Read Managalasi Ruku 17 Bible Online

Ruku 17 - Managalasi bible

Ruku 17

¹Jesura Huni tisaiporu ijá 'iama Siseijaho na'ia mapoka namuna. 'Enakaivo ea ka'ene ijí veju'e ea sisea vejujaho túna'i eha sisea ni'ima'ura apehuna.

²Ea ka'ene veju'e sesamakihi sisea vejujaho muna natohwa apene oroa 'ahi vevahame soha vaji pi'onave kwa'ipisa areri reja'a.

³'Enakúne ojono hami hami 'ajo'avara. 'Ene joni ei pini sisea ve'amajaho 'urarahe hu huni sisei temu'amajaho vwihane are'amana.

⁴'Enareje hu vea nikwinu'ina vaja kajino 'aha iropu no'o ja sisea vetiareje hu roe siseaka vena kajara temuve are'irono nahama 'warava ka'avajaho vwihana are'avara 'iamana. Nimai Roa

⁵Apasorupo Natohwijaho ijá 'wava Núni nimaaroiji veje natohwa'e renama 'wavara.

⁶Natohwijara ijá 'iama Jara nimaa rojujaho kwava 'ina sa'ina'e re'ipisa ja maraa 'warave joni ira hene tanapi tajahene va'e sohi vaji namija'a. Pwehuni Kaukaraijina

⁷Pwea joni pini juasi'i soa samoja ho sipia'e 'ajoho'ira'omo ro'ipisa ja ija'ina pa'wava'a Marako roe hine 'iruma ona ina pa'wava'a.

⁸'Enakaivo ja ijá 'wava'a Marako nuni 'iruma amairie 'aijua 'ahi irechamihe na 'iruma ija kama'e iji'a túna'i oni 'iruma i'amana 'wava'a.

⁹'Ejakame huni natohwijaho mai'o pweaha kajaho patea mani 'wava'a. Ijihuni maijaho ijaho huni kaukara ijihuna'e hu venuna 'iamana.

¹⁰Ija'ina'e ja Nara 'warauti Nuni ira 'ahijiru ve'i kaivo ja ojono joni oji pa'ene ve'avajaho nú pwea sisea 'waha 'ee nú núni kaukara ijihuna'e vejara 'waha 'iamana. Jesura Reporosia Rukina Ea Iropuropu Vejume Maraniajina

¹¹Hu Jerusaremi va'i 'ahaume Sameria ropua navume Karari ropuna'i na'eme Hu riri va'ana.

¹²'Enarena Hu ara pini va'e 'e'u'eme ea iropu ropu reporosia rukina piunimajaho pu karori namijara.

¹³'Ene pu ira ajira ijá 'umeja Jesu ka'ene Natohwiji'o nú numiruma 'umejara.

¹⁴'Ejume Hu kima ijá 'iama Ja va'e pirisiti joni haha naja'avara 'iamana. 'Ejume pu 'unamutoi va'eme puni reporosia ni'aha kwino pa'arenaara.

¹⁵'E'eme ea kwino huni haha'e kamajaho huni reporosia pa'arenana kamarena 'uname roi'i Godiho niho'o ira ajira'e ta'arohana.

¹⁶'Ena hu roe Huni una'i kajino ona apena arihe niname Jesuho teimani 'wamana. Ea ka'ene ijá venajaho Sameria ora.

¹⁷'Ejume Jesura eha vene ijá 'wama Ea ja iropu ropu maraniana kaivo ea iropu no'ona no'o ijano ichihune?

¹⁸Iraka vene ike ea apiorakara huhuso 'unama roe Godiho ta'aro'i roane? 'wamana.

¹⁹'Enarena Hu hu ijá 'wama 'Urine va'a! Ara nimaa ronujara venaume maranaana 'wamana. Kini Huni Arijara Rohunijina

²⁰Parasia Hu apoma ijá 'wava Vea vecha Godoni arijaho roe aneja re'ena 'wavara. 'Ejume Hu ijá 'iama Godoni arijaho aacha ani ani'ina pare'eje rohuna. 'Ejakame ja pakahuna.

²¹Ea mai'o ija'ina pa'iahuna. Heha! Ikena karona pa'iahuna. Ijihuni maijaho Godoni arijaho ijí joni vajina 'iamana.

²²'Enarena Hu Huni tisaiporu ijá 'iama Mai'o na'ia pini Emaa Puni Hariha kahuna ura renahuna kaivo ja Hu ikaho pakahuna.

²³'Ejakame ea 'ahopo ijá 'iahuna Karohunakúne kaha 'ee ikehunakúne kaha ijá 'iava he'avajaho ja pausema va'e ki'avara.

²⁴Areri vei akúpi 'ahi kama'i pi'ima ro va'e karo'i 'onu kaja'ina'e Ema Puni Harihijihuni veijaho ija'ina rehuna.

²⁵'Enakaivo Hu maraku'ijaho haha natohwa hiame 'ee ea ka'ene iviamai hijujija Hu kame pataarohuna.

²⁶Vea ka'ene Emaa Puni Harihijihuni veijaho ea ka'ene iki mwe'i hi'avajaho areri ea ka'ene Noara mwe'i hi'eme hijaja'ina'e hihuna.

²⁷Noa oni veijino ea mapokakija hine 'iruma'e ine 'ee toa sisea ine 'ee napasinene 'ee napara same areme apene va'eme Noaho huni sisima vaji va'eme sai hirame ea mapoka kajija 'aniume kwamasahara.

²⁸Vukú'o areri Rati oni veijino ea ka'ene hijaja'ina'e hihuna. Ea mapoka kajija hine 'iruma ine 'ee toa sisea ine uneunecha 'imene 'ee ea 'aho'a 'imenae 'ee soa same 'ee ara veji'i hijara.

²⁹'E'eme vea ka'ene Ratira ara iha Satami arema va'eme vena kahino akúpa 'ahi rena roe ea mapoka kajija re paranana.

³⁰Ija'ina'e vea ka'ene Emaa Puni Harihijara ro'amani veijaho ijá rehuna.

³¹Vea kajaho ea pina atahuri nami'amajaho hu kú'o paariha va'e huni kukua ekahune 'ee ea pina juasi'i o'amajaho hu pa'unama ara vahuna.

³²Rati oni napari venaji vwihaha.

³³'Eje ea irara huni hiiji ori ni'ajara'amajaho huni hiijaho ranahuna. 'Ene ea irara huni hiiji ori rana'amajaho hu huni hia 'unanahuna.

³⁴Na ja 'waravu. Na'ia kaji ea no'o ahuma notura'omo ea pina apena va'eje ea pina ranahuna.

³⁵'Ene napara no'o hine ahuma kaukara ve'ira'omo pina apena va'eje pina ranahuna.

³⁶Ea no'o juasi'i 'urahe o'ira'omo pina apene va'eje pina ranahuna 'iamana.

³⁷'Ejume pu Hu eha vene ijá 'wava Natohwe vea vecha ijaho re'ena 'wavara. 'Ejume Hu ija 'iama Unenu'u pini kwama na'amajaho púrúha ijá 'emojura 'iamana.