Read Managalasi Ruku 19 Bible Online

Ruku 19 - Managalasi bible

Ruku 19

¹Hu Jeriko ari ma'aha rira kajino va'ana.

²Ea pina takisia'e apeji'ina ni'ine 'ee monia niho'o ani reji'ina iha huna Sakiasina'omo ara kajino hinuna.

³'Enakaivo ea kajaho ea tu'umaa'omo Jesu ka'i 'ahaume venana kaivo eaka mapokijipo nuhaume pakamana.

⁴'Enarena hu urane ninuma va'e turipa 'ahi Jesura vahuni jihuniji va'e ka'i 'ahaume hinana.

⁵'E'eme Jesura roe hura hinani hari nami'ika'i a'ame kamarena ijá 'wama Sakiasi mamako ariha roa. Ijihuni maijaho Na iviasa oni sei vu'e hi'ejukúne 'wamana.

⁶'Ejume hu mamako ariha roe Hu 'ajomana.

⁷'Ejume pu ea mapoka ijí kamareja su'aravi'i ijá 'wava Hu ea ikaho ea sisea ikehuni sei va'u 'wavara.

⁸'Ejume Sakiasira 'urine Natohwijaho ijá 'wama Hena! Natohwe na nuni kukua pwinana'a ea ka'ene uneunecha pa'ajihi vajihe 'ee nara ea 'ahopuni nesa'e apejujaho na 'aha no'ona no'ona ijano huri eha venahuna 'wamana.

⁹'Ejume Jesura ijá 'wama Godoni Ni'ajihi'inijaho iviasi sea ikino roana. Ijihuna'e ea ike 'u'o Eparahami oni hariha renana.

¹⁰Ijihuni maijaho Ema Puni Harihijara ea ka'ene 'unama puruva renau'ukame pivusaha ojujihi sarame nianae ni'aji'i 'ahaume roana 'wamana. Korutia Oma Huni Haa

¹¹'Enarena Hu ea ka'ene Huni vu'a kaji hejajihi ike haakaho 'waramana. Pu vwihajajaho Godoni ara niro'i venu 'wavara. Ijihuni maijaho Hu Jerusaremi rori va'ajiva jihuna'e pu vwihana 'wavara.

¹²'Enarena Hu ijá 'iama Ea pina ara pini va'e ea natohwa renareje 'unama ro'i 'ahaume va'ana.

¹³Hu iji'a va'i 'ahaume huni pwehija ea iropu ropuna'omo 'umenaume roajivume ea kwinu kwinu monia (K20) vajiha ijá 'iama Na va'eje monia ikaho 'eka va'e unenu'u 'aho'a ve'eje na 'unama routa 'iamana.

¹⁴'E'eme huni aea hura puni natohwa'e rehunijaho senavume pu ea irechamiume ona'e apena va'e ijá 'wava Nú ara núni natohwa'e rehunijaho senumu 'wa'i 'ahiume va'ajivara.

¹⁵Ea kajaho natohwa renarena hu kú'o 'uname roana. 'Enarena hu ni'aha kwino huni pwea ka'ene hu monia vajihajaho pu monia ichá'ina'e vejaji ki'i 'ahaume 'umenaume roajivara.

¹⁶'Ejume ea pini ijá 'wama Natohwe ara monia (K20) ka'ene na vajiha ja'ina'e na kú'o areri ija'ina huri (K200) 'ekuta 'wamana.

¹⁷Hu pwea kajaho ijá 'wama A niho'o mamaa'e venajihuna'e a pwea mamaa. A uneunecha ma'u'umaa hami 'ajoha jihuna'e nara ara mama'ina iropu ropu vajahe ara ijaho 'ajo'ena 'wamana.

¹⁸Ea pini roe ijá 'wama Ara monia (K20) ka'ene mihajino na apene huri vahame (K100) 'eka routa 'wamana.

¹⁹Hu ea kaji ijá 'wama A ara mama'ina iropu 'ajohuna 'wamana.

²⁰Ea pini roarena ijá 'wama Natohwe oni monia na akisi mwama ranavutakúne apena.

²¹A ea ajisina'omo soa ka'ene a pasamajaho a juara samuna. 'Ee a oni ija pa'onajaho a menuna 'wamana.

²²'Ejume ijí ea kajara ijá 'wama Ike niho'o pwea ka'ene ea maa pa'akera ara ichá'ina 'warama jihuni toi na eha mahuna. 'Ú a pahena pakimune? Na ea kisina'omo na raka ka'ene pairechavujaho na 'ekure? 'Ene na nuni iji pa'ojujaho 'ú na pamejure?

²³Iraka vene monia kajaho pa'eka va'e panika vaji irecha'ira'omo na roe ijaho 'eke 'ee 'aho'a ijí huri 'eku'e? 'wamana.

²⁴'Enarena hu ea ka'ene ijá namijaji ijá 'iama Monia ka'ene nara vajahaji kú'o 'eka va'e ea ka'ene monia (K200) venaji maha 'iamana.

²⁵'Enakaivo pu hu ijá 'wava Natohwe huni monia (K200) namu 'wavara.

²⁶Na ja 'waravu. Ea irara uneunecha rukinijaho mapoka huri vajahuna. 'Enakaivo ea irara pa'ana re'amajaho raka ka'ene hununa'i navujaho 'etujahuna.

²⁷'Enakúne iviamaa nuni naka ka'ene nara puni natohwa'e rehunijaho ura parenajija aherame roe nuni una'i 'ania kwamasaha 'iamana. Niho'o Temaraji'i Jerusaremi Vaji Roa Arumajina

²⁸Jesuho ijá 'waravume pa'are'eme Hu urane Jerusaremi va'ana.

²⁹Hu roe huri'a iha Arivi 'wavuraka ara iha Petapeje Petani 'wavujihuni roriji vai'i Huni tisaiporu no'ohe'i irechami'ika'i ika'ina 'waramana.

³⁰Ja va'e ara pini usevi'i kave tonikia pirona i'ivananave namija ka'avajaho ea mai'o ijihuni toi pa'oji'inakúne rasame apene ro'avara.

³¹Ea 'ahopo aporame ijá 'iava he'avajaho Ja iraka'e vene rasavo? 'iava he'avajaho ijá 'ia'avara. Nuni Natohwijara ura reju'e ijihuna'e avaju 'ia'avara 'iamana.

³²'Ejume pu vai'i kivume uneunecha mapoka kajija areri Hu 'warama kaja'ina'e rejara.

³³Pu tonikia pirona kaji rasa'eme ea anesuri aporame ijá 'iama Ja iraka'e ve'irono tonikia pirona kajaho rasavo? 'iamana.

³⁴'Ejume pu ijá 'wava Núni Natohwijara ura reju'e rasavu 'wavara.

³⁵'Ene pu tonikia pirona kajaho apene Jesuni roajivara. 'Ene ateha ijí tonikia 'aha kajino risaremu va'o Jesuho ni'ajaha apene ranavume ajime asuma hinana.

³⁶'Ene Hu va'eju'e pu ateha 'eke 'unamutoi risarevara.

³⁷Pu va'ajime huri'a Arivi rori vutuijino tisaiporu mapoka'e piunime Godira uneunecha mavarasa'ina ka'ene vejume pu kivajihuna'e teimani 'wame 'ee ta'arohi'i va'ajivara.

³⁸Pu ijá 'umejaKinia ka'ene Natohwi jihuni iha 'ahi roujaho merajaha! Matauvi'ina 'akúpi 'ahi name 'ee Godi Ichutomaijí ta'aroha 'umejara.

³⁹'Ejume Parasia 'ahopo ea rira kajino Hu ijá 'wava Najuhi'ine Oni tisaiporu 'uraraha 'wavara.

⁴⁰'Ejume Hu eha vene ijá 'iama Na ja 'waravu. Pu irano'a are'avajaho muna ikipo 'urine mwasirihuna 'iamana. Jesura Jerusaremiumu Venajina

⁴¹Hu ara natohwi jihuni rori roi kamarena niramana.

⁴²Hu ijá 'wama A iviamaa uneka ka'ene venae matauma hihuniji ape'ipisa nimaa roja'a kaivo iviamaa a areri pakahuna.

⁴³Vea ijihunijara ro'eje oni nakapo roe a júhone rora rora kaji rene roaji'eje a 'e'u'amajaho pu tanu'urihuna.

⁴⁴Pu a niho'o tirakunahe 'ee oni sesamaa pu'úmo ea ka'ene ijihuni vaji hijujaho ato'arumahe parane 'ee muna pina oni ruha panahuna. Ijihuni maijaho Godira a ni'aja'i 'ahaume ro'ajaho a pakama jihuna'e avahuna 'wamana. Jesura Temiporua Vaji Va'e Amairiajina

⁴⁵Hu Temiporu vaji va'e ea ka'ene ijí 'ime'aravi'i hijajihija 'ararihiana.

⁴⁶Hu pu ijá 'iama Godira Huni ira vajijino ika'ina venana.Nuni sea Nuni siporua'e 'ohuni ara. 'Enakaivo ja apene nesa apehuni ara'e veju 'iamana.

⁴⁷Hu veku veku Temiporu vaji va'e najahuna. 'Eju'e pirisitia mama'ina 'ee Sikuraipia 'ee emaa puni mama'inijipo 'ana'i 'ahiu'e vejura.

⁴⁸'Enakaivo pu areri parenauna. Ijihuni maijaho ea mapoka roe Hura vu'a ka'ene 'waramujaho niho'o ira avwanamie hejura.