Read Managalasi Ruku 6 Bible Online

Ruku 6 - Managalasi bible

Ruku 6

¹Vei pini Sapati veijino Hu konesa juasi'a 'uraha va'eme Huni tisaiporua konesa tuame iji tanihi'i 'inijaho ijara.

²'E'eme Parasia 'aho'a ijá 'iava 'Ú ja iraka vene varapijara Sapati veijino pave'avarono 'warumajaho vejo? 'iavara.

³Jesura eha vene ijá 'iama 'Ú ja Tevitira huni ehi pu'úmo matuvumakame iraka ka'ene vejajaho ja pataha hejare?

⁴Hu Godoni sei va'e puretia ka'ene Godi vajahajaho 'eke huna i'ika'i 'aho'a ehwaha vajihana. 'Enavo ijaho tamana'omo ea mamaha paijura kaivo pirisitiepo pupusu ijura 'iamana.

⁵'Ejume Hu ijá 'iama Ema Puni Harihijaho Sapati huni Natohwa 'iamana. Ea Ija Ajuaravi'ina Vejume Maranajina

⁶Na'ii pini Sapati veijino Hu va'e Sinakoku vaji najahana. Ema pina ijí hinajaho huni ija mana'inijaho 'irivi'ina.

⁷Sikuraipi 'ee Parasia Hu ea pina ijí Sapatia vea kajino veje marajakame nama'i 'ahiume nii vevirinavara.

⁸'Enakaivo Hu pu raka ka'ene vwihajajaho Hu kimarena ea ka'ene ija irivi'ina kajaho ijá 'wama 'Urine iki una'i roa 'wamana. 'Ejume hu 'urine ijino va'ana.

⁹'Enarena Jesura pu ijá 'iama Na ja aporavu Joni tamanijaho Sapati veijaho nú mamaa ve'eja ho sisea ve'eja? Ea ni'aji'eja ho ea 'anae kwa'ena? 'iamana.

¹⁰Hu 'urine nami'i kaivo ea kwinu kwino kima apena vu'u va'ume irivi'inijaho ijá 'wama Oni ija nipima 'wamana. 'Ejume hu ija'ina'e vejume huni ija maranana.

¹¹Pu niho'o ajinavume pu hine Jesu iraka ka'ene vetihuniji 'wama apenojara. Jesura Apasorua Iropu Ropu No'o Pijihajina

¹²Vea kajino Hu va'e huri'a 'ahi siporua 'o'i va'ana. Hu na'ia kajaho Godoni siporua hine 'o'eme vea nitumana.

¹³Vea nituvumakavi'i Hu Huni tisaiporu 'umenaume rouma ea iropu ropu no'o iji pijiharena iha ihame Apasorua 'iamana.

¹⁴Puni ihijaho Saimani ka'ene Pitana 'wavujaho 'ee huni 'u'ua Enituruho 'ee Jemisi ho 'ee Joni ho 'ee Piripu ho 'ee Pataramiu ho 'ee Matiu ho 'ee Tomasi ho 'ee Jemisi ka'ene Apiasi oni harihijaho 'ee Saimani ka'ene Seratina 'wavujaho 'ee Jutasi ka'ene Jemisi oni harihijaho 'ee Jutasi Isikariati ka'ene Jesu nahamahunaijina. Jesura Kaukara Iraka'e Venajina

¹⁷Hu pu pu'úmo ariha roe amari namiji'i kivume Huni tisaiporu niho'o mapoka mapoka kajihija 'ee ea niho'o mapoka mapoka Jutia rori hijura 'ee Jerusaremi rori hijura 'ee ara ka'ene soha rori Taia 'ee Saitani roara.

¹⁸Pu roajime Huni vu'a hene 'ee puni atama veje pa'are'amarono roara. 'Ene ea ka'ene 'avena sisea ajima'inijija 'u'o roume Hu vejume maraniara.

¹⁹'Ejumakame ea mapoka Huni haha 'una'iro vejara. Ijihuni maijaho Huni harura ni'ima'ura Huni vaji rena roe ea mapoka vejume maraniara. Temara 'Ee Temuka

²⁰Hu 'arohe Huni tisaiporu kivi'i aneja vene ijá 'iama Ja ea ka'ene pivusahujija ivi'a tea manamama. Ijihuni maijaho Godoni arijaho ivi'a jona'e renu.

²¹'Ene ja ea ka'ene iviamaa matunavujaho ivi'a teamanamama. Ijihuni maijaho Godira veje ja tú'ahuna. 'Ene ja ea ka'ene niravujija ivi'a tea manamama. Ijihuni maijaho ja ijasahuna.

²²Ja Emaa Puni Harihijihuni hahi emaapo kima sename 'ee pataarorahe 'ee ira sisea namahe erapo ira sisea 'warame ja 'ararihie vu'a sisea ani ani'ina 'ee joni iha 'urihi'i sisea vwihaja ki'avajaho ja teamanamama.

²³Vea kajaho ja niho'o teamanama para'eje mari'uvi'i ohurikusaha. Ijihuni maijaho joni eha mamaa kahino Godoni ara akúpa 'ahi namu. Puni sahipo nijano poropetia ka'ene marako hijajija sise'i 'ahiaja'ina'e ja 'u'o sise'i 'ahihuna.

²⁴Ja ea ka'ene iviamaa uneunecha mapoka ani re'eju'e hijujaho niho'o sisea piunahuna. Ijihuni maijaho ja iviamaa hami hihunijaho maho'o apeju.

²⁵Ja ea ka'ene iviamaa túavujaho niho'o sisea piunahuna. Ijihuni maijaho ja matunahuna. Ja iviamaa ea ka'ene hine ijasahujaho sisea piunahuna. Ijihuni maijaho ja chora hine niramaruhuna.

²⁶Ja ea ka'ene iviamaa joni vu'a mamairu 'wavujaho sisea piunahuna. Ijihuni maijaho nitama puni sahipo niareri ija'ina'e poropetia ka'ene ira'asinijija 'ahiara. Naka Oja Mihunijina

²⁷'Enakaivo Na ja ea irahipo hejuji Na 'waravu. Joni naka oja mihe 'ee ea irahipo jaa'e senavujija hami 'ahie

²⁸'ee ea ka'ene jaa'e siripa'avajija merajihe 'ee ea ka'ene ja sise'i 'ahi'ava jihipuni siporua 'o'avara.

²⁹Ea pini a noa 'ahi tahijaha'e ka'amajaho maka'eje ropuna'a 'u'o 'ana'amana. Ea 'ahopo oni kosetia ape'avajaho maki'ika'i oni setia 'u'o mi'amana.

³⁰Ea irara uneunecha jarirave ka'amajaho ma'amana. 'Ene oni kukua'e ei pini ape'amajaho kú'o paape'i 'ahae 'wara'amana.

³¹Ea 'ahopo jona'e vena'avarono ja ura renuja'ina'e ja ea 'ahopuna vena'avara.

³²Ja ea ka'ene jaa'e oja mihujiru oja mi'avajaho ja maa iraka vejare? Ijihuni maijaho ea sisea 'u'o ea ka'ene pu oja vajihujiru oja mihura.

³³'Ene ja ea ka'ene jaa'e hami 'ahiujiru hami 'ahi'avajaho ja iraka'e maa vejare? Ijihuni maijaho ea ka'ene sisea veji'ina 'u'o ija'ina'e vejura.

³⁴'Ene ja ea ka'ene eha vajihunijiru uneunecha vaja'avajaho ja iraka maa vejare? Niho'o maa pavenana. Ea ka'ene sisea veji'ina kú'o eha areri 'ekahuna vwihaji'i ea ka'ene sisea veji'inijaho vajihura.

³⁵'Enakúne joni naka oja mihe 'ee pununa'i hami vene 'ee eha 'ekahuna pavwihaji'i vaji'avara. Ijihuni maijaho ja eha natohwa'e kahi akúpi 'ahi apene 'ee ja Godi ka'ene niho'o Ichuto Maijihuni harihija'e rehuna. Godiho ea ka'ene Hu patea manavi'inijija 'ee ea ka'ene sisea ni'ima'ura veji'inijija hami 'ahiuna.

³⁶Joni Omijara ea 'aho'a numiramu ja'ina'e ja ea 'aho'a numirahuna. Ea 'Aho'a Namahujina

³⁷Ja ea 'aho'a panama'irakúne Godi ja panamahuna. Ja ea 'aho'a parona'irakúne Godi ja 'u'o parona'amana. Ea 'ahopuni sisea vwihane are'irakúne Godira joni sisea vwihana are'amana.

³⁸Ja ea vaji'avajaho ja 'u'o vajihuna. Ja hami swara ve'avajaho areri ija'ina'e niho'o nipia nirisame tihitihivajame ajima roe ameurahe arihi'ina'e ja vajihuna. Ja ea 'aho'a'e vajiha ja'ina'e ja 'u'o vajihuna 'iamana.

³⁹'Enarena Hu haa 'u'o ika'ina'e pu 'waramana. Ea ka'ene nia supavi'inijaho ea pina ka'ene nia supavi'inijaho areri ahema va'ena raka? Pu no'o areri ma'oa paarihuna raka?

⁴⁰Sikuru pwea huni najahi'inijaho paasimuna. 'Enakaivo ea irara nahu'e hena kamare'e iji'a huni najahi'ina kajihu vare'ina renuna.

⁴¹A iraka'e vene oni nia vaji taura ni'ima'ura ka'ene navujaho pakama 'wa'i kaivo vweu puni nia vaji taura ma'u'ua ka'ene namujaho kame 'waramo?

⁴²A 'unama ichá'inijino oni vwea ijá 'wa'ena Vwee veje na oni nia vaji taura ka'ene namujaho 'e'onavuma. 'Enakaivo vu oni nia vaji taura ka'ene namujaho a pakamo? A niho'o ira'asinakúne oni nia titi taura ni'ima'ura ka'ene namujaho marako 'e'ona'i kaivo areri hami niriareje iji'a vweu puni nia titi taura ka'ene namujaho 'wara'amana. Icha 'Ee Huni 'Ina

⁴³'Enajihuna'e icha mamaijija mai'o 'ina sisea parejura. 'Ene icha siseijija mai'o 'ina mamaa parejura.

⁴⁴'Ene icha mapokakipo 'ina ka'ene rejujaho nú icha raka sa'inijija 'ina kaji kima hejura. Ja mataka 'wija 'ahi rena navu'e ja va'e mene roe ijure? Manu'a mitota 'ahi rena navu'e ja va'e mene ro ijura raka?

⁴⁵Ea ka'ene oja mamai ijaho uneunecha mamaa puni oja vaji rena roe ajima arihura. 'Enakaivo ea siseijijahija puni oja vaja sisea ka'ene namujiru roe ajima arihura. Ira vaja kakino raka ka'ene roa ajima arihujija puni oja vaji ichá'ina ka'ene navujipo roe ajima arihura. Ea No'o Ara Vejajina

⁴⁶Ja iraka vene Natohwe Natohwe 'wi'i kaivo Nara raka ka'ene 'waravujaho pavejo?

⁴⁷Ea ka'ene roe Nuni ira hena venujaho hu ea ichá'inijaho Na jaa'e najahuna.

⁴⁸Hu areri ei ara'e venuja'ina. Hu mwe'a 'uma ariha va'u va'u muna 'ahi aneja vene tukeja kikisina samuna. Neha ni'ina pine sai natohwi hiramarena ara kajaho ninamana kaivo niho'o pavarimana. Ijihuni maijaho ara kajaho niho'o hami hami muna 'ahi rena vejara.

⁴⁹'Enakaivo ea ka'ene Nuni ira henare'e pavenujaho areri ea ka'ene huni ara tukeja hami hami pasamuja'ina. 'Ena'omo vea ka'ene sai hirame ninamujaho ni'aha kwino 'aumuna. Niho'o majikari umatematu 'onana 'iamana.