'e niramaruvo? Napaiseakaho pakwamana kaivo hu nenu 'iamana.

⁴⁰'Ejume pu ijahume Hu pu ma'ahi irechamiuma va'ara. 'Ejume Jesu Huni tisaiporu no'opisune oaha omaha aherame napaisea kajara namajino va'ara.

⁴¹Jesu napaisea ija 'unavi'i Arameka opuni iri ijá 'wama Tarita Kumi 'wamana. Tarita Kumi ijihuni maijaho napaiseakera 'urina!

⁴²'Ejume ni'aha kwinu napaisea kajaho 'urina 'urahonana. Napaisea kajaho juara iropu ropu no'o pa'arenana. Ijá vejuma kamarena ea ka'ene ijí hijajaho niho'o natohwa oja hwa'usahara.

⁴³Jesu pu ajira ijá 'iama Ja ike Nara vejukaho ea 'aho'a pa'wara'avara kaivo napaiseakaho 'iruma i'imaha 'iamana.