Read Managalasi Ruku 21 Bible Online

Ruku 21 - Managalasi bible

Ruku 21

¹Hu 'urine katua tevua rori ijí hina ea ka'ene uneunecha ani reji'inijija roe puni swara savu kaji kivi'i hinana.

²'E'eme amuna ka'ene uneunecha pa'amaijaho urupa va'aa no'o (tu toia) eru samana.

³'Ejume Hu ijá 'iama Na nimai ja 'waravu. Amuna uneunecha pa'amaa kajarahara moniaka ea mapoka kajipo roe katua ka'ene savajaho asita ranamana.

⁴Ea pu monia mapoka vajaha jihuni maijaho pu monia rukini jihuni hahi avajara kaivo amuna kajaho uneunecha pa'ajihuna'e huna ka'ene areri navuji samajihuna'e hura eaka mapoka monia rukinijaho asita ranamana 'iamana. Jesura Temiporui Tira'usahuna 'Waramajina

⁵Pu ea 'aho'a Temiporu kaji kame 'ee muna mavarasa'ini 'eka vene 'ee swasa ka'ene ichá'ina'e vejuji hine 'wa'eme Jesura ijá 'iamana

⁶Ike uneunecha ka'ene ja kivukaho vea ijihunijara mai'o ro'eje muna mapokakija tira'usunahe 'arii para'eje muna niho'o kwinu huni ruha panahuna 'iamana. Ahija 'Ee Sisei Hihunijina

⁷'Ejume pu Hu apoma ijá 'wava Najuhi'ine ikaho vea vecha re'ena? 'Ee vea kakara pa'are'iro ve'amani urijaho marako'a aacha iraki reja ka'eja? 'wavara.

⁸'Ejume Hu ijá 'iama Ja hami ka'avara. 'Ejakame pu ea ja papisimi'avara. Ijihuni maijaho ea mapoka'e Nuni iha 'ahi roe ijá 'iahune Na Kerisona'omo vea niape'i venu 'iava he'avajaho niho'o pa'ararihi'avara.

⁹'Ejakame ja he'eje kwaa araka mapokija ajira vehune 'ee ijí ajira vehuni pinana kajaho 'urina rohuna. Ija'inijaho re'ena vo urijaho mai'o pava'a 'e'u'enakúne ja niho'o paju'avara 'iamana.

¹⁰'Enarena Hu kú'o ijá 'iama Kwaa ara 'ahopo 'urine 'aho'a ninamahune 'ee ara 'ahopo 'urine ara 'aho'a ninamahuna.

¹¹Kwaa ara mapoka mwevarivura mama'ina rohuna. 'Ene sisemaapo roe 'ee kwaa ara mapoka 'ora vea rene 'ee atama siseapo kwaa ara mapokakaho ani rene 'ee aacha mama'ina ani'ina mapoka sisea akúpi 'ahi kihuna.

¹²Uneunecha mapoka ikija mai'o re'i ve'eje Nuni ihijihuna'e ja aherama va'e sise'i 'ahie 'ee tipurai irechamie 'ee aherama va'e Sinakoku vaji aporame 'ee aherame kinia 'ee kavana epuni una'i vahuna.

¹³Ja vea kajino areri Godoni vu'a mamaijaho pu najahuna.

¹⁴'Enajihuna'e ja nimarako vwihanareje jara vu'a iraka ka'ene 'warahunijaho pavwiha'avara.

¹⁵Ijihuni maijaho Nara vu'a ka'ene ara 'warahuna vajahakame oni naka ara vu'a ka'ene 'wara'amajaho hene pu areri patanu'urahe 'ee pu niho'o unenu'u pina areri pa'warahuna.

¹⁶'Enakaivo emahu jona vwehu jona ehu jona napuhu jonapo nahamahe ea 'ahopo ja 'anie kwamasahuna.

¹⁷Nuni ihijihuna'e ea 'ahopo ja senahuna.

¹⁸'Enakaivo joni húmata sapasa kwisu patausiuhuna.

¹⁹'Enajihuna'e ata kirasahe naminareje ja majama hihuna ape'avara. Jesura Jerusaremi Tira'usahuni Vu'a Ka'ene 'Waramajina

²⁰Ja kave Jerusaremiho amiapo outihe nava ka'avari veijaho ja ika ro'avara. Ara kajara tira'usahuni vea nikehuna ro'avara.

²¹'Ejakame ea ka'ene Jutia hijujija juhahe nahari 'ahi va'e 'ee ea ka'ene ara natohwa kajino hijujija 'usema va'aji'avare 'ee ea ka'ene nechi'i hijujija ara natohwa kajaho paro'avara.

²²Ijihuni maijaho eha ka'ene mihuna'e Godoni heha vaji 'waramajara nimaa rehuna.

²³Napara ka'ene hari'inijija 'ee napara ka'ene hariha musa iji'inijija vi ichá'ina'e ve'eja? Vea kajaho kwaa arakaho ea mapoka ajirijara siserana parajakame ea ikija ni'ima'ura siseisei temuka'eje hihuna.

²⁴Pu so'wi pijihe kwamasahe 'ee tipurai aherame kwaa ara ani ani'ini vahuna. 'E'eje Jenitaruepo Jerusaremiho ajima tautia apena va'eje Jenitairu puni vea pa'arehuna. Emaa Puni Harihijara Rohunijina

²⁵'E'eje masapa 'ee china 'ee vea 'ee akúpa 'ahi aacha ani'ina kihuna. 'E'eje ea mapoka ka'ene mwe'i hijukija soha ka'ene sisea ani'ina'e amenareje ira ani'ina 'ume'amaji henareje tea juname 'ee niho'o puruva reti'eje hihuna.

²⁶Emaa ijí uneka ka'ene iki mwe'i re'amaji kamareje niho'o juma paranareje kwapihuna. 'Ene uneunecha ka'ene akúpa 'ahi navujija akúpa kakara varivarimareje 'unirame usimahuna.

²⁷'E'eje Ema Puni Harihijaho 'imitia vaji Huni harura 'ee Huni hanaji'iniji'i maho'o roe ea mapoka kahuna.

²⁸Vea ka'ene uneunecha kajipo ika'ina'e reja ki'avajaho 'urine nuana ahasirime a'ama niri'i hi'avara. Ijihuni maijaho jara matauma hihuni vea nitu'u rena paranu 'iamana. Matakijara Najahajina

²⁹'Enarena Hu haa ikaho 'waramana. Ja kaha! Mataka 'ee icha 'aho'ijihi kiha!

³⁰Ijipo 'anaura'omo mai'o naheji'i sisira apúsavu'e kimare'e vea mara'i venu.

³¹Vea ka'ene ijí aneja ki'avajaho Godoni ari rohunijaho tu'u rehuna ro'avara.

³²Na nimai ja 'waravukúne vwiha'avara. Eaka kijahija maho'o pakwamasa rana'eje ija'ina rehuna.

³³Akúpa mwe'ijaho pa'arehuna kaivo Nuni Ira kakaho papa'are'ena. 'Aiha Hami Veji'i Hiha

³⁴Ja hami hami 'ajohareje pahine joni kaukararu vene 'ee toa sisea ine 'ee jara iviamaa 'unama ka'ene ichá'ina'e hami hihuna pavwihaji'i hi'avara. Ijihuni maijaho ja ija'ina hi'eje vea kajaho areri ni'aha kwino kwavaha puna'i asuma va hihuna.

³⁵Vea kajara re'amajaho ea maho'o mapoka ka'ene mwe'a 'ahakino hijujija renahuna.

³⁶'Enakúne veku veku hine 'ajohe nia nirie siporua 'oji'i hi'irakúne ja areri harura rena'eje uneka ka'ene re'iro vejujaho asima va'e Emaa Puni Harihijihuni una'i nami'avara 'iamana.

³⁷Hu veiri'ijaho hine Temiporu vaji najahuva'o na'ivukavi'i va'e huri'a ka'ene Arivina 'wavujihuni 'ahi va'una.

³⁸'Eju'e ea mapoka'e sú'usú'u arihe va'e Temiporu vaji Huni vu'a he'i 'ahiu'e va'ajivura.