Read Managalasi Ruku 14 Bible Online

Ruku 14 - Managalasi bible

Ruku 14

¹Sapati vea kwino Jesuho Parasia ea natohwa pipuni sei 'iruma'e i'i 'ahaume va'eme ea mapoka'e Hu 'ajohareja vevirinavara.

²'E'eme ea pina ka'ene haha hweji'inijara Huni una'i hinana.

³Jesura eha vene roia 'ee Parasia ijá 'iama Mosisi oni tamana ea Sapatia vei veje maranihunijaho areri rehuna 'warumana ho pane? 'iamana.

⁴'Enakaivo pu ira pa'waravume Hu ea kajaho vejume marajumakavi'i ranavume va'ana.

⁵'Enarena Hu pu ijá 'iama Ea pipuni harihina ho purumakaui Sapati vei 'ma'oi o'ipisa ja ea pina pava'e 'enapi ranava'a raka? 'iamana.

⁶'Enakaivo pu ijihuni eha areri pa'waravara. Masuani Hine 'Ee Ea Hami 'Ahihunijina

⁷Vea ka'ene Hu kivume ea ka'ene 'waravume roajipo ruha mamaa ka'ene ea mama'inapo hijuri ruhiji 'eke hi'irono nirie 'ojuma kimarena Hu aneja vene haa ika'ina 'waramana.

⁸Ea 'ahopo ja napara mai'o 'wahajihuni sori va'avajaho ruha ka'ene ea mama'inapo hijuri ruhijija pa'eke hi'avara. Ijihuni maijaho ea ni'ina pina ka'ene hura 'waramajara ro'amajaho a 'uri'eje eakara ruhakaho hinama.

⁹'Ea ka'ene ja no'o 'waravuma roajara roareje a ijá 'wahune Ruhakaho ea ike aremaha 'wave a niho'o juna'eje va túna'i hi'ena.

¹⁰Vea ka'ene ea a 'warave va'amajaho va'e ruha ka'ene túchama ijí apena hi'amana. 'E'irakúne ea ka'ene a 'waravume va'ajara ro'amajaho hu ijá 'wahune Napura nune kahakaro ruha maa kahi va hina 'wave iji'a ea mapoka ka'ene 'aijua rori hijujija a kame ta'arorahuna.

¹¹Ea irara ori'ini huni pinana ahasiri'amajaho vetie hu ajurana ohuna. 'Enakaivo ea irara ori'ini ajuarana o'amajaho vetie huni pinana 'urihuna.

¹²'Enarena Hu ea ka'ene huni sei 'waravume va'ajaho ijá 'wama A ea 'aho'a'e 'iruma vaji'i ve'amajaho oni napuhija vwehija amuhija 'ee ea ka'ene 'iruma ani reji'inaka oni rori hijujija vejuro'i pu a eha veta'ejakúne pa'wara'amana.

¹³A ahaja i'i 'ahae ve'amajaho ea ka'ene uneunecha pa'ana irivi'ina nia supavi'ina 'ee atama 'uniravi'ina 'umena'amana.

¹⁴'E'irakúne a meraja'amana. Ijihuni maijaho pu oni eha areri pavehuna. Vea ka'ene ea mamaa ka'ene kwamasahajipo 'uri'avajino a eha vajahuna 'wamana. Sora Ni'ima'ura Ijuri Haa

¹⁵Ea pina ijino pu pu'úmo hinana'omo ijara henarena Hu ijá 'wama Ea irahipo Godoni ari 'iruma ihunijaho nimerajihane? 'wamana.

¹⁶'Ejume Hu ijá 'wama Ea pini ahaja'e i'i 'ahaume ea mapoka 'umenana.

¹⁷'Iruma'e ihuni veijino ea ka'ene ahaja anesurijara huni pwea ranavume ea ka'ene puni ona'e vejajihi ahera'irono va'e ijá 'iama Roha! Uneunecha amairiaravarakúne roajiha 'iamana.

¹⁸'Enakaivo pu ea kajija niho'o 'unama ani ani'ina mapoka'e saravara. Ea pini pwea kajaho ijá 'wama Na mwe'a maiu'ina'e 'imejuta'omo ijí ka'i 'ahiu'e va'ukúne maki'eje va'uma 'wamana.

¹⁹'Ejume pini ijá 'wama Na purumakaua iropu 'imejuta'omo na ijí 'eka irechama ki'i va'ukúne maki'eje va'uma 'wamana.

²⁰'Ejume ei pini ijá 'wama Na iviamaakano napara 'wahuta'omo ijihuna'e na pavuhuna 'wamana.

²¹'Ejume pweijaho 'unama va'e huni natohwijaho ijá 'waramana. 'Ejume huni natohwijaho ajivume huni pwea ijá 'wama Marako va'e 'unamutoi 'ee ara mama'ina puni utorijino ea ka'ene 'iruma pa'ana 'ee irivi'ina 'ee nia supavi'inijihi aherame roa 'wamana.

²²'Enarena ijí pwea huna kajara ijá 'wama Ara 'warimajaho na nivejuta kaivo ruha mapoka'e navu 'wamana.

²³'Ejume natohwijara ijá 'wama Va'e 'unamutoa 'ee juara arijino ea kimareje 'warave roa kame nuni sea itu'onama 'wamana.

²⁴Na nimaa 'waravuta'omo ea ka'ene nara marako ona vejume paroajija 'iruma ikehuni sahura paihuna 'wamana 'iamana. Tisaiporu Rehuni 'Ahijijina

²⁵Ea mapoka Hu tamatihe va'eme Hu ta'arohe ijá 'iama

²⁶Ea irara Nuni ro'i 'ahae ve'amajaho hu omaha oaha huni napara harihwaha ma'ipwaha 'ee huni haha 'u'o ori'ina pase'amajaho hu Nuni tisaiporua areri parehuna.

²⁷Ea irara Na'e 'ararihie sisea piunamareje niho'o pakisina rene nami'amajaho hu Nuni pwea rehunijaho areria pana.

²⁸Ea irara ara'e ve'i 'ahaujaho 'ú hu marako asuma hine monia icharo 'imene 'ee monia areri reje 'imé parahuniji vwihanune?

²⁹Vejuro'i hararu ve'ika'i pavesirihe ea mapoka kama 'ijahareje ijá 'wahuna

³⁰Eakaho nami'une ve'irepuna'i venana kaivo hu pave para'eju'e namu kaji kaha 'wahuna.

³¹'Enaho kini irara kini pina'i 'ara'i venujaho 'ú hu marako paasuma hine pira'aramuva'o huni ea mapoka (10,000) ijaho 'ee pipuni ea mapoka (20,000) ka'ene hu hu'úmo 'ara'iro roujaho hu areri rehunijaho kama henare'e iji'a va'une?

³²Hu areri harura pare'amajaho ea irechave pura va'e ea natohwa pina mai'o kwaa jori ro'eje piuname ruramareje are'ika'i mataume hiha 'ihuna.

³³'Enajihuna'e ja ea irara huni uneunecha mapoka ka'ene navujipo pase'amajaho hu Nuni tisaiporu areri parehuna. Misa Vwea Pa'ajina

³⁴Misa niho'o mamaa kaivo vea ka'ene ijihuni vwea pa'are'amajaho 'ú ichá veje vwea vukú'o re'ena?

³⁵Ijí misa kajara mwe'a usetie mwe'a marahuna pane 'ee teachaha usetie teamarahuna pana. 'Enakúne ea irara ataa rukina re'amajaho ataa apúsame he'amana 'iamana.