Read Managalasi Ruku 23 Bible Online

Ruku 23 - Managalasi bible

Ruku 23

¹'Enarena ea mapoka kajipo 'urine Hu aheme Pairati oni va'ara.

²Pu aneja vene Hu namahi'i ijá 'wava Nú ka'eme ea ikaho ehu núnakija pisimie 'ee Sisa oni takisia pavehuna'e 'warume 'ee Hura 'warumujaho Hu Keriso ka'ene Kinijina 'úmuna 'wavara.

³'Ejume Pairatira Hu apoma ijá 'wama A Jua puni Kinie? 'wamana. 'Ejume Hu eha vene ijá 'wama Ara 'warimu kaja'ina 'wamana.

⁴'Ejume Pairatira pirisitia mama'ina 'ee ea mapoka kajihi ijá 'iama Na ea ikehuni vaja sisea mai'o papiunavu 'iamana.

⁵'Enakaivo pu hina pasonananavi'i ira ajira'e ijá 'wava Hu ikaho ea mapokakihi najahu'e oja 'urinauna. Hu Karari rene najahe va'e Jutia vaja maho'o najahe onuva'o kwaa ike 'u'o iviamaa roana 'wavara. Jesu Ranavume Heroti Oni Va'ajina

⁶Pairatira ike henarena aporame ijá 'iama 'Ú ea ikaho Karari ore? 'iamana.

⁷Hu henajaho Jesuho Herotira kwaa ka'ene 'ajohujino rena roana henarena hu ranavume Heroti oni va'ana. Ijihuni maijaho Heroti roe Jerusaremi hinana.

⁸Herotiho Jesu kamajihuna'e niho'o natohwa'e teamamajihuni maijaho Hura raka ka'ene venuji henujihuna'e Hu aacha pina veja ka'i 'ahaume avanana.

⁹'Ejume Herotira 'aha jora'e Hu apomana kaivo Hu eha pavenana.

¹⁰'Ejume pirisitia mama'ina 'ee Sikuraipiepo ijí namine niho'o natohwa'e ajina'eme Jesuho namahara.

¹¹'Enarena Herotiho 'ee huni sorutia pu'úmo Jesuho apene 'urarahe 'ee sise'i 'ahae 'ee ateha niho'o mavarasa'ina apúsamahe ranavume Pairati oni 'uname va'ana.

¹²Maraku'ijaho Heroti'o Pairati'o naka vejura kaivo vea kajino pu no'o napura vejara. Jesu 'Anaa Kwahuna Nimaa Vejajina

¹³'Ejume Pairatira pirisitia mama'ina 'ee emaapuni ea mama'ina 'ee ea mapoka 'waravume ahuvara.

¹⁴'Ejume ijá 'iama Ja ea ikaho apene nuni roara. Hura veju'e ea oja 'urinau'e ea sisea vejura 'wa'i ahema roara. 'Enakaivo na joni una'i vena kavujaho na ea ikehuni vaja sisea mai'o papiunavu kaivo jara Hua'e namahujiruna.

¹⁵Heroti 'u'o vena kamajaho Hu sisea pavenana'e kamarena nuni 'unama kú'o roana. Heha! Ea ikaho unenu'u pina sisea pavena jihuna'e Hu areri pakwahuna.

¹⁶'Enajihuna'e na hijahareje ranave va'ena 'iamana.

¹⁷Puni tamani jihuna'e sora ijuri vea reju'ukavi'i tipura ea kwinu ranavu'e samai va'una.

¹⁸Ea mapoka kajipo ni'aha kwinu ahuma ijá 'umeja Ea ike ape'i kaivo Parapasi ranave samai ro 'e'unama 'umejara.

¹⁹Parapasiho ara natohwa vaja kajino hine 'arahe 'ee ea'e 'aniume kwamasaha jihuna'e ranavume tipurai hinana.

²⁰Pairatira ura renajaho Jesu ranave vahuna'e ura rejume ea mapokijihi kú'o 'waramana.

²¹'Enakaivo pu ira ajira'e ijá 'umeja Icha 'ahi 'anaa! Icha 'ahi 'anaa! 'umejara.

²²'Ejume hu 'aha no'ohe'i ni'waramana'omo kú'o 'aha pina ijá 'iama Irakijihuna'e 'ana'uro 'umejo? Hu unenu'u pina sisea iraka'e venane? Hu unenu'u pina ve'ira'omo na 'anae kwahuna na pakavu. 'Ena'omo na 'warave pu hijaha ranave vahuna 'iamana.

²³'Enakaivo pu hine majama pasonananavi'i icha 'ahi 'anae kwa'amarono 'umenu va'o pura harura vene rarejara.

²⁴'Ejume pura raka ka'ene ura renajaho Pairatira ve'avarono 'waramana.

²⁵'Ejume Pairati ea ka'ene ara natohwa vaji 'arahe 'ee ea 'aniu'e kwamasahi'ina ka'ene tipurai hinana ka'ene pura rana'amarono ura renaji rana'ika'i Jesuho puni ura ijino ve'avarono mihana. Jesu Korosi 'Anaajina

²⁶'Ejume pu Jesuho ahema va'eme Saimani ka'ene Sairini orijaho huni ari rene ro'eme pu iji 'uname icha kajaho apena pimahe 'ejahaume apene Jesuni túna'i va'ana.

²⁷Ea niho'o mapoka mapoka'e va'aji'eme napara 'aho'a puni rira kajino virisia vene niramaruvi'i 'ararihia va'ara.

²⁸'Ejume Jesura ta'arohe ijá 'iama Napara ka'ene Jerusaremi orakije Nunijihuna'e niramaruvujaho are'i kaivo joni harihija 'ee ojono nira'ahusaraha.

²⁹Ijihuna'e heha! Vea mai'o nituma roe sa'eje ja ika 'wa'eja Napara ka'ene hariha pa'eke 'ee panahena'e 'ee hariha pa'ajohai'inijija teamanahuna 'wahuna.

³⁰Ijaho vea ka'ene emaapo aneja vene nahara'e ika'ina jarima 'warahunijina 'Auma arihe ninamuha 'ee huri'a roe vahúha 'wahuna.

³¹'Enajihuna'e pu icha maiu'ina vajijiano uneunecha ija'ina'e ve'avajaho vu pu icha sahasa vajijaho ichá ve'eja? 'iamana.

³²Pu ea sisea no'ohe'i Jesu pu'úmo 'ania kwamasa'avarono aherame va'ajivara.

³³'Ejume pu roajime kwaa ka'ene Húmatata 'wavujino useme Jesuho icha 'ahi 'anae 'ee ea sisea pina mana'inija'i 'anae 'ee pina ana'inija'i 'anaara.

³⁴'Ejume Jesura ijá 'wama Amo pu raka ka'ene vejukaho puruva reti'eju'e vejukúne Noinvwihanie are'amana 'wamana. 'E'eme pu pipia vene Huni ateha swara vena 'ekara.

³⁵Ea mapoka kajija namine ki'eju'e puni mama'inijipo Jesuho apene 'ijahe ijá 'wava Hu ea 'aho'a ni'ajihu ja'ina'e maka'eje Hu Keriso ka'ene Godira iji pijahaji re'amajaho Hu ori'ini ni'ajara'amama 'wavara.

³⁶'Ejume sorutia ijija 'u'o Jesu apene 'ijahe toa sisea 'eka roe vajahi'i

³⁷pu ijá 'wava A Jua puni Kinia re'amajaho orono ni'ajarama 'wavara.

³⁸Ira ika'ina'e Huni hurijino vejara. Ikaho Jua Puni Kinijina.

³⁹'E'eme ea sisea pina ka'ene ropuna'i 'anaume namajara vu'a sisea Hu 'warame ijá 'wama 'Ú A nimaa Keriso re'amajaho A orono ni'ajarame nú 'u'o ni'ajúha 'wamana.

⁴⁰'Enakaivo ea pina ka'ene ronuna'i namajara 'urarahe ijá 'wama 'Ú a Godiho pajuhamo? Nú 'u'o iki pu pu'úmo areri ahume kwamasahu.

⁴¹Nú eha apejujaho nijina. Ijihuni maijaho nú sisea'e vejajihuna'e eha apeju kaivo Hu unenu'u pina sisea pavenana 'wamana.

⁴²'Enarena hu ijá 'wama Jesu vea ka'ene Ara Oni ari va'e'umajaho A na vwihani'amana 'wamana.

⁴³'Ejume Hu ijá 'wama Nara nimaa a 'waravu jihuna'e a iviasi Na hu'úmo Parataisi hihuna 'wamana. Jesura Kwamajina

⁴⁴Ija'ina'e ve'eme vea va'e riri nami'eme kwaa mapokakaho vea na'ima namuva'o vea va'e hareha 'aha karohi naminana.

⁴⁵'E'eme vea na'i'eme Temiporu vaji ateha natohwa ka'ene 'uranavume namajaho rira mu'oi kajino isome no'ohe'i renana.

⁴⁶'E'eme Jesura ira ajira'e ijá 'umena Amo Oni ija 'ahi Na Nuni 'Avena ranavu 'wa'ika'i oja sumana.

⁴⁷'Ejume sorutia puni Natohwijara iraka ka'ene renaji kamarena Godi ta'arohi'i ijá 'wama Ea ikaho nimaa ariramaa 'wamana.

⁴⁸'Ejume ea mapoka ka'ene ijí ka'i 'ahiume ahuvajija Jesura kwavumakame tea junavume túrata puna 'anai'i 'uname ari va'ara.

⁴⁹'E'eme Huni napuhija maho'one 'ee napara ka'ene Karari rene Hu tamatihe roajija kameri namina raka ka'ene rena kajaho kavi'i namijara. Jesu Kwananavajina

⁵⁰'E'eme ea pina iha huna Josapina Hu kanisorua pine 'ee hu ea mamaa 'ee arimaa.

⁵¹Hu pura vu'a ka'ene amairie 'ee raka ka'ene vejajaho hu panimaa venana. Hu Juapuni ara natohwa ka'ene Arimatia 'wavujino rena roana'omo Godoni arijara rohuniji 'ajaha hinuna.

⁵²'Enajihuna'e ea ikara va'e Pairati jarime Jesuni haha'e ape'irono 'waramana.

⁵³'Ene hu roe Jesuni haha apene atehi mwame apena va'e muna ara maiu'ina ka'ene ea mai'o pairechavi'inijino ranamana.

⁵⁴Vea kajaho Sapati amairiaravuri veijina. 'Ene Sapatia mai'o aneja ve'i 'ahaume vejajina.

⁵⁵'Ejume napara ka'ene Karari rena roajija pu pu'úmo va'e eucha kajaho kame 'ee Huni haha ichá'ina'e mwame ranavajaho kavara.

⁵⁶'Ejume pu 'unama va'e ari senisia 'ee iona amairiarame Sapatia'omo puni tamanijara 'warama ja'ina'e vene ojuta hwejara.