Read Managalasi Ruku 4 Bible Online

Ruku 4 - Managalasi bible

Ruku 4

¹Jesuho Jotani rene Godoni 'Aveni ruha apena para'eme 'Avena kajara aheme nechi'i va'ana.

²Hu ijino na'ia mapoka mapoka (40) hi'eme Setani Hu vena kamana. Hu vea kajija 'iruma painajihuna'e Hu matuma paranana.

³'Ejume Setanijara Hu ijá 'wama A Godoni Hariha re'amajaho muna ike veje puretia rejakame ina 'wamana.

⁴'Ejume Jesura eha vene ijá 'wama Godoni Irijara ija 'úma Ema mai'o puretieru reje hihuna pana 'úmana 'wamana.

⁵'Ejume hu Jesu ahema va'e huri'a 'ahi namine kwaa ara mapoka kajaho ni'aha kwinu nahana.

⁶'Ene Setanira Hu ijá 'wama Na harura 'ee kwaa ara mapokakaho vajahuna. Ikaho naa'e mihara'omo nara ea ka'ene na ura reni'amaji mahuna.

⁷A na oja mi'amajaho ike mapokakaho Ona'e rehuna 'wamana.

⁸'Ejume Jesura eha vene ijá 'wama Godoni Irijara a Natohwa ka'ene oni Godi ijiru oja mahe Hunaru vena'amana 'wamana.

⁹'Ejume hu Hu ahema va'e Jerusaremi Temiporu 'ahi ranavume namijumakavi'i ijá 'wama A Godoni Hariha re'amajaho iki kami mwama pi'onama 'wamana.

¹⁰Godoni Ira vaji 'waramajahoHura Huni 'ona oji'ina irechamie pu A 'ajohahuna 'wamana.

¹¹Pura puni iji 'ahi'enae A Oni mumora muna 'aha pa'anaarahuna 'úmana 'wamana. Noin

¹²Jesura eha vene ijá 'wama Godoni Ira vaji ijá 'úmaA Oni Godi Natohwijaho pavena ka'amana 'úmana 'wamana. Noin

¹³Setaniho Jesuho 'unama ani ani vena kamajaho iji'a are'i kaivo ma'uaku ranama ruva'ana. Jesura Huni Kaukara Karari Vaji Aneja 'Emajina

¹⁴'Ejume Jesuho kú'o 'unama Godoni 'Aveni jihuni haruriji'i Karari va'ana. 'Ejume Huni pinanijaho 'urijume kwaa ara mapoka kajaho he parajara.

¹⁵'Ene Hu aneja vene puni Sinakoku vaji najahume ea mapoka'e Hu ta'arohara. Jesu Nasareti Vaji Pataarohajina

¹⁶'Enarena Hu 'uname Nasareti Huni araneji Hura emakina'e renajino va'ana. Sapati hu nivenu ja'ina'e Sinakoku vaji Hu heha ta'iro 'urinana.

¹⁷Heha ka'ene poropetia Aisea onijaho Huni ijatahi ranavume Hu rasame ika'ina kama tahana.

¹⁸Natohwi jihuni 'Avenijaho Na hu'úmo hinu. Hura Na ea ka'ene uneunecha pa'ajihi vu'a ka'ene mamaiji naja'urono ranamiana. Ea ka'ene i'ivani'inijihi rasamie 'ee ea ka'ene nia supavi'iniji veje niri'avarono routa. 'Ene ea ka'ene sisei hiji'inijihi ni'ajihe hanasina ape'avarono routa.

¹⁹Juara ka'ene Natohwijara ni'ajihuniji 'wara'i routa 'úmana 'iamana.

²⁰'Ejume heha tahuhe ea ka'ene naminaji ma'ika'i asuma hinana. 'E'eme ea mapoka ka'ene Sinakoku vaji hija kajija nia tajahena apene Hua'e mahara.

²¹'Ejume Hu aneja vene ika'ina 'waramana Joni atai he'eme heha ka'ene Na tahujaho iviamaa nimaa renu 'iamana.

²²Ea mapoka ka'ene ijí hijajaho niho'o oja hianame 'ee vu'a ka'ene Huni iri vaji rena roe arihume hejajaho niho'o teamanavara. 'Ejume pu ijá 'wava 'Ú eakaho Josapi oni Harihijine? 'wavara.

²³Hu pu ijá 'iama Na niheju. Ja Na areri juketakúne orono veje maranaama 'wihuna. Ja Na ijá 'wihune Ara Kapeniami uneka ka'ene vejume nú pinana ka'ene hejuji ikine oni ari veja kava 'wihuna 'iamana.

²⁴Na nimaa nimaa 'waravu ea ka'ene poropetia huni ara vajijaho hami paapene 'ajovura.

²⁵Na ja nimaa 'waravo. Nimai Iraija oni veijaho amuna mapoka'e Isureri vaji ani re'eme juara no'opisune masapa iropu kwinu neha papi'eme kwaa ara kajaho ora vea re'eme matuna hijara.

²⁶'Enavo Iraijaho mai'o amuna mapoka ijí hijara kaivo hu puna pava'ana kaivo hu Saitoni vaji ara iha Sarepatina 'wavujino amuna kwinu'wi ijí hinuna'omo ijí ni'aja'iro va'ana.

²⁷Poropetia Iraisa oni veijaho ea mapoka reporosia rukina Isureri vaji hijura vo niho'o ea pina marahuna pana kaivo Nemani ka'ene Siria orijiru huhusu maranana 'iamana.

²⁸Ea ka'ene Sinakoku vaji hija kajipo ijí hejajaho pu niho'o ajinamana.

²⁹Pu 'urimarame Hu tairie apene ma'ahi 'useme aheme va'e huri'a ka'ene puni ara ijihuni toi vejari 'ahi rarahi apúsa'i 'ahiume vejara.

³⁰'Enakaivo Hu puni rira kajino ro 'e'une va'ana. Ea 'Avena Sisei Rosamajina

³¹'Ejume Hu Kepeniami Karari vaji va'e Sapati vei ea najahana.

³²Pu Huni vu'a ka'ene niho'o harura rukiniji hejajaho oja hwa'usahara.

³³Ijí Sinakoku vaja kajino ea pina 'avena sisei ajivi'ina hinana'omo hu niho'o ira ajira'e emaavanana.

³⁴Haee! Jesu ka'ene Nasareti orakere A nú iraka'e vetú'irono roane? 'Ú A núa'e 'eka ruaru 'ahaume roane? Na A nihena kavu. A Godoni arira maijina 'wamana.

³⁵'Enakaivo Jesu 'uraraha ijá 'wama Irano'a are'i kaivo ema kajaho rana'i kaivo ariha va'a 'wamana. 'Ejume ijí 'avena sisea kajaho hu unenu'u pina pave'ika'i ema kajaho pi'onavume ea mapoka kajihipuni una'i 'ojumakavi'i ro 'e'una va'ana.

³⁶Ea mapoka ijí kamareja niho'o oja hwa'usunahara. 'Ejume pu ijá 'wava Ike vu'akaho ichá'ine? Harura 'ee ajira rukina'omo ike eakara 'ananajihe 'ee pikinakavi'i 'avena sisea 'waravu'e usevura 'wavara.

³⁷'Ejume ijí Huni vu'a kajaho kwaa ara rora rora kajaho marako re'unana. Jesura Ea Mapoka Venaume Maraniajina

³⁸'Ejume Hu 'urina Sinakoku kajaho are'ika'i Saimani oni arijino va'ana. Saimani oni jura paranahijaho haha ohoa natohwa'e rejume pu Jesura ni'aja'amarono huni iha 'ahi 'ona vejara.

³⁹'Ejume Hu va'e Huni ruha rorijino nami'i ijí haha ohoa kajaho 'ararihaana. 'Ejume haha ohoa kajaho pa'are'eme hu 'urine 'iruma amairia pu vajihana.

⁴⁰Nusirei vea va 'o'i ve'eme ea mapoka ka'ene atama ani ani'ina 'ekajija aherame Jesuni roume Hu ea kwinu kwino puni haha 'ahi Huni ija irechavume pu maraniara.

⁴¹'Ejume 'avena sisea mapoka'e Hura vejume usevi'i ijá 'umejare A Godoni Hariha 'umejara. 'Ejume Hu 'ararihie vejume pu ira pa'waravara. Ijihuni maijaho Hu Kerisoho pu nihena kavura. Jesura Sinakoku Vaji Najahajina

⁴²Vea nitumajino Hu kwaa kajaho are'ika'i va'e kwaa ka'ene ea pahijujino va'ana. 'Ejume ea mapoka kajipo hina samuva'o piuname pu ura Hu 'unanavakame paranamie va'amarono vejara.

⁴³'Enakaivo Hu pu ijá 'iama Na va'e ara 'aho'a Godoni ara rona 'waramaji najahuna. Ijihuni hahi Na ranamiume Na ikaho routa 'iamana.

⁴⁴'Enarena Hu majaa Jutia Sinakoku mapoka vaja najahana.