Read Managalasi Maka 9 Bible Online

Maka 9 - Managalasi bible

Maka 9

¹Jesu ijá 'iama Na nimaa nimaa 'waravu. Ea 'aho'a ike namijukija pu marako'a Godira haruriji'i 'ajoha'i roa kamareja'e túna'i kwamasahuna 'iamana. Ta'arohe Ani'ina Renajina

²Vea iropu kwino pa'are'eme Jesura Pitane Jemisine Jonine ijá aherama va'e huri'i ajima va'ume pu Huni haha kavajaho ta'arohe ani'ina renana.

³Huni atehijija ahaniha sajasa'imaa rejara. Ei pini mwe'i súhui sovu'e rejuja'ina pa'ana.

⁴Ija'ina re'eme Iraija'o Mosisi'o Jesu pu'úmo hina vu'a 'wavara.

⁵Pita 'urina Jesu ijá 'wama Najuhi'ine mamaa vene nú ja pu'úmo hiju. Nú joni sosura ara venahuna. Pina Ona vene pina Mosisi ona vene pina Iraija ona vehuna 'wamana.

⁶Pu tea junava jihuna'e hu puruva re'eme ija'ina 'waramana.

⁷'Imitia satu'uri'eme ira 'imiti vaji ijá 'iama Ikaho Nuni Hariha Na Hu oja mahu. 'Enajihuna'e Huni ira he'avara 'iamana.

⁸Ni'aha kwinu ijá re'eme nia niriapenojajaho ea 'aho'a paki'eme Jesu Huhusu kavara.

⁹Pu huri'i rene ariha roi'i Jesu ijá 'iama Ja iraka ka'ene kavajaho ea pa'wara'avara kaivo Ema Puni Harihijara kwamareje kú'o 'uri'eje iji'a 'wara'avara.

¹⁰Hura 'waramajaho pu hena puni vaji irechavara kaivo pu hina kwama 'urihuni jihuni maijaho irake 'wamareje pu pira'aravi'i hijara.

¹¹Pu Jesu apoma ijá 'wava Irakijihuna'e Sikuraipiepo 'waravajaho Iraija marako rohuna 'wavara.

¹²Jesu ijá 'iama Nimaa Iraija nimarako roare'e 'unama arira amairiu. Irakijihuna'e nitama Godoni heha 'ahi venarena ijá 'iamaEma Puni Harihijaho sise'i 'ahaareje Hu niho'o ura parenahuna 'iamana.

¹³'Enakaivo Na ja 'waravu Iraija niroana kaivo pu iraka sise'i 'aha'i vejajaho pu vejara'omo heha 'ahi ija'ina namu 'iamana. Jesura Paruisea Ka'ene 'Avena Sisei Rosamaji Vejume Maranajina

¹⁴Jesu 'urina tisaiporuhwa puni roarena ru'e'uji'i ea mapoka ahuma hi'eme kivume Sikuraipijijahija hina Jesuni tisaiporu epu'úmo ninakaravi'i hijara.

¹⁵'E'eme ea mapoka kajijahija Jesu kame tatovi'i ninuma va'e ija apena 'ajovara.

¹⁶Jesura Sikuraipijija aporama ijá 'iama Ja raka pu pu'úmo ninakaravi'i hijo? 'iamana.

¹⁷'Ejume ea mapoka puni vaja kajino ei pini ijá 'wama Najuhi'ina na nuni hariha Oni apena roujihuni maijaho 'avena sisea ajimarena ira pa'arena jihuna'e apena routa.

¹⁸Ichihi chihi 'avena sisea kajara ajimujaho 'unamapena mwe'i ranavu'e irasapa ani rene upaja nii'i haha tanuka ape'asahe haha kaisima'ura renuna. Na Oni tisaiporujija 'warave 'avena sisea 'ararihihunijaho areri parenu 'wamana.

¹⁹Jesu ijá 'iama Ja iviama ike 'urina hijukija niho'o panimaa roji'ina. 'Ú Na na'ia icharu ja pu'úmo hijo? Na na'ia icharo masuani ja pu'úmo hina apena route? Sesamaa kajaho ahema Nuni roha 'iamana.

²⁰'Ejume pu sesamaa kajaho aheme Huni roume 'avena kajara Jesu kamarena sesamaa kajaho apena pi'onavume mwe'i 'ona kuchikuchivi'i ira sapa ani renana.

²¹Jesu omaha apoma ijá 'wama Na'ia icharo ija'ina renane? 'wamana. Omahi ijá 'wama Nitamatama sesamu'uru nija'ina renana.

²²Na'ia mapoka'e 'avena sisea kajarahara 'unama pi'onavu'e veni rene 'ee toi 'ona kwa'amarono venuna. A areri rene 'ee temuka'amajaho ni'ajúhe veje mara'amana 'wamana.

²³Jesu hu ijá 'wama A nimaa ro'amajaho arerina. Ea irara nimaa ro'amajaho uneunecha ani ani'ina hununaa areri rehuna 'wamana.

²⁴'Ejume sesamaa kajihuni omijara 'urina ijá 'wama Na nimaa rojukúne na nimaa parojujaho ni'aji'amana 'wamana.

²⁵Jesu ki'eme ea mapoka ka'ene hina vu'a heja kajipuhipo nianaa apene ronuronu roajivuma kivi'i Jesu 'avena sisea kajaho 'urarahi'i ijá 'wama 'Avena sisea ka'ene ira pa'a ataa pa'akera ariha va'amana kaivo a túna'i kú'o pa'unama ro'amana 'wamana.

²⁶'Ejume 'avena sisea kajaho kú'o emaavaji'i sesamaa kajaho apene pi'onamana. Iji'a ijá venarena are'i kaivo hu va'ana. Sesamaa kajaho kwamuja'ina rejume ea mapoka ijá 'wava Hu nikwamana 'wavara.

²⁷Jesu sesamaa kajaho iji 'unamapena 'urijume 'urina naminana.

²⁸'Ejume Jesu sei va'e tisaiporuhwa pu'úmo pupusu hiji'i pu Hu ijá 'wava Irakijihuna'e 'avena sisea kajaho nú areri patasiomahare? 'wavara.

²⁹Jesu eha vene ijá 'iama 'Avena sisea ija'ina siomahunijaho 'unama nikwinu'wi siporui reje siomahuna 'iamana. Jesura Kwama 'Urihuniji Rona 'Waramajina

³⁰Pu kwaa kajaho are'i kaivo 'urina Karari vaji usema va'ara. Kwaa ka'ene Hura hinuji erapo kame hehunijaho Hu ura parenana.

³¹Ijihuni maijaho Hu tisaipuruhwaha najaharena Noinijá 'iama Emaa Puni Harihijaho ea 'ahopo apene ea 'aho'a mihe pu Hu 'anaa kwamareje vea no'opisu mwe'i vaji namareje kú'o 'urihuna 'iamana.

³²'Enakaivo Hu pu 'warama jihuni maijaho pahenareja pu Hu apohunijaho junavume paapovara. Irara Natohwane?

³³Pu 'urine Kapeniami va'ajime Hu sei vaji hi'i kaivo Hu pu aporama ijá 'iama Ja vwama toi roajaho iraka 'wamapena roare? 'iamana.

³⁴'Enakaivo pu eha pa'warava jihuni maijaho pu 'unama toi pira'aramareja Irara natohwana 'wavajihuna'e eha pa'wavara.

³⁵'Ejume Jesu asuma hi'i kaivo tisaiporuhwaha iropu ropu no'o 'umenauma roumakivi'i ijá 'iama Ea irara amura re'i ve'amajaho hu túchamai rehune 'ee 'eka mapoki jihipuni pwea rehuna 'iamana.

³⁶Jesu sesamaa pina 'waravume puni una'i namijumakavi'i Hu ija haha 'unavi'i ijá 'iama

³⁷Ea irara sesamaa ija'ina Nuni iha 'ahi ni'aja'amajaho hu Na ni'ajihe avahuna. Ea irara Na apeni'amajaho hu nimaa Godi ka'ene ranamiume Na roaji ape'ena 'iamana. Ea Irara Nú Pu'úmo Paninakaramujaho Hu Núna

³⁸Joni Jesu ijá 'wama Najuhi'ine nú ea pina kavume hu Oni ihi 'urahi'i 'avena sisea siomahume kavara. Hu núni pwina pa'ajihuna'e nú hu roturahara.

³⁹'Enakaivo Jesu ijá 'iama Ja hu parotura'avara. Ea irara Nuni ihi 'urahi'i mamaa ve'amajaho hu túna'i Nununa'i sisea pa'wara'ena.

⁴⁰Ea irara nú pu'úmo paninakaramujaho hu núni ea.

⁴¹Ea irara a Keriso onijihuna'e kapusi toa 'e ma'amajaho Na nimaa nimaa 'waravu hu huni ea paasinahuna. Sisea Ve'avarono Vena Kivujina

⁴²Sesamaa pini Na nimaa ro'eje ei pini sisei veje hu nimaa ro'amaji are'amajaho maijaho ja aji apene muna ahisima'uri huni oroi vevahame soha vaji pi'onave o'ipisa ja mamaa veja'a.

⁴³Oni iji veje a Godoni 'unama pataaro'amajaho a 'uhuna'amana. Maijaho a ija rona kwinu apene hia mamaa apehuna kaivo ija no'ohe'i re'amajaho veni renuni kwaa ka'ene vena pa'utarotisavi'ini ijino va'ena.

⁴⁴Ara kajaho hucha pakwamasahi'ine 'ee vena pa'utarotisavi'ina.

⁴⁵Oni mumori veje a Godoni 'unama pataaro'amajaho 'uhuna'amana. Maijaho a mumora kwinu apene hia mamaa apehuna kaivo mumora no'ohe'i re'amajaho veni renuni kwaa ka'ene vena pa'utarotisavi'ina ijino va'ena.

⁴⁶Ara kajaho hucha pakwamasahi'ine 'ee vena pa'utarotisavi'ina.

⁴⁷Oni nii veje a Godoni 'unama pataaro'amajaho a oni nia 'anae supa'amana. Maijaho a nia kwinu apene hia mamaa apehuna kaivo nia no'ohe'i re'amajaho veni rehuni kwaa ka'ene vena pa'utarotisavi'ina ijino va'ena.

⁴⁸Ara kajaho hucha pakwamasahi'ine 'ee vena pa'utarotisavi'ina.

⁴⁹Godi ea mapoka veni vena kihuna.

⁵⁰Misa mamaa kaivo misa kajihuni vweijara pa'are'ipisa 'ú nú ichá'ina veje kú'o vwea reja'e? Emaa misa puna'i vwea rukina re'avajaho ja joni oja hami 'ajohe 'unama maa vejajihuna'e ja ea mapoka pu'úmo hami hihuna.