Read Managalasi Ruku 13 Bible Online

Ruku 13 - Managalasi bible

Ruku 13

¹Vea kajino ea 'aho'a ijino hijara'omo pu Jesuho ijá 'wava Karari ora 'aho'a hine Godoni swasa'e ve'eme Pairatira 'anie puni 'aa swasa ka'ene pura vejajihuni toi ahumana 'wavara.

²'Ejume Hu eha vene ijá 'iama Ja vwihajujaho Karari ora ikihi puni siseijara vu Karari 'aho'a puni sisea asitaha raka?

³'Enakaivo Na ja ijá 'iavo Pana! Ja joni sisea pavwihane ta'arohe nahama 'wara'avajaho ja 'u'o ija'ina'e kwamasahuna.

⁴'Enakaivo ja vwihajujaho ea 'aho'a (18) ka'ene Sairoami ari 'aume 'aniume kwamasaha jihipuni siseijara ea ka'ene Jerusaremi hijujihipuni siseijaho asitahane? 'iamana.

⁵'Enakaivo Na ja ijá 'iavo Pana! Ja joni sisea pavwihane ta'arohe nahama 'wara'avajaho ja 'u'o ija'ina'e kwamasahuna 'iamana. Tavo'a Ka'ene 'Ina Pa'ajina

⁶'Enarena Hu haakaho 'waramarena ijá 'iama Ea pina tavo'a huni juasi'i 'onavume naminuna'omo hu va'e maa 'eka amena i'i 'ahau'e va'ujaho mai parenuna.

⁷'Ena'omo hu huni juara'e 'ajohi'iniji ijá 'wama Na juara no'opisu 'ina 'eka'irono saravuta kaivo pina paapejuta. Ijihuni hahi mwe'a'e nisamukúne vwina pi'onama 'wamana.

⁸'Enakaivo ea ka'ene juara kaji 'ajohi'inijara ijá 'wama Natohwe! Maka'eje juara kwinu namijakame Nara 'úsia aneja kajino irechavakame mara'amana.

⁹'Ejakame juara pinijino tavo'akara maa re'amajaho mavarasa'ina'e rehuna kaivo maa pare'amajaho vwi'eju 'wamana 'iamana. Sapati Jesura Napara Túpa Irivi'ina Vejume Maranaajina

¹⁰Na'ia pina Jua puni Sapatia veijino Jesu Jua puni Sinakoku vaji hine najahana.

¹¹'E'eme napara pina juara mapoka (18) 'avena sisei vejume huni túpa nivunama navukame arini namina ohuna areria pana.

¹²'Ejume vea ka'ene Jesura kamarena 'umejume roume ijá 'wama Napara karere oni atama iviamaa maranau 'wamana.

¹³'Enarena Huni ija haha 'ahi ranavume ni'aha kwino huni túpa arira'e rejume Godi ta'arohana.

¹⁴'Ejumakame ea natohwa ka'ene Sinakoku 'ajohi'inijaho Jesura ea vejume Jua puni Sapatia veijino marajumakame ajimana. 'Ejume Hu ea kajihi ijá 'iama Ja na'ia iropu kwinu vajijino kaukaraa vehunakúne ijino roajivakame veje marania'a kaivo Jua puni Sapati veijaho paro ve'avara 'iamana.

¹⁵'Ejume Natohwijara eha vene ijá 'wama Ea ira'asinakera ja ea kwinu kwino Sapati veijino joni toniki 'ee purumakau toa hu'ipisa ja Sapatia vea'omo parasame ahema apene va'e toa maha ija'a raka?

¹⁶'Ena'omo iviamaa ike Eparahami oni 'apajakaho Setani rosavu'e juara mapoka (18) pa'arenajaho hu areri Sapati veakaho paveje mara'ena? 'wamana.

¹⁷'Enaka'i Hura eha ka'ene 'waramajara vejume ea ka'ene Huni nakijija junamana kaivo ea mapoka'e Hura uneunecha ka'ene venajihi kimareja teamanavume mari'uvara. Kwava 'Ina Huni Haa

¹⁸'Enajihuna'e Hu ijá 'iama Godoni arijaho icháine? 'Ú Na Godoni arijaho irakijino mina veji'i 'warahune?

¹⁹Godoni arijaho areri kwava 'ina sa'ina. 'Ena'omo emai apena va'e huni juasi'i 'onamana. 'Ena'omo riamare'e niho'o icha natohwa'e reju'e ukapo roe ijihuni anuama 'ahijino nesa vene hijura 'iamana. Isitia Huni Haa

²⁰Hu kú'o ijá 'iama Na Godoni arijaho irakijino mina veji'i 'warahune?

²¹Ijaho areri napari isitia ka'ene harava 'eke puretia venare'e 'onahukame hwena ajivuja'ina 'iamana. Vwicha Ma'u'uijina

²²Hu ara mama'ina 'ee ma'u'umaa ijino najahi'i Jerusaremi va'i 'ahaume va'ana.

²³'E'eme ea 'ahopo ijá 'wava Natohwe ea makwinu kwino majama hihuna apehuna raka 'wavara. 'Ejume Hu ijá 'iama

²⁴Na nimai ja 'waravukúne hami hami vena kamareje vwicha ka'ene niho'o ma'uatituijaho va'e aru'avara. Ea mapoka'e aru'i 'ahie vehuna kaivo mai'o areri parenahuna.

²⁵'Ejume sea anesurijara 'urine vwicha kuna'eje ja ma'ahi namine vwicha 'ana'anae ijá 'wahune Natohwiji vwicha tirasamúha 'wave anesurijara ijá 'iahune Na ja suja. Ja ichihi rene roajivajaho na pahena pakivurakúne 'iahuna.

²⁶'Ejakame ja ijá 'wahune Nú oni una'i 'iruma ine 'ee toa ijura. 'Ee a roe nuni ari ma'ahi vu'a najuhuna 'wahuna.

²⁷'Ejakame Hu kú'o ijá 'iahune Ja ichí rene ro'ajaho Na suja. 'Enakúne ike sisea veji'inikije usema va'ajiha.

²⁸Ja ruha ka'ene niramarume upaja ja'i'uji'i nahunijino hiji'i Eparahami ho Aisiki ho Jekapi ho 'ee poropeti ki'eje Godoni ari 'uraha oja kihuna kaivo jajasu ato'aruma'e usehuna.

²⁹Ea ka'ene vea ajimuja'i hijura vea 'onuja'i hijura kama'i hijura 'ee kaha'i hijujipo roe Godoni ari 'iruma ine hihuna.

³⁰Heha! Ea ka'ene iviamaa túchamai rejujija urasahuna 'ee ea ka'ene urasahujija túchamai rehuna 'iamana. Jesura Jerusaremi Oja Mahajina

³¹Vea nikwinu'ina kajino Parasia 'aho'a Jesuni roe ijá 'wava A iviamaa ikaho are'i kaivo kwai pini va'amana. Ijihuni maijaho Herotiho A 'ana'i 'ahaukúna 'wavara.

³²'Ejume Hu ijá 'iama Va'e 'ua nea kajaho ijá 'waraha. Na 'avena sisea siome ato'aruma'e 'ee atama ani ani'ina'e iviasi ea veju'e maranie 'ee niara 'u'o venareje nitui Nuni kaukaraa pa'arehuna.

³³'Enakaivo iviasi aneja vene va'ira'omo niari 'unamutoi va'iri nitui va 'e'uhuna. Ijihuni maijaho poropetia kajaho samaumaa pa'anaahuna kaivo Jerusaremi vaji 'anae kwahuna.

³⁴Oo Jerusaremi ore Jerusaremi ore jara poropeti ka'ene irechamiume joni vu'ajija 'aniume kwamasahare 'ee ea 'aho'aka irechamiu'e joni va'ajaho muni 'aniume kwamasahara. Na'iaka mapoka kikano Na ura joni sesamaa aherame rira kwino irecha'i 'ahiuna. Areri 'u'orapo 'u'uhwaha'e huni taha vaji irechavu'e ahuma hijuja'ina'e ve'iro vejujaho ja niho'o ura parenaura.

³⁵Heha! Joni ara kajaho josu pare'eje ranave savasa rehuna. Na ja 'waravu. Ja Na niho'o pakimu va'u'e iji'a ja ika'ina 'wahuna. Natohwijihuni iha 'ahi ea ka'ene roujaho merajaho 'wahuna 'iamana.